“Fenì mie turnus, ogne dì, me sà de aer dat l mie!” Chesta l’é na bela parlèda che ge sente dir a Noemi Iori, na jona fémena da Dèlba, te Fascia, che un domarena sot la festes de Nadèl la me rejona de sie lurier indèna che defora vegn ju panec e la neif chieta chieta cour dut Cianacei sot sie mantel. L’é bel rejonèr de sanità con Noemi, l’é bel percheche l’à na ment averta e ge sà bel sie lurier, me dèsc l’idea, indèna che la me conta de sia vita da ogne dì te ospedèl che ence aló, dedant ai lec di malé, la sibie bona de ge tor la poura a sie pazienc. Noemi apede a esser mère e ciantarina ezelenta la é ence infermiera da 5 egn te ospedèl de Verona. Per fèr chest lurier aldidanché se cogn fèr la scola infermieristica universitèra, dapodó ge vel fèr aboncont n concors te ospedèl, me conta Noemi. N concors che ela l’à passà con suzess belapontin per l’ospedèl de Verona. Noemi rejona bolintiera de sie lurier che ge sà l più bel del mondo, enceben che no la nee che l’é n lurier dur, de responsaboltà e da stress. “ chel che me sà l più bel che dut de mie lurier l’é l contat uman e personèl coi pazienc, l fat che posse didèr i etres no demó desche hobby, ma desche lurier. Mie lurier me permet de didèr dassen i etres, de atif, dì per dì. L didament che sporje l’é psicologich, ma ence fisich, sanitèr, uman, ence spirituèl. Veide de ogne sort de gran miseries e pree bendeché per l benstèr de mie pazienc. Sozede ence vèlch miràcol ogne tant, che me fèsc creer che no dutcant l’é te la mans di dotores, del chirurgh. Chi dis canche sozede vèlch da bel, la vita me grigna canche min vaghe a cèsa.” Dant de doventèr mère, Noemi me conta che la lurèa te Prum Aiut de l’ospedèl de Verona e a mi sobitamenter me vegn tel cef E.R. la serie TV. Noemi se fèsc na gran gringèda e la me arsegura che de Clooney nun n’é, ve. A la dir duta la serie TV merichèna moscia n gran mugion de dotores, magari stressé, magari sfadié, ma aboncont n gran grum de personal. Ela confermea mie sospet; no demò a l’ospedèl de Busan l raion de prum aiut l’é in crisi, ence te l’ospedèl de Verona l’é chest tant de problem e jèghe che sibie coscita ence te duc i etres ospedèi de la Tèlia. Proe a me fèr dir da Noemi che fosc la veit l problem daldaìte, se la pel pissèr a vèlch rejon percheche l partiment de prum aiut l’é coscita mèl metù ti ospedèi. Me peisse a chest pont che la vértola che se cogne aer l patentin tel Südtirol sibie demò na vértola, ajache te de etres ospedèi somea che sibie bele medemo! Da n auter pont de veduda che chel mie da pazient/client e con n ege profescionèl la me disc che l’é prum de dut n problem de personal. L partiment de prum aiut l laora de net desche de di, aboncont sui 5 –6 dotores che l’é de dì, n’é demò doi de net e donca l’é lògica che se imboce dut cant, l’é massa pech personal per i pazienc che rua. Chest l’é ence pericolous, me disc Noemi, percheche i dotores che cogn lurèr sot na tèl prescion per coscita tanta ores, i pel ence se falèr, l’é uman e possìbol, stencé e sot a stress, sessaben che sozet. Che servije se ge dèjel al pazient se un cogn spetèr in media 10 ores al Prum Aiut dant de vegnir tout dant? Chest l’é frustrant ence per chi che laora desche infermieres o dotores. Dapodò, me disc Noemi, chel che se disc a dò a dò sui sfoes tel Trentin Südtirol che un bon 95% de la jent la vegn te Prum Aiut per rejons da nia, l’é vera ence per Verona. Chesta jent no la sà cotant che costa la ressorses e che nun n’é per semper, chesta jent la ge tol temp e ambulanzes a la jent che dassen n’èssa debesegn. A sentir Noemi me vegn tel cef la enrescida che é let instadì fata da n jornalist che se cruzia de sanità publica da egn: te sie liber l disc che la jent d’aldidanché, soraldut te zità, la é usèda a la malatìa desche status normal, vel dir che noscia sozietà la no se basa più sun co restèr segn, ma sun co curèr la malatìes: se no tin ès una, sin troa pa ben una! Aboncont se vèrda de alimentèr la paura de la malatìes! Noemi ades la laora te partiment de terapia intensiva, te rianimazion, ajache dò aer abù la beza la sin à adat che la no podea ruèr a cesa da sia fia stressèda coche la era dant. Chest lurier l’é pesoch da n pont de veduda uman, psicologich, ajache se à a che fèr con jent che la é anter la vita e la mort. Apede a se cruzièr di pazienc, la va ence te sala operatoria e la se cruzia che l pazient staghe ben indèna duta l’operazion. Noemi: “ ge vel esser asvelti ence chió, no l’é che ties aló a vener ciuzé, aboncont ades me cruzie a fon de dotrei pazienc a l’outa, ge fajon l’assistenza de basa e ence chela da n pont de veduda tecnich, di machinaries. Se me fale posse copèr na persona e chest me fèsc aer n gran respet de chel che son dó che faghe ogne dì. L bel de la terapia intensiva l’é che se laora in équipe, sion na squadra, infermieres e dotores adum e a mi veder l’é la maniera miora per lurèr te la sanità, te ogne partiment fossa ideal. Te rianimazion se rua a cognoscer l pazient a fon, vèlch outa se l compagna demò invers sia fin e ence chest no l’é mai vèlch da pech. Ge stèr da vejin a parents e al pazient, troèr la dreta paroles de confort, l’é vèlch che me fèsc crescer daìte ence me”. Bendeché i dotores no i é injigné al raport uman col pazient e aboncont la fémenes les é in generèl più braves che i omegn te chest. Cogne dir tantocant che vèlch fémena per fèr cariera la cree de cogner doventèr n dragon, la cree che ge vel doventèr piores che i omegn per jir inant; inveze esser n muie bravi de sia specialisazion e aer na bona gran umanità fossa chel che ge volessa te la sanità.” Claudia: “Che fèste tu canche te te troes dedant a la mort, te sozedarà ogne dì, me peisse”? Noemi: “Olache fenesc la scienza scomenza l divin: pree, pree ence se mie pazient l’é de n’autra religion che la mia”.

Autora

Claudia Conta
colaboradora

CLAUDIA DORIGOTTI (alias CLAUDIA CONTA)

Mie inom l'é Claudia, i ladins me cognosc desche Claudia Conta, ajache me sà bel durèr mie sorainom de familia ladina per me fèr cognoscer. Per me l'é doventà n inom, n marchie e mia identificazion. Da passa 20 egn laore con e per l ladin e la cultura a 360 degrees. Per me l'é n besegn, n piajer, na pascion fona, tant fona che zenza no son bona de stèr. ... >>