N viac te l’India l’é n esperienza sota, colores, saores, odores se mesceida a ac e tananai olache usanzes e tradizions te mena te lesc e tempes desferenc.

Pecia outes na publizità é dalbon garatèda ma soraldut doenta n pensier costant canche te rues zaolà. No coscì per l’India, chest gran continent de passa un miliard de jent olache i contrasć sauta fora te duc si colores e saores. Dal tananai de risciò, tuc tuc, auti, jent e vaces te strèda al chiet di pré desche tapees che se troa dintornvìa i palac zipié fora con figures erotiches delicates.
La storia de l’India é scrita te monuments de gran splendor ma ence te meseria, entesseament e fon sens de spiritualità. Tempies e picoi utères te vigni cianton se mesceida con fegures de Guru, gherlandes de fiores e n jir chiet anter jent e besties, vaces soraldut, la vacia sacres che vèlch outa se troa te mez stradon anter l trafich e n gran tananai…
Ge vel mingol de temp per se usèr a veder chesta vaces, cetes te stradon tanche se les fossa sul più bel prà, vèlch outa te n cianton se les veit magnèr sù refudames e òrcena de ogne sort, tant che più che n’outa me é pissà che chiò l’é sorì doentèr vegetarians!
La Capitala Delhi à reijes de acà 3000 egn e ogne dinastìa se à lascià vindedò de bie elements architetonics e culturèi: tempies, fortezes, torns e moschees.
Apede la reijes storiches l’é ence la zità moderna - New Delhi - che l’é dut auter da Old Delhi, l cher vif de la cultura indiana, fata sù da l’imperador Moghul Shah Jahan co l’inom de Shahjahanabad.
Son ruèda a Delhi con 3 compagnes a la descorida de l’India ma dò 3 ores no aee più ousc e me sentìe l smog enscin te la budeles…n entesseament da no creer, somea che aló i livìe de entesseament sibie 7 outes più auc di limic pervedui da l’OMS.
Pech temp sion states a Delhi ma ampò aon vedù l bazar de Chadmì Chowk pien de boteighes de ogne sort e la gran moschea Jama Masjid del 1650 d.C., la moschea più grana de l’India con na vasca te mez per se lavèr e na lingia de torns e cupoles che aon abù la fortuna de veder sul fiorir del soreie.
Ac e tananai somea desvanir canche se é ite te chisc palac, ciantons de pèsc olache somea che l temp sie cet : colores, eies scures, grignoc…duc en pè nut, - amancol chiò no i spuda tant - me vegn da dir. Ei, ajache l spudèr, apede i clacson e l biteboi de trafich de auti, risciò, tuc tuc, vaces e auter, l’é chel che ge sauta più a l’eie al forest che rua en India. Zacan i zachèa l betel che fesc passèr la fam e dèsc energia…aldidanché i se tol jù zeche polver te bustines che bruja mingol la jenjìes e dò n trat che te l’ès te bocia ge vel la spudèr fora. Nisciugn somea massa se cruzièr de te spudèr dedant o sui piesc, a mi me vegnìa mingol aric e me vegnìa tel cef la paroles de Antonella “Te vedarès, aló i seghita a spudèr” : cogne ge dèr rejon, ma col temp fèsc dò e dò manco aric, se se usa ite a dut!
D’autra pèrt chest l’é ence l Paìsc de la toleranza, de la no-violenza, de Gandhi (1869-1948), un de chi che à mudà delbon l jir de la storia didan l’India a arjonjer l’indipendenza. Gandhi, dò aer studià a Londra e lotà contra la discriminazion raziala tel Sudafrica l’é jit de outa te sie Paìsc scomenzan n percors de revoluzion no violenta. “Ge vel cognoscer per pissèr dò e agir” per chest Gandhi se aea tout dant de voler cognoscer delvers sie Paìsc e sia jent viajan fora per duta l’India co la ferata….la medema che aon tout nos e che ne à menà a Agra, Khajouraho, Varanasi, Calcutta e Puri. N viac da no sé cotenc de km che me à fat sentir l’India più sota con na intensità che jà dò 3 dis me saea de esser aló da 3 meis: jent scontrèda e cognosciuda te n post, dò vèlch dì me saea che la fosse dalenc “egn”.
Desche la jent che fajea la couda con nos per jir ite tel Taj Mahal, l tempie de l’amor fat sù anter l 1631 e 1653 da l’imperador Moghul Shah Johan in memoriam de si amèda femena Muntaz Mahal morta jona de pèrt al 12.esim fì. I architec chiò somea cognoscer la magìa del teater ajache l palaz l’é de gran efet scenich. L spieie de ega dantcà, sia cupola biences che muda color e de bie giardins paa jù duta la fadìes de cogner restèr aló passa 2 ores en couda per ruèr apede la sala, che no l’é nia respet a dut l maestous palaz de fora. Più che turisć foresć chiò troon indians, jent che vegn da desvalives lesc per vijitèr l tempie de l’amor e à gust de se lascèr fotografèr ma soraldut de ne fotografer, cossa che, vedaron più inant ,ai indians ge pièsc n muie. “Where do you come from? “ e “Can I take a picture” l’é chel che i domana duc: da olà vegneste? Posse te fèr na foto? Tinpruma vegn da grignèr, dò me é pissà…”Ma olà jirèles pa duta chesta fotos?” Ben viapura endèna se cognosc mingol chest popol valent, usà a jir, se strenjer e stèr dessema.
L Taj Mahal de Agra l’é stat declarà Patrimonie de l’UNESCO e ogne an rua adalèrch passa 3 milions de vijitadores. Auter tesor de l’India é Orchha, n picol paìsc chiet e sorì che conservea palac trop più gregn che el, na architetura desvaliva fata de pizes e cupoles. Orchha l’é un di pec posć che é vedù olache la beleza de la natura se sposa con l’estetica de la storia e dut somèa amò esser sorì, n viver chiet, te n bel post con mingol de turisć, nia massa, e pech trafich, cossa che dalbon deida a fèr pusser la ureies!
Da Orchha con l’auto dò n bon 5 ores su na strèda da bujes e da dedut sion ruèdes a Khajuraho che conservea tempies de l’an 1000 d.C. fac sù tel temp di Chandela, na dinastia che à soravivù 5 secoi dant de vegnir druchèda jù dai Moghul.
Chisc lesc é cognosciui per sia statues erotiches zipièdes fora con gran cunst artistich e architetonich.
L’é n piajer stèr te chisc lesc chiec, i ac e tananai somea esser desmentié desche ence duc chi joenec che te stèsc dintorn ogne moment per te portèr te una o te l’autra boteiga, vèlch outa delbon n stress! Ence la natura aló la é maestousa e aon podù se fèr na raida co la roda enscin a le Raneh Falls, 18 km su strèda biencia con rodes da zacan…zeche ciodi che aon fat na gran cagna ma l spetacol ampò paèa la speisa. N’outa ruèdes colassù i ne à dit che al temp di monsons l’é dut n egajon te chisc canyon!
N’ autra ferata ne mena a Varanasi, la zità eterna, capitala religiousa sul ruf Gange olache se disc che chi che mor rua drec sun Paradis, o miec i arjonc l Moksha, la salveza, la liberazion. Ogne Indù cognessa jir aló amancol n’outa te sia vita: per chest la zità e soraldut l Gange i é dò e dò piens de jent : chi che se lèva, chi che tol èga, chi che prea e chi che porta i morc a brujèr tel “Burning Ghat”. Chesta sort de brujadoa a l’averta é en funzion 24 ores sun 24 e ge laora n gran muion de jent : chi che fèsc legna, chi che enjigna i morc sun n telé, i li rencura, i ge met n drap dintorn e dò i aer bagné tel Gange i li met su la pira e i ge dèsc fech. Apede chest busiament de jent l’é ence chi che chier fora da l’ega ogec personèi de chi che é stac brujé per ge i dèr de outa a la families. Zeche che dalbon no sion usé a veder ma che moscia ence l desvalif raport che chesta popolazion à co la mort.
Con la barca sul Gange se passa dedant a palac de Mahrajà, tempies, marcé e jent che va e vegn te n’atmosfera deldut particolèra, ma canche se va dò chi vièi strenc de Varanasi ge vel vardèr de no pestèr te na ciorda o se imbater te na vacia…l’é mingol tanche na Unejia indièna “Ma n muie indièna”!
L’India te ciapa ite e te resta per semper, Varanasi segur l’é un de chi posć che no se se desmentiarà più, descheche enveze me é fat marevea de Calcutta, olache me spetèe de troèr gran meseria e enveze aon troà na zità moderna, grana, neva olache ence l cianton de Mère Teresa l’era più rencurà e la jent stajea miec che no te etres lesc.
Incredible India! Giusta coscita, desche tel raion de l’Orissa olache vif amò valguna tribus con lengaz, guants e tradizions duta sies : pìroi tel nès e su per la oreies, cedenèles che fèsc da guant e de gregn anìe dintorn al col. Chesta jent vif te picoi paìjes, coltivea so ris e de bela verdures e somea stèr belebon ence se naturalmenter i vif co la lum del soreie e i laora dut a man.
L’India l’é l Paìsc di contrasć anter antich e modern, anter zità e campagna, anter jent che rejona passa 2000 dialec e 30 lengac ( de chisc 22 é lengac ofizièi e recognosciui) e che à padì ultimamenter ence tensions e atentac anter etnies e gropes religiousc.
La spiritualità caraterisea chesta popolazions e sia desvaliva sorts de religions olache apede l 75% de induisć troon muslims, budisć, sikh, cristiegn, gianisć e animisć con apede de autra branches de religions mendres e gurus che ne deida a aer n chèder de la complessità de chest Paìsc olache storia e tradizion vif adum te n present ferùscol e dinamich.
N viac che à soscedà emozions e curiosità, descorides ma ence cruzies e besegn de pussèr.

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>

Lorem ipsum dolor sit amet, consectetur adipiscing elit. Aenean tincidunt sapien lectus, at vulputate orci malesuada