Do l tremot ne jiva tl Nepal plu nët nia, dij Buddhi Maya Sherpa. Maiadives y ega nëta ne fova tosc nia plu da garat, la vies de comunicazion y trasport taiedes via, i spediei straplëns. Dlonch iel debujën d’aiut.

La mëinacrëp y urganisadëura de trekkings Buddhi Maya Sherpa viv danter l Nepal y l’Austria. Tl mumënt messessela vester tl Nepal, sciche uni ann. Chëst ann ne iela pervia de si pitl mut per l prim iede nia juleda via. Y la ie cuntënta, ajache chi sà coche la ti jissa sën. Tl pitl luech de Zaroch, da ulache la vën’, ie la gran pert dla cëses desdrudes o nia plu abitables, nce la sia. Si oma y si surans viv per ntant te na tënda. Y l piec ie che la tiera ne lascia nia de zitré. Zarok – ulache l’oma y la surans de Buddhi Maya Sherpa mëina na pitla cësa per turisć, la Sunshine Lodge, ie nluegià mpue sëura Namche Bazar, l paesc, ulache duc chëi che fej spedizions sun l Mount Everest passa. L luech ie a 3500 m d’auteza, tl raion dl Solokhumbu.

gana: Co ti vala pa a ti familia?
Buddhi Maya Sherpa: I viv duc, per fertuna. Te nosc luech y te chëi ntëurvia se l’ài mo caveda, ënghe sce dut ie ruinà. Ie posse comuniché cun mi sor tres internet y telefonn. Chël ie bele truep. Duc ie sannynton. Nce nosta mutans y nosc mutons dl proiet de scolarisazion. L tremot à durà tan giut che i à abù dl’aurela de mucé ora dla cëses, chëles ne ie lavia nia autes, les à al plu un o doi partimënc, nce a Namche Bazar n’àles nia plu che cater partimënc. Duc se tëm mefun y sta tla tëndes, ajache i ne se nfida nia a jì tla cëses che manacia de tumé nsëuralauter. Tl ciamp de basa dl Mount Everest iel unit ju na grandiscima levina. Nce mi cunià y trëi de mi jurmans fova iló. Mi cunià ie judacrëp y l ie iló da dis a crì jënt y a recuperé morc. I ie finei. Nce sce pra l Mount Everest iesen usei cun catastrofes. L ann passà sciche sën fovel unit ju una levina y n chëla ucajion iel mort 16 sherpa. Cun la levina che ie unida ju chëst ann pervia dl tremot iel sën inò stat tan de ferii y morc. N ne sa nianca mo tanc. Y i sucorsc ie riei pervia dl stlet tëmp y pervia che i joleri ne possa nia for julé. I cialerà de recuperé duc – i vives y i morc – y de i purté tla valedes plu ala bassa. Po messeran cialé. Spedizions ne possen tl mumënt nia fé, ma chël ne ie śën nia l tema.

gana: Ciuni ie pa śën i majeri problems per la populazion?
Buddhi Maya Sherpa: La gran catastrofes ie suzedudes a Kathmandu y ti raions ulache fova l epizënter dl tremot, tl Langtang. Iló iel, coche te sés, truep morc, paejes ntieres desdrui defin, curìi da smueies y levines. L ne ie ie iló deguna lectrisc y degun’ega. La jënt adrova dut. I spediei ne ruva nia do a ti judé ala jënt, suvënz muessi operé la persones te tëndes dedora, ajache i manacia de tumé adum. L mancia medejines. Ti raions plu al’auta se n ie la persones mucedes ulache smueies y levines ne les arjonj nia. Les se juda y se sustën la unes cun l’autres. La cëses ie dutes ruinedes y tl mumënt ne san mo nia coche la dëssa jì inant. L ie na catastrofa. N sa che dut l raion ie sismich, ma veldadetel ne s’à aspità deguni.

gana: Cie adrova pa la jënt śën deplù?
Buddhi Maya Sherpa: Sën n iede adrovela la cosses de prim aiut: tëndes, chëutres, guant, maiadives, medejines, aiut saniter. Pona possen pensé ala recostruzion, al material da frabiché, a massaria. Per ntant ruva i aiuc dantaldut tla capitela, ma bel plan messeran nce pensé ai teritoresc plu desman. Ie nstëssa ei tl prim mpensà che messëssi vester iló, jì via y ti judé, fé zeche. Ma chël ne juëssa nia. L ie miec sté tlo y urganisé vel’ aiut. Nce per nosta mutans y nosc mutons. Ëiles nstësses se l’à caveda, ma n valguni de si peresc y parënc che laurova coche purtadëures o mëinacrëp ie ferii o morc. Tlo vala de cialé coche n possa judé l miec che la va.

gana:
De gra y dut l bon!
Buddhi Maya Sherpa: De gra a ti.

Ie é cunesciù Buddhi Maya Sherpa ti prim ani doimile fajan nrescides sun ëiles arpizadëres. Da ntlëuta sons cumpanies. Tl 2009 ovi nce bele scrit n articul sun ëila te gana (gana n. 8).
L raion dl Solokhumbu ne ie zenzauter nia l raion dl Nepal tucà deplù dal tremot. Purempò ie nce iló i danns scialdi granc y la persones stentedes. Perchël, sce ulëis fé na spendula per judé nosta mutans y nosc mutons tl cheder dl proiet de scolarisazion metù a jì dal Alpenverein sen tuchei dal tremot, ti fajeis na gran legrëza. Buddhi Maya Sherpa se cruzia persunalmënter che la spendules ruve ulache l ie de bujën.

Per spendules sun l cont bancher dl Alpenverein:

"Schulausbildung für Sherpamädchen"
Parola de recunescimënt "Erdbeben Nepal"
Raiffeisenkasse Bulsan, Filiale Plaza de chemun
IBAN: IT 33 G 08081 11605 000305003601
SWIFT-BIC: RZSBIT21503

Autora

Ingrid Runggaldier
Redadeura

Son de Urtijëi, é studià anglistica/americanistica y germanistica a Dispruch, de prufescion sons tradutëura (dantaldut tl ladin) y lëure tl Ufize Cuestions Linguistiches dla Provinzia autonoma de Bulsan. Ie me nteressei de cultura n generel, plu avisa de rujenedes, de leteratura, de “mendranzes” d’uni sort – da chëles linguistiches a chëles sozieles, religëuses y de pensier. Ti ultimi ... >>