Femenes e crepes: I crepes de chi che resta: l’adort, che l’é la vita

Te chesta giornèdes da maravea, con n ciaut da fèr voa e n ciel brun che somea depent, vegn dassen da oujer i eies envers la crepes che l lonch istà da chest an te la Dolomites fèsc doventèr amò più encantèdes.

Mères e maerignes. Ogne crep, ogne spiz e parei ne fèsc vegnir tel cef ence l recort de chi che à rampeà e vivet chisc lesc te duta sia sajons, con chela pascion sci forta e totala che la crepes ge domana ai fies più amé. A l’alpinist, al menacrep, a l’istrutor desche al volontadif del socors sa mont. Stories de omegn con na soula pascion, che vif per chel misterious mond vertical che l’é la crepa, te duta sia fojes. Cavalieres zenza temp, encantesimé da chel mond olache la gran pèrt de la jent no pel apede, da chel che no se é bogn de se destachèr, cò se sent sie chiam misterious. A nos ne resta l recort che no se pel descancelèr de chel sie jir sù zenza se stencèr mai per chi adorc che se auza envers l ciel. Donca l’é sorì i troèr aló, canche se leva i eies sora chi spic o canche se scouta l cioscedèr de nesc vèresc sui troes da mont. L mond de crep rejona tras de ic, dutintorn, tel vent che ne porta sia arfièdes, te l’aria frescia che ne i fèsc sentir apede. Dapò japede, jun fon de val, te la majons sciudèdes ite dal soreie, olache va inant la vita da duc i dis, zeche bec ciga ferùscoi e l’é aló che se scontra chela femenes, protagonistes zenza voler, che laora e fèsc acort te chel temp cet e fosc zenza fin che l’é vegnù ca dò che si omegn é se n jic. Stories de femens soules, sora fora chela vita sa mont che les à leèdes a omegn che l’aea cerduda desche percors, co la gaissa da bec de descorir tras zeche da nef, de se mesurèr e de se donèr en socors ai etres: na vida per se fèr ite te n ambient che l’era pèrt de ic. Dapò l destin l’à passà la man, te chel jech de regoles descognosciudes che l’é la vita e che l’à obligà eles (mères, femenes, compagnes) a cogner jir su per chi adorc olache no se é mai enjigné assà. Cater femenes, che me fegure sentèdes jù japede nesc più bie crepes, che les se conta de l’adort olache la vita ge à comanà de jir sù, dò che la persones che les amèa é se n jites zenza avisèr. Rejonaron coscita de Walter Nones con Manuela, de Alex Dantone con Ottilia, sia doucia mère. De Erwin Riz con Mara, de Luca Prinoth con Daniela.

Amò dant de les scontrèr de persona, l’é stat la paroles de Anna Lauwaert, compagna de vita e de rampeèdes de Claudio Barbier, alpinist del Belgio de gran nonzech te la Dolomites, anter i maores rampeadores del ‘900, a orir chest percors de protagonistes feminines. A ela i ge à domanà che che l’à proà a restèr zenza l’om te chel che la se tegnìa ciolèda, zenza aer tema da nia. L dò-Claudio él stat più senester che na via sfadiégola? “Na, percheche ogne dì l’é n vèrech de na via sfadiégola che va inant duta la vita. L jir sa mont ensegna segur trop, ma la mort de Claudio me à ensegnà trop percheche no podea me sozeder nia da pior”. Manuela Nones la stèsc a Selva, te Gherdena, coi fies Patrik e Erik, dò che sie om Walter l’é se n jit ai 3 de otober del 2010, sul Cho Oyu. Co él stat chest an? “N temp cet, fat de recorc bie e forc, che dèsc forza. L’é linfa de vita per me, soraldut per crescer sù i bec soula e per jir inant dì per dì”. Te aésseste mai fegurà de ruèr su per na mont si senestra? “L’é na situazion che fèsc pèrt de te, canche te vives apede n alpinist, ma no ti es mai vertia. Con Walter n’aane rejonà trop dò che l’era mencià Karl Unterkircher, sie compagn te la spedizion al Nanga Parbat, ma per Walter l’era stat ence n’autra manconia, chela de sie pecont Erwin Maier, mort sul parei Nord de l’Eiger; chest gran dolor l’aea segnà n muie e l se domanèa se paèa amò la speisa de rampeèr a chel livel”. La proa più ria per te, l recort più dolorous? “La telefonèda che me anunzièa chel che ge era sozedù a Walter: canche é vedù l numer sul telefon é entenù de fata e mie temp se à fermà. Te vegn tel cef de de dut, fosse pontèda demez sobit per l saludèr l’ultima outa, ma l’era i bec e é cerdù de stèr con ic, no podee i lascèr soi. Ic ades l’é mia segureza, mie empegn da duc i dis, mie doman, ence per portèr inant l recort de sie père”. Co este pa mudèda? “Capesce che la vita la sciampa en prescia; l’é la picola robes che fèsc doventèr emportant ogne dì”. Demez da Gherdena, tel jir envers Fascia, su la outes che mena jù dal Jouf de Sela, i eies se ouc a la Val Lasties. L’é ló, anter chi crepes monumentèi endoucii dal vert di pré d’istà, che Ottilia Pescollderungg, la mère de Alex Dantone, l’à volù vegnir jù acà dotrei setemènes, dessema con en pecia de sia pecontes che desche ela à vivet anter chisc crepes moments de content e etrestenc de gran dolor. “L’era na bela dì da soreie – disc Ottilia – e é sentù che ge volea jir aló per forza, l’era n percors che cognee fèr, sion jites dutes adum e aon spartì noscia emozions entra de nos. N tòch en jù se aon sentà jù te n pra con de bela erba frescia a fèr marindel. L’era pien de picola steiles da mont e gé é pissà a nesc fenc, a la beleza de chel lech, che l’era empienì ite da sie douc recort”. Crepes e recordanzes pojèdes per semper anter chisc parees, desche la forza zenza fin che demò la femenes é bones de ge meter dant a n rie destin. Ottilia, nasciuda a Colfosch, ai 26 de dezember del 2009 te Val Lasties l’à perdù sie fi Alex, volontadif del Socors sa Mont de l’auta Fascia, e dò cinch meisc giusć ence sie om Osvaldo, portà demez da n mèl che no permet salvament. Che dolor él stat l vosc? “N bloch soul, granac. Nience tout ite l prum che l’é ruà sobit chel auter. Na cedena de evenc ries, n mont de padiment che no me à dat nience l temp per pissèr, ma che me à ensegnà n muie de robes, l capesce ades pian pian. É emparà n muie da Federica, la femena de mie fi. Ela l’é stat na lum per me, sia fé l’é na forza che la la enlumenea sun n troi che sfenissa jù chichemai”. Colun él l recort che ve lea a la manconia de Alex? “L’era les diesc da sera de chel 26 de dezember. L’é ruà chiò a cèsa mia nora coi bec e con Don Stefen, nosc preve. Timpruma é pissà a mia fia Federica, che la era tant che se n jita co l’auto, e dò i é sentui rejonèr con mie om, e el che no volea creer la più ria de la neves, chela che na levina aea ciapà ite Alex e si compagnes”. L recort più bel? “La noza de mie fi, l content de chi doi sposc, e la sera dant de la desgrazia, ai 25 de dezember, la sera di dons, de la beleza del Nadèl te familia, de la batudes de Alex con sia sor; dapò l rumor de si vèresc canche l ruèa chiò, che gé cognoscee fora de anter, e sie sfodeghèr te vedrina per chierir zeche da bon: ades sie fi Igor fèsc valif, canche l rua”.

Recordanzes douces, emozions che se palesea. Pecia cèses più en fora, dò la strèda che va envers Cianacei, ne speta Daniela Iori, compagna de duta la vita de Luca Prinoth e mère de Michael, chel bez dai eies vives, da la pel mingol scura che recorda trop chel père che l destin ge à lascià per sci pech temp. Daniela l’é na femena che se dèsc la mans dintorn e che te chest temp zenza Luca l’à cognù se sproèr de duc i vers: l “dò” de na vita da endrezèr via, n pop da crescer sù, l lurier, tant che no g’é restà beleche più nia temp per jir sa mont. “Chel l’era l mond de Luca – la disc – e enscin dant che nascesse nosc fi l’era ence mingol mie passatemp; ades no più”. Te aeeste mai pissà coche la fossa stata zenza Luca? “Na, mai! Me fegurèe Luca che doventèa veie e che vivea al lonch. Saee che sia vida de viver la crepes la era prudenta, l cognoscea inout l’ambient che l’aea dintornvìa, de chel che el enstes l’era pèrt”. L’ert più senester de chest viver zenza el? “Entener dì per dì che l mencia. Ades sé ence chel che l me à ensegnà: a esser scempies, ùmoi, sinzieres, a aprijièr la picola robes, a no se tachèr te chel che no serf. Per meisc a la longia é cherdù che l fossa vegnù de retorn da n moment a l’auter e fosc chela l’é stat mia vida de me parèr dal dolor. Ades é entenù che son soula, ence se é l confort de mie fi e de mia mère. E dò aer vivet sci al lonch con Luca – sion stac apede per 25 egn anter moments bie e manco bie, vèlch outa sù e jù apontin desche i spic de la crepes – ades duc i dis capesce che dut sarà desferent, ajache mia felizità la era con el”. Da Ciampedel desche Luca Prinoth l’era ence Erwin Riz che, apontin de gra a Luca, l se aea arvejinà con pascion e fèr dàtol a la crepa e che l destin à binà adum con sie pecont en chela net de dezember. Apede el, per nef egn, l’é stat Mara Dorich, che la spartìa con el ence la pascion del jir sa mont. A ela vegn spontan ge domanèr tant che se somea la fadìa de jir sù par n parei de crepa zis ert e engrà e chela del dolor per aer perdù l compagn de vita e de pascion per la crepes. “L’é na vejinanza da no creer anter na via senestra su la crepa e l stravert olache m’é troà canche l’é se n jit Erwin”, la ne disc. “Enlouta te pes demò fèr cont sun te enstessa e te domanèr co jir inant. Descheche sul crep, tel passaje più engrà, te tires fora duta la forza che te ès daìte per jir inant e no crodèr, coscita é cognù fèr enlouta. La ponta olache te rues l’é l passèr fora l dolor più gran che te aesses mai podù proèr, ma tu ti es a salvament, ti es viva, te ès passà fora chel stravert che raprejentea la mort”. L temp él più stat valif da enlouta? “Na. L’invern l’é la sajon che se l’à menà demez, ma a vèlch vida l’é passà, dò l’é vegnù l prum istà, che l’era l trionf de sia vida de viver i monc, e enlouta l me à mencià trop. Son scialdi ciolèda te sia corda, ma ades é emparà ence a jir soula, pian pian, passaje dò passaje. El dant l fajea la guida ence co me, semper”. Che él stat che te à dat forza? “Si amisc, sia gran pascion de jir sa mont che l’era ence la mia e i recorc, che l’é n tesor. Su per la crepes l troe endò: la vies che aon fat dessema, l soreie che crepa fora e che fior. Timpruma vaèe, ades i recorc dèsc felizità e coscita g’é sozedù ence a tropes de si amisc: aon fat nos robes che l’aessa fat el con nos e el l’era aló, a spartir con nos noscia crepes e sia neva dimenjion. L’era segur, apede me e Martin Riz, na dì che sion jic su per l parei sud de la Marmolèda: siane de trei a jir en sù e l’é stat na sensazion tant forta che someèa de poder l tocèr”. Donca ti es amò peconta co la crepes? “Ben segur! L’é l lech olache vive endò chela sensazions e de autra sensazions neves, olache el l’é pèrt de l’ambient e de chel che gé fae amò”. Ence te Val Lasties? “Ei! É volù jir jù dotrei dis dò la levina con Sergio Valentini, che l’era con Erwin en chela sera: l’era na beliscima dì, aon empeà sù na ciandeila, l’era dut corì de neif e dapò bon, g’é fat front coscita ence a chel lech, vegnan en jù descheche aee fat con el la pruma outa che jie coi ski fora de portoi”. E ades? “Ades viaje ence per el, olache l fossa vegnù sù co me e l me aessa ensegnà a jir sun ogne sort de crep, ence l più adort”. Na guida la é per semper, la man de n socoridor la é semper sporta envers i etres, l grignot de n fi sciauda ogne cher e l gran Crep l’é sora ogneùn de nos.

Autora

Virna Pierobon
Collaboratrice

Sono nata e cresciuta a Bolzano con gli occhi puntati sul Catinaccio, ma ho scelto la Val di Fassa come casa. Mi occupo di comunicazione a 360° in maniera sartoriale, disegnando progetti a supporto dei prodotti nel turismo, sport e outdoor. Viaggio sui nuovi media e mi occupo di formazione.

Son nasciuda e cresciuda a Busan vardan vigne de su per l Ciadenac, ma te Fascia son a cèsa. Me cruzie de comunicazion ... >>