Che bel che fossa se tedant a cruzies o problemes de relazions, de scioldi, sanità o auter ruassa adalèrch Joséphine, ange gardien!
Bonamenter no duc cree ti agnoi e no duc cognosc Josephine ange gardien, na serie TV olache na picola ela, Joséphine Delamarre, é n agnol che dal ciel rua su la Tera. Con si fin entuit psicologich, si capazità de spervader e si poderes magics la é bona de didèr duc chi che à cruzies o problemes. E dò dotrei ciampilotes e momenc de aut e bas dut se comeda ite al miec.

L’atora Mimie Mathy che interpretèa Joséphine, à l’acondroplasia e é grana demò 132 zm. Si simpatìa e spirit feruscol l’à didèda a viver la vita con gregn ensomesc olache, la disc, ge vel dant deldut se azetèr per coche se é. Per chest, se ben che la sibie morchia, l’à se à avert n troi tel ciamp teatral e televisif dajan vita a n personaje ben volù da tropes. Nasciuda tel 1957 a Lion te la Franzia a 22 egn la fesc pèrt del Victorine Studios e la studia teater olache con Michèle Bernier e Isabelle de Botton met adum n trio comich de eles. Dò desvaliva esperienzes de teater la scomenza a lurèr per vèlch film e dal 1997 la scomenza a lurèr per la lingia TV „Joséphine, ange gardien“ per TF1 olache la vegn cognosciuda dal gran publich franzous. La serie TV la é passèda ence dal Belgio su La Une, te la Svizra su RTS Un e la RSI La 1, en Catalogna su TV3 e en Québec su Series+. Da vèlch an en cà la lingia TV é vegnuda touta su ence da la TV talièna La7 con belebogn ejic ence se valgugn disc che l’é zeche per bec…. Viapura, fosc é ence vera che dut é mìngol scempie ma ampò Joséphine met la bona luna e chest l’é jà zeche.

La stories é spieie de la realtà e se dejouc mìngol dutes a la medema maniera: ela rua adalèrch fora de n bel nia olache l’é de besegn de didèr zachei e con si magìes, si gran capazità de entener l’ènema umèna, si esser bona de rejonèr con la besties, poder scutèr conversazions da lenc, ruèr e sparir fora de n bel nia la comeda ite vigni situazion.

Josephine é n icona de devertiment e positività, n apuntament che deida a esser più contenc e veder la vita a na vida più sorida….vèlch’outa bèsta dalbon pech acioche dut se comede! Chi fossa pa che no volessa l’aer apede vèlch’outa?

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>