“Ugali” l’é na sort de polenta, più suta e manco cota, l prum aliment per la jent del Kenya che de solit i lo magna ensema col “sukuma wiki, n ortam vert che cresc sorì (sukuma wiki tel lengaz swahili a la letra vel dir "spenjer la setemana", entenù praticamenter desche l'aliment per la soravivenza). La ciarestìa grieva che é dò a padir l'Africa orientala, a cauja de la gran suta che à ciapà ite duta la part est del continent da più che n an, à dessatà la coltivazion e la produzion de turcheis, e donca ence chela de la farina per enjignar l'ugali. Chisc dis passé ere jita a proveder desche l solit al Cleanshelf, l picol supermarcià de Kahawa West, na frazion de Nairobi e ensema con me l’era Angeline, una de le volontarie de Cafasso. Aon vardà se l’era la farina, per la tor per i bec de Cafasso: aon vedù che no la era e se aon arvejinà a la cassa. Giusta te chel moment un di dependenc del supermarcià é ruà ite portan valch pach de farina. Angeline me à tout per man e la me à tirà a ge jir dò al tous, dijan "gei, en prescia, che se n pel tor demò un per un!". Gio me é troà a esser proprio “trasportada” da na ona de jent che ge jìa dò a la farina. Te presciapech 20 seconc duta la farina che era ruada la é stata data fora. La jent se spenjea, la slongiaa le man, la bugolaa, la se n dijea, per doi chili de farina. Gio per fortuna ere dedant, perché se no, totola descheche son, me aessa esser segur lascià "sfrear" l post. Giusta fora dal supermarcià ere duta sotessora, piena de marevea e destrametuda tel medemo temp. No aee mai vivù n'esperienza coscì, olache la jent se spentonea per la magnadiva. De fora la jent chiamaa col telefon, dijan: "l’é ruà la farina, cori!" (ence se endana la era jà fenida). Gio é pissà a che che podessa voler dir per me te la Talia. É pissà che la soula couda per spetar valch la é veduda te valch notiziar canche i mosciaa chi che spetaa l'ultim model de i-phone. É pissà a coche podassane ne sentir nos, ruan al supermarcià e troan la scafa de la pasta veta. É pissà che canche noi jon al supermarcià podon cerir fora anter n muie de marche de pasta, de mile forme e sort desferente. E é pissà a la jent che se spentonea per mìngol de farina. É pissà che noi se lamenton se no troon chela o chel’autra marca, e chiò no i à temp de pissar a la marca, o se la farina sie o manco integrala o biologica. Chiò i peissa che no i à l'aliment de basa per soraviver e donca canche l rua i fasc de dut per se l caparar. Tante robe é senestre da azetar, dò 8 meisc te l’Africa. L'é senester azetar che a oute se averc la spina e l'aga no vegn jù. L'é senester azetar de se troar insec e sorice te ciasa. L'é senester azetar dinamiche n muie, massa desferente da chele che sion usé. Ma la roba più senestra da azetar l’é l'ingiustizia e la desvalivanza de deric. Perché gio te pec meisc vegnaré de retorn, aré endò l'aga e podaré star te na ciasa sorida. Ma l'ingiustizia chiò restarà, e la jent seghitarà a se spentonar per aer doi chili de farina.

Autora

Nadia Cadrobbi
colaboradora

É inom Nadia, son nasciuda te Fascia ma stae mingol daperdut olache me porta l destin. Son stata te l’Albania con Operazione Colomba e da aló mia vita é mudada deldut. Da enlouta é fat de la nonviolenza e de la pasc mie rejon de vita e ogni dì proe a esser, con mie azion e con mie pensieres, testamonech del fat che chisc doi valores no demò i é... >>