La giajola (Nucifraga caryocatactes) ie n ucel ciantarin dla familia di corvins (Corvidae). La viv dantaldut ti bosc da odla da mont te n gran raion che va dal Iapann ala cuntredes dal tlima mesan dl’Eurasia nchin tl’ Elpes ozidenteles.

Inuem
L inuem scientifich latin dla giajola “Nucifraga caryocatactes” ie na tautologia, uel dì na dublëta o repetizion. Tramedoi pertes dl inuem à l senificat de “sfraciacuces”: “nucifraga” ie metù adum da nux (=cucia) y fragare (=sfranjer) y ie de pruvenienza latina, ntan che la parola “caryocatactes” ie metuda adum da caruon (=cucia) y catagnunai (=sfranjer) y ie de pruvenienza greca.

Maië
D’instà maieles dantaldut insec, ma nce lingioles, croc, ueves d’uciei y pitli uciei. Tl tert autonn maieles granëtes, pedlëuses y d’autra bostles, d’inviern la sumënza di lëns da odla sciche broi, ma nce lincioles. Ti mënsc da d’instà se mëteles da pert te deposic scundui tla tiera milesc de chisc broi y d’autra sumënzes. Per fé chisc deposic geveles cun si bech bujes tl fonz y mët ite n gosc plën de broi o lincioles o d’autri fruc de lëns. Datrai mëteles plu che 100 broi o nchin 14 lincioles al iede te n busc che les cur pona inò pro a puntin. Uni giajola se njinia milesc de chësta scuendes de broi per l d’inviern y la marueia ie che les se les abinà inò belau dutes zënza problems: zënza messei crì giut se giateles l 80% de chisc deposic nce canche l ie truepa nëif. N ne sà al didancuei mo nia avisa coche la giajoles ie bones de recunëscer y se giaté ora si deposic sota la chëutres de nëif.

Vita
La majera pert dl ann vivela te peres o te de pitla families. Suvënz ieles puech spevies. Si coa fej la giajoles bele abenëura tl ann te lëns da odla. I lëns che les à l plu gën ie pëces y zirms, plu d’inrer fejeles coa te leresc. Les coa ora y tira su n trëi o cater pitli al iede. L tëmp de coa ie de 21 dis, i pitli uciei resta tla coa da 21 a 25 dis.

Cianté
L cianté dla giajoles ie mpue ciaculënt cun sonns cracënc y raucs che lecorda chël dla gaces.

La nfurmazions ie n pert unides tëutes ora da wikipedia.

Autora

Alma Moroder
Culaboradeura

L’amanta dla natura che à gën la mujiga ie chersciuda su danter Bulsan y Urtijëi y à permò mparà ntan si stude tla zità scialdi da plan de Berlin a prijé si ncësa da pieres. Tl stude de economia se sëntela umanisticamënter tla miseria y perchël frecuenteiela dlongia i cursc de ragioneria gën nce lezions sun Thomas Mann y la North American Short Story. Ultimamënter l’à si amor per ... >>

Dessëni de Alma Moroder