„Heart of Ice“, cuer de dlacia, nsci l titul de n bal zënza mujiga te chël che l’unica meludia che acumpaniea la balarina Anastasia Kostner ie la fueres ntëurvia, l publich che se muev, l chiet. “L ie la reprejentazion de n post ulache l rënia la cundizions plu estremes, vester iló ie per la persona na situazion fetra. La ne sà nia cie che l suzed, ma la muessa for jì inant y inant”, me spiega Anastasia ntan che la me mostra l video sun si computer. Ti cialan ala balarina che da sëula se muev te na maniera stravaganta sun n gran palch blanch y uet me sënti mpue cunturbeda: Cie suzed pa tlo? Cie ie pa chësc? L ie l bal cuntemporann, n’ert contemporanea che uel capì cie che ie l corp, cie che ie l muvimënt. “L ie na esprescion dla cultura d’aldidancuei, chël che nëus penson ie defati ënghe mustrà tla maniera coche tenion l corp", da coche la jëuna Anastasia me conta, me ntëndi che l ie zeche deplù che mé n bal o muvimënc ora dl normal, l ie n senificat plu sot te chël che l vën reprejentà: “L’ert ie tlo per ti dé zeche ala jënt, na ispirazion, na perspetiva sun la vita”.

Anastasia me mostra n auter video, tlo balela sun la mujiga de Bach: “L ie la storia de zachei che nasc, tl prim iel sciche na planta o n tier che ne sà mo nia co se muever y bel plan devëntel na persona che à ngrum de sentimënc. Tla terza pert dl bal resta mé plu l’anima”.

Chersciuda su a Urtijëi se à Anastasia Kostner cris ora chësta streda mpue particulera, dantaldut sce n pënsa che te dut Südtirol possen belau cumpedé sun doi mans chëi che lëura sciche balarins. La jëuna ulova capì cie che uel dì se muever, udëi cie che n possa fé cun l corp. Do n bachelor de bal cuntemporann a Linz ala studià “community dance” tl cunesciù conservatorium de bal y mujiga “Laban” a London y fat n master de bal a Frankfurt. Ntan l stude de “community dance” vëniel de regula mparà coche n possa balé cun pitli mutons, cun jënt de tëmp o cun jënt che à n handicap. Ma Anastasia semiova destineda a zeche de auter; te chësc tëmp a London ala scumencià a balé pro cumpanies y sun festivals cunescian nce coreografs de livel nternaziunel. Nsci iela unida a s’l dé che ëila à tëut la dezijion de fé chësc sciche lëur: ëila uel śën balé.

Autora

Elisabeth Kostner
Culaboradeura

Elisabeth Kostner viv a Urtijëi, lëura a Bulsan y scrij tl bus. Canche la ne à nia da sauté tlo o ilo, po’ se godela i pitli mumënc dla vita: se suië i ciavëi do avëi fat bani, liejer na zaita sota n bel surëdl, se lavé ju i piesc te ruf do n di samont, striuné n rì sun l mus di autri y druché dassënn la persones... >>

Foto de Christian Bukert