Elizabeth von Arnim (pseudonim de Mary Annette Beauchamp) la scrivea tel 1936 n liber autobiografich pean demez dai cians che ela l’aea abù te soa vita. L liber “All the dogs of my life” (per talian: “I cani della mia vita”) l’é belot e gustegol, desche perauter duc i libres de chesta scritora nasciuda en Australia del 1866 e maridada con un nobol todesch de la Pomerania, post olache Elizabeth l’à vivù per n bel trat de soa vita. Anter l’auter, Elizabeth l’era la jermana de n’autra brava scritora: Katherine Mansfield.
A ogni maniera, l liber “All dogs…” l fasc pissar al raport che se à co le bestie, a mi, a chel mie coi giac.
Da beza no podee star zenza giac e volee demò chi de raza “siamese”: chi bienc e grijes con i eies brugn e l peil curt. Per l fat che stajeane enlongia ju stradon e che sot ciasa aane na sia, no ve dìe, pere cosc, che fin che i fajea. Mia mare, valenta, la troaa semper le parole e l temp per me dir che l giat no fosse più ruà a ciasa. Mingol restae mal, ma sobito do manae mie pare a me ne tor n auter fora Ciavaleis.
Mie giac se à semper chiamà Lili. Te ciasa aane l’usanza de ge dar semper l medemo inom, ence al cian che l’era, enveze, Drago. Ence se no l voi pissar, crese de ge aer fat dededut a chele pere Lili. Per egn é abù le man da sanch a forza de sgrafade. Trop no me recorde per fortuna ma é enveze la desfortuna de me recordar l destin de doi giatolins nasciui te mie let.
Da zeche ora la Lili del moment, na giata feruscola e bela, che la dormia semper con me (nience da dir che a la toxoplasmosi gio son positiva), la era enjignada per partorir. Canche l’é stat ora, via per la not, la giata l’à li à fac. Gio, che dormie desche n ciuch, enlouta desche ades, no capìe che che l’era chela roba mola e molejina sun mie let, e zenza me n’ascorjer la trajee jabas. La giata la portaa i giatolins sun let e gio i trajee ju. Bon, la di do dadoman, che marevea! I picoi de giac apede me, che bel! Che emozion! Ere contenta desche na Pasca!
(Ades recognosce l’eleganza che à le giate a partorir. Aede amò vedù? Le giate le fasc dut, tel chiet, e dapò le neta su dut, no resta na macia che n sie una).
Chisc doi giatolins crescea pian pian e canche l’é stat ora i à scomenzà a jir. Demò che i jia soul con le ciate tedant, ajache l toch vindò del corp l’era leis. Le ciate vindò l’era doi lapisc, dures e drec. Chisc doi giatolins i era gustegoi fora de mesura, i corea inant e indò, ite e fora de coridor desche mac. Mingol per l picol e mingol per l defet, i ge piajea a duc, ence a mie sores e frades che crese che i giac i li aesse soporté demò percheche i me volea ben.
No i ge dajea festidech a nesciugn, se no che a na femena che ruaa te noscia ciasa e che canche la i à vedui l’à i à condané (amò me domane che che i ge aea fat). La é stata bona de ge la contar su a mia mare e la se à tout i giac. Sé che la i à metui te na sportola de plastica e la i à trac te Veisc. Aesse preferì, te la pecia ciarità, che la i aesse arneé te festil, descheche se fajea e amò inchecondì zachei fasc. Canta a mi, da enlouta vive col recor de aer copà doi oute chi doi giatolins! La pruma canche ge é roinà l jir e la seconda canche é permetù a chela femena de se i portar demez.

Ades, con bec te ciasa, é danef giac. No i me piasc più coscita tant. Fosc no é più chel besen de dar afet e amor che aee da picola, roba che veide enveze te mie fie, che le se taca al giat desche a na persona. Desche zacan, ence ades, i giac va e vegn: un à troà n’autra ciasa, un belot chécen che ruaa cà da Rina i me lo à bogà via, de chel me à semper endespiajù, n auter l ne lo à copà la faina o la bolp. E no aon più l’usanza de ge dar l medemo inom. Vigne giat l’à l sie e crese che sie giust coscita.
Te chest moment aon doi giac: Nando e Ronnie. Chest ultim l’é ruà no adinfal, con n jech pech diplomatich de mia fia più picola che la l’à portà a ciasa de trei setemane, te na scatola de i bombi. Picol, chécen e belotiscim (chel de la foto cassù). Co fajaane a ge dir de no? Me n’é ascort sobito che l’era zeche che no jia te chele ame vindò. E sobito, l pensier a chi doi giac… eco, na, la maledizion de i giac leisc! Ronnie l’à l fil da la schena che no l’é san deldut. No l’à mia le ciate leise, per fortuna, ma zeche che no ge permet de sutar jabas desche duc i giat; la schena no se dreza (o no se mef assà) e Ronnie sauta ju desche n salam (e no l’é demò per dir).

Saede ben, i giac vigni tant i piscia stroz e gio n’é assà da far che no lavar fora a do a do lenzei e madroc. Donca, canche i me la combina, l giat l sgola. Sé ben, no dojesse, ma la ira la é grana. Verje l’usc de ciasa da fech e i fae sgolar jubas (stae ite dret, l saut no l’é gran).
(Perauter, l giat, canche l sgola, no él bel da veder? No fàjel gola chel perfet se dejoujer?)
Canche i rua ju, i se outa e i me varda. A mi me sà che i giac capesce dut.
Ronnie inché bonora l me l’à indò fata. L’à piscià te let. De solit, no l fae sgolar perché l me fasc pecià e a la fin crese semper de cogner paar l pegn de chi doi giatolins con le ciate leise morc do Veisc.
Inché Ronnie enveze l’à cognù sgolar, gio ere massa ennirada, ma l’à sgolà bele pech. L’é ruà ju col mus, chel pere cos.
L me à vardà, gio é capì, a dir l ver, s’aon capì. Ronnie no l sgola e no l sgolarà mai.