Maria Zambrano l’é na gran filosofa, una de la più granes e originèles del ‘900. Filosofa fora dai sistemes e da la normes che met en discuscion la tradizion filosofica de l’ozident. No l’é sorí contèr en curt n pensier coscita complicà, che dant de esser capí col cef l rua te l’ènema. Per ge ruèr apede ge vel defat se fèr l vet daìte e azetèr de esser mené dò troes che no aane mai vedú e cognosciù. Chel che rejona Zambrano l’é apontin n pensier che se tol fora da la astrazions serèdes te se entesses, per se scontrèr con la vita, l sentir, la pascion. Na filosofia per no perder la pietà, che la é filia de la vita, la cogn azetèr ence la ombrìes, l scur, la budeles, e esser cognoscenza ativa che pel alimentèr l’esistenza de l’om. La vita l’à debesen de esser en seghit trasformèda per poder nascer danef. La vita cogn saer ge jir dò a la veritèdes che é compagnèdes da la spervajion, ajache l’esser de la veritèdes no l stèsc tel vegnir cognosciudes ma tel vegnir azetèdes. L limit di sistemes filosofiches l’é apontin te l’aer pertendù na ogetività massa grana. Per ruèr a chest l’à cognù se destachèr da chel che l’era personal, da chel che l’era l saer de l’esperienza de vigne persona. La dicotomia vita-cognoscenza la porta a na vita arbandonèda a se entessa, zenza orizonc e l cher che se rebela: na cognoscenza desche biota forma astrata. A chest se arjonc l fat che inchecondì la cognoscenza aplichèda a la tecnica l’à portà a “na vita che se empienesc de maravees mecaniches endèna che l’ènema e l cher resta vec e la ores, librèdes da l’oprescion del lurier, les cor amò più druchèdes, ajache les é sotmetudes al vet aricégol de n temp mort”. Pel didèr l’esser uman a fèr chest percors chel che Zambrano ge disc vides, n gener leterèr e filosofich che poja si reijes te la tradizions orientèles, desché la Confescions, la Mediatazions, la Vides, che se domana n saer desvalif, l saer de l’esperienza. La Vida la se arvejina a na metoda che no se sorapéea a la vita, ma la nasc da chesta e la chier de tegnir adum la desperscion naturèla de la vita. La vita non la pel esser vivuda zenza na idea che lea adum, bona de ispirèr concretamenter l’azion: na idea donca nia astrata ma na idea che ge dèsc forma a la vita. Ajache la vita vera no la se pert fora per l bret e no la se confon te na poza de èga ceta, ma cogn “esser chela vita che é bona de passèr fora sie temp, de se mever con legreza tel temp, zenza esser sotmeduta a la robes, senza tremolèr desche i vegetèi o prejoniera desche la bestia, ma descedèda e ledia descheche cogn esser l’om.

Lec dut l'articol! Desciarea el pdf!