Sposc de etres tempes. Cobies leèdes da l’amor. N sentiment che no à mai fin. Per fortuna. Dapò che sibe stat tempes più grieves che anchecondì se pel l lejer dai retrac. Per la noza no i aea segur de no l menù del chech trei steiles ma bales – ei, fosc più pazes che zenza - e desche viac de nozes segur no l'era i tropics ma na raida a Riva del Garda canche la jia ben, senó, co la coriera fin fora Ciavaleis, jun Busan o a Bornech a fèr la foto da sposc. Purampò se veit na gran degnità, na fina eleganza e ence mingol de stolzarìa ti eies de chela sposes che no semper jia encontra a n destin sorì. L bel l’é che chesta stories fèsc pèrt de noscia storia, da chisc leames sion vegnui fora nos, dessema a chisc, duc adum, fajon chel che se disc ‘noscia jent’.