“Na femena che à lurà a la posta a Pera desche postina l’é Irma Gabrielli (1901-1990). Irma “dal Bomboni” l’era na ela feruscola e de bon cher, si vita enjignégola e aventurousa la l’à menada enscin a Milan, Paris, Taranto, la rejonèa talian, todesch e franzous apede naturalmenter al ladin. Canche la é ruèda de outa a Pera, l’à tout su bolentiera l lurier de postina, n post segur che ge dajea l met de mantegnis sia familia. Con sia roda la cognea portèr la posta a Pera, Poza, Mazin e Muncion e valch outa la se tolea dò ence sia fia Luciana che la se recorda amò chela net de Nadèl canche ja sonèa Maitn ma eles era amò sal Piz a Poza e ela era cruzièda de no ruèr a cèsa per l Bambin.

Irma era na ela segura e indipendenta che telpai a chest mestier la era cognosciuda e ben voluda da duc. A si fia e si genitores no la ge à mai fat mencèr nia e, ence se la cognea stèr stroz co la post dut l dì, la enjignèa dut per si familia.

Femena dal spirit avert, dò esser stata stroz per l mond la fajea bolintiera la postina e di paìjes la cognoscea vigni cianton”.

(da l'articol de Anna Mazzel su eles e lurier tel publich, gana24)


“Irma la se prejentaa con la mondura firmada PT (!): corpet, brae e ciapel sul ciaf. La portaa ciuzogn per se far strada canche la neif vegnìa ju zenza rumor ma fita e tocia e enlouta la se regolaa con na mantela pesoca acioche la neif no la bagnasse l bolgon pien de biliec de “Bone Feste”.

Me piasc pissar ades che ela l’aesse sapù tanta legreza de cher che la dajea fora. N pensier, n salut douc, n augurie, vegn semper prezious al cher de chi che l lo ciapaa. De ela, rechia, é n recort de na persona algegra e gustegola, piena de pascion per sie lurier che ge dajea l met de se arvejinar e cognoscer le familie de paìsc”.

(da l'articol de Marisa Bosin, gana24)