Se trèr ite n guant da zacan l'é n impegn e na responsabilità; no l'é n guant desche duc i etres, l'é n guant con na storia che cognessa esser la medema de chel o chela che la se l tira ite;-

Descheche aldidanché canche jon regolé con n guant anonim e modern fajon na desferenzia anter n guant e l'auter, anter na ocajion e l'autra e anter na sajon e l'autra, ence l guant da zacan perveit la verscion da la festes, chela da mesa festa, da diselaor, da d'istà, da d'invern.
Soraldut, no se va regolé col guant da zacan ai 15 d'aost desche ai 15 de dezember, sessaben.

Ogne guant da zacan sun chest mond te sie toc l spieia l clima del post a chel che l se referesc- Per l Sari indian no l'é pervedù n paletó o n mantel da portèr soravia, ma per i guanc da zacan tiroleisc, e ence per chel fascian l'é l colet da fascèna, l corpetin o/e scial de tibet da portèr soraite, per se corir, per se parèr dal freit.
No se va più in mègnes, ma col guant da d'uton o da d 'invern, da la seconda domegna de otober finamai a Corp de Crist.

L corpetin, l'é n colet strent, studià aldó percheche no passe nience n fil de aria- l'é mìngol incómper timpruma, ma dapodó canche se é strentes ite, se stèsc bela dretes ajache l'é desche n bust; l corpetin classich l'é chel neigher, ma n'é ence de de etres colores-
n'é de bie, ve, de roègn, de verc, de bruns de café;
L bel l'é che n'é de desvalives peisc, chest vel dir che n'é de mesalèna, n'é de lèna lijiera, de più pesoca, de loden, ma ence de satin de seida e de velù!

L colet da mesafesta l'é n colet più lèrch, per la maora l'é neigher con passamans neighres de velù; l'é manco ciaut che l corpetin e no l'é scì da festes;
L scial de tibet l'é n gran scial de lèna bona, neigher e con de gran paneles de lèna, se l porta soravia l colet neigher o soraju la ciameija;
l spenserle l'é n fianel de lèna neigher o roan se l met ence con n guant da diselaor , no l tegn n muie ciaut, ma per d'uton l va benon.

la eles da la Val de sot usa no corir l corpetin
cheles da la Val de sora (da Mazin in ite) se les vel, les pel corir l corpetin e donca portèr sorajù corpetin:

-n fazolet de velù recamà (n muie elegant) café o neigher
-n fazolet de lèna da fiores de n color che passenasse col gramiel (te chest cajo miec se de lèna o lèna e seida)
-n gran scial recamà e lurà a fil de lèna dit scial o sciaudaènema

Gé purampó ve conseie se podede e se ède n bel corpetin da color, de l portèr ogne tant ence demó soul, zenza nia sorajù.-
La fascèna no porta neguna capa col guant a la fascèna e l ciapel demó da la gran festes e demó per “decorazion”, no per se tegnir ciauda-
Te la mans podede inveze ve fèr n pé de manins e ve tor l maneghin (manicotto in pelliccia)

Autora

Claudia Conta
colaboradora

CLAUDIA DORIGOTTI (alias CLAUDIA CONTA)

Mie inom l'é Claudia, i ladins me cognosc desche Claudia Conta, ajache me sà bel durèr mie sorainom de familia ladina per me fèr cognoscer. Per me l'é doventà n inom, n marchie e mia identificazion. Da passa 20 egn laore con e per l ladin e la cultura a 360 degrees. Per me l'é n besegn, n piajer, na pascion fona, tant fona che zenza no son bona de stèr. ... >>