Nonanta aisciude tu aee jà vedù. Toa pel, amò desche l velù, mosciaa semper la scempia beltà, ma i egn encomai era jic, e la forza dò jù. Fac e mestieres passé te autre man, secodida per forza, dò aer tant secodì. Dis zenza fin e permai sepolii, sot mile aimarìe e piate de libres. No più patrona de nia, nience de toa libertà.
Na dì te to ciaf se aea empeà l pensier de saonete emperfumade, desche le rese che tu vedee fora per fenestra. Chele saonete tel sciatul de carton dessegnà, don traslascià, che no se usaa più... Chele saonete era toe! Recort vif de chi tempes canche, le fie ormai granote, t'aee troà ejit e sodisfazion a vener belec a le sciore. Tu, che de belec no tu n durae mai. Le era cater, coi dessegnes a rilief e chel bon perfum de rese... cater, desche le femene che tu aee più apede: la fia che ruaa de domenia, chela che tu vedee duc i dis, semper coran, la neza che prest fossa jita dalonc e la neva compagna che, voler o no, te secodìa te dut.
La domenia domesdì, tu le aee chiamade: “vardà te chel armer, cognessa esser na scatola, con cater saonete..." Ciapade da mile pensieres e fac: “ma scì, vardon ben, no l'é prescia..." e tu amò, mingol dò “varda se le troade..." Aon cerì, zenza gaissa... cater veie saonete serade da egn te n armer... Zacan le aon troade, e tu: “una per una, voi che ve n tolassade una per una..."
La mia à troà post te la crigna dai guanc più vejins a la pel. E semper, ogne outa che verje la crigna, chel bon perfum de rese me porta l pensier de mia mare, e soe saonete.

Autora

Lucia Gross
Diretora responsabola

Fia de genitores fascegn e cresciuda tel Trentin, fora de Fascia, son enciasada da 30 egn te chesta bela val ladina, a Poza. Scrive per ladin da passa 20 egn, desche coordenadora e responsabola de la redazion de Fascia del sfoi “La Usc di Ladins”: del 2012 son doventada giornalista profescionista fajan l’ejam de idoneità a Roma, per ladin. Me piasc chest pìcol e glorious lengaz, e me piasc ... >>