Pruma
La cognada
L'era femena che vivea soula e che no luraa e che no aea stala, pré e nience la più pìcola penscion. La fajea struves te le ciase ma semper per nia. La didaa fora i malé e la fajea soraldut “punture”. Beleche a la fin de soa vita zachei ge aea domanà coche l'aea fat a viver, enscioma coche la se compraa chel mingol de pan e café, chel tant che ge aea permetù de soraviver. “E' na cognada – l'aea contà - che cognosce e veide pech assà, che l'à n refuge de chiovìa, e che ogni meis, da na vita encà, la me mana per posta i scioldi per viver”.

Seconda
L boteghier
N tal l'aea na boteiga olache duc jia a comprar e fajea notar su, da d'aisciuda fin d'uton, canche do che i era stac bogn de se vener na vacia o n vedel, i podea jir a paar su le debite. Chest om l'era semper stat valent tan che te paisc i dijea che duta soa generazion no aessa mai abù besegn de scioldi vedù l benefator che i aea te ciasa. A la fin de soa vita, na bela di de setember, malà e rencurà da chi de ciasa, l'om l'aea dit de aer na volontà: l se à fat portar l liber del credit e l lo à fat brujar te fregolar. Chel an nesciugn te paisc à cognù paar debite.