La fadìa de passèr fora un desert de perons, con tel cher e tel cef n dejiderie prezis che, ogne outa che l troa n empediment, no l fèsc auter che crescer e se smaorèr empede se desfantèr. Chesta no l’é pa bele na rafegurazion fokloristica, ma chel che g’é sozedù dalbon a na tousa joena che, pontan demez da posizions seguramenter desvantajèdes e paan bon cèr de persona, la é stata bona de ruèr a sie obietif: Helen Schüngel Strautmann.
Helen Schüngel la é nasciuda ai 5 de mé del 1940 a Sèn Gal, pruma de cinch fies. Per via del lurier de sie père la familia à cognù tramudèr sacotanta outes fora per i ciantons de la Svizera, ma dut chest l’à joà per miorèr la capazitèdes linguistiches de la beza dant, e de la tousa dò, e ence per se orir envers ambients e amizizies desvalives.
Bele prest i ensegnanc se n’à adat de sia enteligenza e si dejiderie de saer; purampò, vedù che la vegnìa da na familia che no podea trop, Helen no à podù jir a scola al Ginajie e dò al Lizeo che ge aessa orì i ujes per l’Università; alincontra l’à cognù se encontentèr de jir te na scola tecnica per secretères de azienda che, perauter, tel jir inant de sia vita, la se aessa palesà zis ùtola.
Fenì de studièr ge volea se chierir n lurier, endèna che te la joena doventèa scialdi più fort l dejiderie de poder studièr la Bibia e Teologia. Coscita scomenzèa a se palesèr te sia vita la gran costion: lurèr o studièr?
Conscidrà perauter la gran volontà, l bon cef e la capazità de tegnir fora duta la fadìes, dut à troà na soluzion: Helen l’à lurà sfadian e sfadian l’à seghità a studièr.
Demò che la materies che ela aea cerdù fora, enlouta les vegnìa ensegnèdes demò da omegn, e ence i students l’era dut omegn...
No l’era pa nience da pissèr, chi egn, che na tousa catolica se n arloasse sun n percors de studies de chela sort: recordon ence che la Costituzion Unigenitus Dei Filius (1713) ge descomanèa a la femenes de lejer la Bibia.... Purampò, a la fin del 1999, te la Facoltà de Teologia Catolica de Graz, te l’Austria, l 40% di studenc l’era femenes e, te sie Dizionèr de la Teologia feminista del 19911, Helen Schüngel-Straumann la met dant cinch possibilitèdes tipiches del XX centené che remarchea l raport anter la femenes e la Bibia.
La enrescida storica de Adriana Valerio e de la équipe de studiousc reta da ela, la desmostra zenza dubies che la traditio esegetica de la femenes la é en esser da veiamenter en ca, dessema co la reijes del pensier critich.
Da storica coscienzousa e documentèda, descheche l’à tras desmostrà de esser, Adriana Valerio l’à dit che la femenes “enceben che la storia religiousa à abù scenères entorcolé e tras en mudament, les à cognù per forza se relazionèr co la Schertures e con sia interpretazion; da spes per fèr i medemi percorsc, vèlch outa per troèr fora interpretazions “autres”, no da chièr per ge dèr de contra”. N percors che va da la Bibia a la femenes, ma ence da la femenes a la Bibia.
Chest tant sozet aldidanché, ma enlouta la joena pioniera la jia inant a struves te la mozes culturèles che l’aea dintornvìa; aboncont Helen la é ruèda a fèr chel che la volea: del 1960 l’à tacà a studièr Teologia a Tübingen e dapò l’à passà n an a Paris a l’Institut Catholique, stajan de cèsa te n sotcuert zenza impiant da l’èga e da se sciudèr...
Duc chisc empediments no à pa fat auter che la fèr jir inant bela dreta enscin a sie obietif: del 1969, pruma laica, l’à peà l Diplom teologich a Bonn en Teologia Catolica e Veie Testament.
Sia peregrinatio studiorum zacan la era fenida. Ma per Helen tachèa n autra peregrinazion, fosc amò più senestra, anter desvaliva scoles e corsc de spezialisazion per se vadagnèr da viver e poder coscita jir inant con sia enrescides.
Se fèr ite ti ambients academics de la Germania olache la stajea l’é stat na fadìa: ge à volù n gran coraje e ela à cognù seghitèr a meter dant n nef ruol feminin che, perauter, l’era pa deldut a l’auteza de chel di dozents omegn. Purampò la vegnìa vardèda con sospet, enceben che sia enrescides stampèdes les rejonèa enstesses e si arlieves i era enjigné e ascorc.
Zacan Helen à podù jir ite te la Scola de Auta Spezialisazion Pedagogica a Bonn e dapò a l’Università de Köln.
Tachèa a se envièr via ence, di egn ’70, l gran enteres per na teologia feminista o de la femenes, che aessa tout ite ence la neva generazion de teologhes femenes te n dialogh strent e fon co la Gejia.
Aboncont l troi scientifich l’era stat orì, zenza didaments...
L’era na enrescida spezialistica che tolea ite l’enteres envers l lengaz ebraich, la trasmiscion de la Schertures, la comprenjion del messaje e la descorida che la storia de la femenes de la Bibia, veduda da na femena, la metea al luster robes neves e la sporjea n nef scomenz per entener la storia de la femenes daldidanché.
La femena cristièna aea serà, e no orì te dant a ela n orizont biblich. Co se podéel pa l’orir o l sforzèr ite? La femena, canche l’à ciapà sù la preparazion scientifica che ge serf, no pélela rejonèr de la Parola de Die?
La “picola svizera” l’à metù coscita per strèda n event storich de gran emportanza, ajache l’à rebaltà posizions en esser da centenees en ca.
Femena moderna ma tel medemo temp respetousa de sia funzion de femena e de mère, Helen la se à scialdi moet sun de più fronts, i tegnan duc sot control: fajan enrescides, ensegnan, metan sora da magnèr per sia familia, educan si fies e... se n duran percheche i la tegnìa fora da la strutura ofizièla.
Zacan, del 1987 (!) l’à ciapà la encèria de ensegnament de Teologia Biblica te Scola de Spezialisazion de Kassel, te la Università del Hesse.
La sfumadura per lejer l’agetif “feminista” no fèsc referiment a posizions politiches o a afermazions soziologiches: vel demò esser l’esprescion de la letura esegetica e de la cognoscenza rigorousa a livel scientifich de la Parola de Die da pèrt de la femenes che se sent chiamèdes a fèr chest tant, e de coche la eles se sproa a pissèr a na vida autonoma, zenza azetèr ruoi declaratamenter mendres e destiné per tradizion a la femena te n mond universitèr dominà da omegn.
La enrescides de teologia feminista, dai egn ’80 en ca, se à sparpagnà fora te la Germania, Austria e Svizera: l’é stat metù sù sozietèdes e unions che se à dat jù co la enrescida scientifica tel ciamp teologich, soraldut la ESWTR, European Society of Women in Theological Research, de chela che Helen Schüngel l’é stat la presidenta dal 1995 al 1997.
L’argument de l’esegesi feminista l soscedea amò anchecondì, dò beleche cincant’egn, n muie de dubies e fosc ence dejèje, desche se fossa na sort de “resserva de ciacia” olache pel ite demò zachei.
Ma ades l mudament di tempes dèsc l met de dir fora che la enrescida biblica de la femenes – recordon per ejempie, Elisabeth Schüssler Fiorenza, Luise Schottroff, Silvia Schroer, Marie-Theres Wacker – scomenzèda acà cent egn, l’à perpeà e portà a de bogn ejic. Duc se n adèsc de chesta enrescides, fates con braùra magisterièla che arsegurea la valuta del lurier e de la comunicazion, ence canche no se é daldut a una con si ejic e con sia proponetes.
Purampò chisc egn de struscies à ciapà sù l’inom de “cent egn de solentum”, te chi che la femenes de desvalives continenc à proà – e tropa outes les é states bones – de jir ite fin tel cher de chela Bibia che l Creator à orì fora per duc doi: om e femena, descheche se lec te la Genesi.
Chi che lec l’autobiografia de Helen Schlüngel à la sensazion viva che chel che no se podea fèr l’é doventà da poder fèr, de gra a na volontà zis forta e a na spenta che se viventea de spirit e, tel medemo temp, de seit culturèla.


ladin de Luciana Detomas

HELEN SCHÜNGEL-STRAUMANN Meine Wege und Umwege. Eine feministische Theologin unterwegs, Autobiographie Ferdinand Schöningh, Paderborn 2011.

Autora

Cristiana Dobner
Collaboratrice

Sono nata a Trieste e dopo aver concluso gli studi sono entrata nell'ordine del Carmelo. Ora vivo nel convento di Concenedo di Barzio, vicino a Lecco. Oltre a vivere la sororità di questo convento, faccio ricerca filosofica e teologica, soprattutto in un'ottica femminile.

Son nasciuda a Trieste e dò aer fenì de studièr son jita monia te l'orden del Carmelo. Ades son tel monaster de Concenedo de Barzio, vejin a Lecco. Apede viver la vita de soranza te chest convent, me dae ju con enrescides filosofiches e teologiches, soraldut vedudes da la pèrt de la fèmenes.