−Tei, Mario, ne faste la sirena?
L paissaane ogne domegna. L podea ruar da pont ju, che l vegnìa fora da Mazin o da Pera ite, che l ruaa da retorn, mingol più sul tart. Semper de domegna, i autres dis no l podea fora.
Se chiamaane un co l’autra.

−Gei ju che fora Pera l’é Mariomat, sora n pech l rua.
−Vegnì su che Mariomat l’é sun pont.
−Mariomat l’é cajù! Moeve!
−Vegnì che l’é ju bas e l ne speta!

L’era n corer canche se spiaa l ciaf de Mario.
Canche l ruaa da fora Pera ite se l vedea da dalonc. Chel gran ciaf, mingol pelà e dotrei ciavei su dret, n prust da boschier, la maia de lana istà e invern e de mesa sajon, mai l corpet e nience na capa. I brac enlongia ju l corp, fosc mingol massa curc, l pas de chi che sà olà jir. Desche se l’aesse abù bel chiar tel ciaf olache l volea ruar. L jia con determinazion, zenza se vardar massa dintorn, do na strada che l’aea fat centené de oute.
Gio no sé se Mario l’era nasciù san l se aea malà do o se l’era nasciù mingol puret e nisciugn l’era stat bon del curar o se nesciugn à volù l curar o se so mare no la se à entopà del far curar o se enveze l’é deventà coscita do, sul crescer, magari da valch fiora sbregada fora, fora de n bel nia, che te na not à fat l dan e dapò bon. Gio no sé coche la é jita. A dir la verità da picola no me l’é mai domanà.

A mi Mario no l me à mai fat paura e crese a nesciugn de autres. Per duc noi l’era Mariomat, l mat l se aea tacà a si inom e no l se à mai più destacà. Nience canche l’é mort.
−L’é mort Mariomat!
−Zacan! Pére cos!
−L’à fenì de padir!
−Pére Mariomat!

Per respet, sul mus, i gregn i lo chiamaa Mario ma se vedea che canche i ruaa alò da la ‘o’ i cognea beleche se zacar la lenga per no ge tacar ite l ‘mat’. I bec più pìcoi no i entenea nience che i ge dajea del mat, desche se i lo aesse batejà coscita. Mariomat. Rua chel pére Mariomat.
A Mario duc ge volea ben e fosc l’era manco mat de chel che cardaane.

−Tei, Mario, ne faste la sirena? Mario l se grignotaa. Fosc l’era n jech ence per el.
Crese che ge aesse ence piajù far chela sirena. Chela sirena! Che sàral mai stat per el? Saràl stat na sirena a l far jir fora de ciaf?
Canche sonaa la sirena dal mesdì de domegna, Drago, nosc cian, no l capìa più nia, l deventaa mat, l metea l nas n su e l sbraiaa deschè n louf acà milesc e milesc egn. Fenida che la era la sirena, Drago, nosc cian, l vegnia deretorn tel present e l’era danef nosc cian. Fosc Mario l’é jit fora de ciaf na outa con na sirena e no l’é mai vegnù de retorn. Pére Mario.

Mario l se grignotaa. −Scioldi, scioldi! –l dijea slizian un su per l’auter i doi deic di scioldi de la man dreta.
−A che doreste scioldi, Mario? −N bicer, n bicer…
−De che pa, Mario, n bicer, de che pa?
−Mmm mmm, aranciata, aranciata. Bona l’aranciata…

I ge volea ben a Mario, mingol duc, ence se i ge fajea far la sirena, ogne domegna, passa cent oute.
−Té i scioldi, té. Ades fane la sirena!

Mario l tiraa la bocia mingol da na man, i eies ge grignaa. L metea le man vindò la schena, l vardaa su per i monc, fosc envers chel che per el l’era so infinit. L tolea ite l’aria, l venter se slonfaa, la cassa di polmogn se verjea fora desche n gonfalon te na di de gran vent. Col menton en su, dant n moment de chiet e dapò la ousc, nience pa tant forta.

−uuuuuuuuuuuuuuuuuuu uuuuuuuuuuuuuuuuuuuu uuuuuuuuuuuuuuuuuuuuuuuuu uuuuuuuuuuuuuuu …

N scìgol lonch, sotil, taént.
Dapò l se grignotaa da nef e metea fora la man per ciapar si giust vadagn. Mario no l fajea la sirena se no l ciapaa i scioldi e l saea benon olache i lo aea embroià, setemane dant, meisc dant, egn dant. L saea adiment dut, nia no l desmentiaa. Alò segur no l’era mia più jit a domanar scioldi.
−Catif! Catif!
−Chi pa catif, Mario?
−Sirena, nia scioldi, nia scioldi! −Recorde gio, recorde dut gio.
Ades son segura che Mario ne cognoscea un per un, vis per vis, eies per eies. L se recordaa de ogne un, a noi no ne saea ma segur che l’era coscita. E canche l se grignotaa, se l podea ben capir. Ma noi eraane massa pìcoi e no l capiaane amò. Volaane demò chela sirena.

−Valent Mario, ades fage la sirena a chisc bec.
−Ei, ei, sirena, scioldi!
−Té, i scioldi emben, fane la sirena.

−uuuuuuuuuuuuuuuuuuu uuuuuuuuuuuuuuuuuuuu uuuuuuuuuuuuuuuuuuuuuuuuu uuuuuuuuuuuuuuu …

Na seida che segnaa l confin anter la matità da la sanità, da n vers e da l’auter. Anterite n vet, olache stajaane ite duc ensema, el e noi, zenza matità, zenza sanità.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>