Amsterdam dedichea a Marilyn Monroe na gran mostra en ocajion di 90 egn da la naa (1926). N gran batage per duta la zità che fèsc vegnir gola de jir a veder che che i conta e i moscia. Marilyn l’é na icona e fosc no se sà e no se se recorda nience più l perché, donca me peisse che jir de retorn su la pedies de chesta femena, fosc se pel capir zeche de più de la femenes n generèl de chel temp e chel che l’é vegnù do, del model feminil che vegnìa fora te chi tempes n America, del prozes de emanzipazion e inant, inant.
Del rest, l titol de la mostra l me fèsc zis gola: “90 Years Miss Monroe: Reflecting on a Female Icon”. Me peisse che pel esser na ocajion per vèlch pensier nef o idea neva.
Nia de dut chest. La mostra n sé la ben belota, i guanc che Marilyn l’aea metù te i desvalives film, ei, ence chel bianch plissetà che sgola co l’aria che vegn su da n tombin de la metropolitana, o chi doré te servjies fotografiches o chi de sia vita de vigne di – la brèa a pie de paulet biencia e foscia a zigaret e la maia neigra con l col aut; dapò la plus de canche Arthur Miller aea dat l’anunzie del matrimone con ela e autra massaria, soraldut guanc da bal e da festa che la metea te la gran ocajions.
Dapò i video recorda i film che ela l’à fat, entriesc e a tochec. Con i placac de si paroles restèdes te la storia (chela del parfum Chanel n. 5, sora dutes) la eles che vijitea la mostra se fèsc fèr na foto. Dapò amò documents, fotografies, e picolezes che fèsc recordèr che Marilyn l’aea vivù desche dutes nos.
Na reflescion sun si esser e sia storia desche femena che à volù se jièr la vita da ela fora da scines bele fates da autra eles, jièr si vita con duta la chèrtes che ela aea capì de aer a dispojizion (soraldut n bel corp e l don de piajer), chesta reflescion no la é. Fosse stat bel lejer zeche n cont de si pensieres, de coche la cernea fora de e te sia vita, de coche la se metea tedant al mond del cinema (mascolin fin junsom), apontin chel che usèa la ela desche n oget e apontin olache ela la chierìa con duta se nstessa de se fèr fora e dèr al mond sia identità feminila (e no demò tres l corp).
Marilyn la era bela ma no demò. La piajea. Ai omegn soraldut ma ence a la eles. A chestes per la ledeza che la era stata bona de se tor, l proèr a viver da femena fin junsom con mile dubies e ence sacontanta contradizions. Fosc paassa la speisa studièr miec chesta icona che la podessa deventèr zeche de più che (soul) na icona de stil.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>