Belamont é na fraziun de Pardac te Fiem a 1370 metri sura le livel dl mer. Inlaota êra la munt di paurs de Fiem y aldedaincö é Belamont na localité turistica conesciüda. Chiló, te öna dles prömes ciases fates sö ti agn ’70 , virel Anna Ellemunter Erlacher da La Pli de Mareo.

Anna Ellemunter Erlacher é nasciüda tl 1929 a Les Ciases, na vila de La Pli de Mareo, scialdi dalunc dal zënter dl paisc. Vigni de êl da jí n’ora a pe por jí a mëssa y spo a scora. La vita a Les Ciases n’é por Anna nia tres stada saurida, ara á bele pordü süa uma dl 1936, n’edema do ch’ara y süa so é jüdes ala Pröma Comuniun. So pere s’á indô maridé, mo a Anna ti á tres mancé dër tröp süa uma.

Anna se recorda sciöch’ara, sües sorus y sü fredesc á tres messü daidé söl lüch da paur: jí a vardé, sié, restelé, lauré ti ciamps de siara, orde y formënt.

Anna á fat la scora elementara a La Pli y ëra se recorda tres ciamó dër ion dla maestra Dusini, na maestra da Cles, che â insigné 3 agn alalungia a La Pli. Chësta maestra s’â tut dër a cör la picera Anna, dantadöt da canche süa uma ê morta. Do scora ti dêra gonot n taí de jopa buna cialda y ara ti taiâ vignitant i ciavëis. Döt de te piceres cosses che na uma ess fat por süa müta. Anna ti á orü dër bun ala maestra y do ch’ara viô bele da n valgügn agn a Belamont éra stada bona da la ciafé sö a Cles y á insciö podü indô l’incunté.

Cun 25 agn s’á Anna maridé cun Lois Erlacher, “Lois dl ombolt”, che fajô le verdaciacia y ai á albü 2 mituns y na möta. La familia á mudé jö paisc aladô che Lois ciafâ le laur. Ai á vita a San Laurënz, spo a La Pli y a Paneveggio, dlungia Belamont. Tl parch natural de Paneveggio ê Lois dependënt dla verda forestala y la familia podô vire te na ciasa tl parch. Por Anna n’él sté tl pröm nia saurí da gní a vire a Paneveggio, n post inlaota tan dalunc da La Pli de Mareo. Por fortüna âra imparé talian a scora y chël savôra bun, madër che a Pardac y Paneveggio baiâ scialdi düc le dialet y tl pröm se fajôra dër ert da capí ci che la jënt dijô. Mo ara á ince atira ciafé jënt che l’á daidada.

Ara se recorda ince sciöche so pere n’orô nia ch’ara jiss a vire tan dalunc y plü ion essel albü sce ara foss gnüda zoruch a Les Ciases cun i mituns, n sëgn por Anna, che al ti urô bun.

Anna á vit cun süa familia a Paneveggio por 15 agn alalungia y spo, tl 1970, âi metü man da se fá sö na ciasa a Belamont, che é scialdi plü daimpró da Pardac.

Anna y Lois á tres baié ladin cun i mituns, dantadöt deache por ëi êl normal da baié so lingaz te ciasa y ince deache ai orô che i mituns imparass le ladin, bele ma por ch’ai podess baié por ladin canch’ai jô a ciafé i parënc a La Pli.

Ai á tres tigní sö le contat cun i parënc da La Pli, sides cun la familia de Anna co cun la familia de Lois. D’isté jôi plülere a La Pli y datrai stôi ince n’edema dala familia de Lois, ite da chi “dl ombolt”, olach’ai daidâ spo da sié y restelé. A süa jocera ti á Anna orü scialdi bun, por ëra éra stada sciöche na uma.

Le pere de Anna, che tl pröm n’orô nia la lascé jí a vire “dailó ite y jö” é jü gonot a la ciafé a Paneveggio y spo a Belamont, scialdi d’isté.

Anna Ellemunter á sëgn 89 agn, so om Lois é te ciasa de palsa, y ara vir da sora cun so cian Mida, cun ël fejera vigni de na spazirada te paisc. Süa möta che ne vir nia dalunc, va vigni de a la ciafé.

Anna á albü na vita nia tres saurida, ara é n’ëra de chë generaziun, che bele da piceres insö á messü fá laurs de fadia söl lüch da paur y jí dër jones a patrun por daidé la familia. Y ara é ince öna de chës ëres che á n’eleganza sota y autentica, che an n’incunta nia plü gonot aldedaincö.

Le paisc de Belamont é deventé so daciasa, chiló conëscera feter düc y düc ti ó bun. Valgügn ti á propi dit: “Canche tö ne saras nia plü a Belamont, spo ne sarál nia plü Belamont.”

Autora

Erika Castlunger
Colaboradessa

Erika Castlunger, nasciüda tl 1972, à studié a Bologna y Milan sciënzes teatrales y pedagogia teatrala y vir tla Val Badia. Ara fej proieć de teater tles scores elementares, mesanes y altes, y colaborëia cun la Rai Ladinia, por chëra che ala fej programs de televijiun sura la storia y la cultura dles valades ladines. Dal 2013 studiëra teater - terapia a Berlin.

Erika Castlunger, 1972 geboren, ... >>