Maddalena Dellantonio la vegn al mond te na ciasa de Moena ai 10 de messal del 1882.
So pare l’é Domenico Dellantonio e soa mare l’é Marianna Defrancesco. L’à n fra, Zerilo, che l deventà cognosciù desche ziplador e desche chel che à metù su la scola d’èrt a Moena.
Cognoscion pech, pecià, de la vita de Maria Maddalena. Saon che la va de convent e ai 28 de aost del 1918 la fasc la profescion solena.
Ge jir do a la vocazion ge dasc l met de studiar, roba che ela, amedit, no la se lascia sciampar. La se diplomea per l’ensegnament de matematica e storia per le scole de l’Imper, titol che no ge pel servir canche l raion passa a la Talia.
Coscita la se laureea a la Catolica de Milan e la se abilitea per l’ensegnament te le scuole mesane. Per 36 la é diretora de le Scole de aviament e tecniche de Bornech e per 12 egn la é superiora de so orden.
Beleche segur la seghita a studiar inant: la pascion per la nrescida e la scritura su l’èrt no la la arbandona, vedù che se troa scric academiches su èrt sacra de ele ence ntorn al 1930. Per la scola la scrif ence n liber de geografia.
Ai 5 de aost 1965 la ciapa la Medaa de or ai benemeric de la scola, de la cultura e de l’èrt. La mer ai 21 de marz 1980, co la bela età de 98 egn. De ela, fegura duta da nrescir (na bela idea per na tesi de laurea), aon troà n articol sul Maester Giovanni da Brunico che podede desciarear e lejer. N picol segn per la recordar.