Aga. Chest l'é l maor pensier che é abù de jené, canche son vegnuda de retorn te la Talia per la formazion. L'é dal prum de november che son a Nairobi, tel Kenya. Son dò che far n an de Servije Zivil co la Caritas Ambrosiana de Milan, dessema a n'autra tousa taliana. Me cruzie de joegn che, n'outa fora da la prejon per mendres, vegn a star te na ciasa, la Saint Joseph Cafasso Consolation House, averta acà diesc egn da le miscionarie de la Consolata. Chel che fae l'é star con ic, i didar per chel che posse tel lurier de ogni dì, ma soraldut l'é proar a portar inant mie lurier più che dut sozial, che l'é ence chel che é studià.
Ma en ocajion de la Giornada Mondiala de l'Aga, che la é ai 22 de marz, l'é n auter l pensier fort e fon daìte, chel che me fasc pissar dalbon a chel che é a ciasa e a chel che più me à straout canche ai 4 de jené son vegnuda a ciasa per trei setemane de formazion. Vegnìe da doi meisc olache na dì scì e na dì no cognaane boir e filtrar 4 o 5 litri de aga. L'aga a Nairobi i pel la beiver, la vegn da l'acquedotto, ma ampò per noi che sion mingol delicac de stomech l’é miec no la beiver zenza la far boir. Belapontin la fajaane boir e filtrar e la tegnaane te frigo per poder la beiver frescia. A Nairobi, dant de pontar demez, aon scontrà autre doi beze che fasc Servije Zivil te Kenya, però ele le é su la costa, a Mombasa. Le ne à sobito contà che i ultimes diesc dis era stac dalbon senestres, ajache no le aea abù l'aga a ciasa. Te la zona olache le laora l'é jà da beleche n an che i padesc l sut. La sajon de la pievia, che aea da esser de oril e de mé de l'an passà, no à dat n muie de aga, e ence chela de la picola pievia, perveduda per november e dezember, à lascià a sut.
Chel che me à contà cheste touse me à dalbon fat pissar. É amò de più me à fat pissar le parole de Alex Zanotelli, te so liber Korogocho, olache l conta soa esperienza de passa diesc egn te una de le pior baraccopoli del Kenya: a Korocogho “l soul servije che dasc l comun de Nairobi l’é l'aga, che però no la rua te le baracche, ma la vegn menada con tubi a valch pont de riferiment e dapò la vegn venuda tant per candola da dotrei persone che stasc te la baraccopoli e che le fasc n contrat col comun. Coscita la jent pureta la la paa più che i riches. L'aga per empienir le nodadoe de n muion de vile de Nairobi la vegn n muie de manco de l'aga che se beif te le baraccopoli” (A. Zanotelli, Korogocho. Alla scuola dei poveri, Feltrinelli, 2003).
Soraldut canche son ruada a ciasa, é tacà a me n adar de tanta de aga che trajon demez, ence gio, che da pezon cere de esser “sostenibile” e de no trar demez chest ben scì prezious. Vigni outa che jìe te bagn no podee no pissar che noi fajon nesc “besegnes” te l'aga bona da beiver e tel Kenya cogne me la boir... e son fortunada gio, che la é a ciasa! Noi che stajon te la part rica dal mond, se permeton de trar demez l'aga sche se n fosse per semper, e endana con nosce politiche vergognouse aon mudà sù l n ciclo aturaldel clima a na vida che da l'autra man del mond no i pel nience più far cont su l'aga che vegn dal ciel, e i cogn jir a se la prear. Co nesc stii de vita che no respeta l'ambient, i animai, le persone, aon petà te l'aria e te l'aga n grumon de pazae e ades se cogn jir chissà olà a troar aga e aria neta. Amedit bastassa pece picole atenzion duc i dis per far noscia part, e no l'é da pissar che nosce azion no posse far la desferenza perché, descheche dijea Mare Teresa de Calcutta “chel che noi fajon l’é demò na gocia te l'Ocean, ma se no l fajassane, l'Ocean aessa na gocia de manco”.