Chesta l’é na pìcola contìa che vegn da la region de Atacama, n Cile, n raion anterite la monts Andines e la monts de la Costa. Valèdes loghèdes sui 5 mile metri con la spiza più auta del Cile, l’Ojos del Salado che l rua a beleche 7 mile metri. Desche semper canche se trata de contìes popolères, se à n grumon de verscion, chiò per ladin una curta, e vejin, per spagnol, n’autra amò più bela contèda da Lisseth Paola Chambi. A chesta jent de chest raion ge vegn dit jent “atacameña”. L’é più che auter pèstres che vigne di da doman i va sun sia pastura a vejolèr sia besties, soraldut ciaures e feides. Anter chesta jent l’era na tousa pèstra che jia semper a pèst. N condor l la vedea duc i dis e l se aea ennamorà. Na bela di da doman, la pèstra la vegn adorbèda dal condor che l la mprejonea te na torn.
Vigne di l ge porta cèrn cruva che la pèstra se refuda de magnèr. Na di passa alò na bolp e la pèstra la ge disc de jir a chierir sie fra che l’era de viac e che l ge dijesse di jir a la librèr. La bolp la va, la troa l fra de la pèstra e chest l’é bon de la portèr demez da la torn. La pèstra la se scogn te na ìtena segura. L condor dèsc fora da mat, l met man a sgolèr tel ciel vaan lègremes de sanch e sal. Candenò la pèstra vegn fora da sia ìtena, e che sozedel? La se à mudà te n beliscim condor! e la ge va encontra sgolan a sie amà condor.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>

dessegn de Elisabeth Vinati