La Gran Vèra l’à fat padir tropa jent te tropes raions. Chi che dapò à abù la desfortuna de aer l confin sun sèva de cèsa, chi à abù vita amò più dura. Anter i ladins, la jent de Fodom l’é stat chi che à padì de più. La families à cognù se n jir e la val l’era deventà teater de vèra: da na man i taliegn e da l’autra i todesc. Ence la eles che manco se enterescea de storia de vères, les sà che che l’é sozedù su per l Col de Lana. Do la vèra la val l’à cognù meter man dal nia, ma no sobito. Anterite n grumon de mudamenc che à segnà per semper la val: l passaje da l’Austria a la Tèlia, l fascism e la seconda vèra che à mudà per semper la vita de tropes fodomes. Duc chi che l’era stat sfolà vegn de retorn a cèsa, ence la familia de Luciana Palla, professora de scola e storica per pascion de la storia di ladins e de la ladines. Luciana Palla la vegn al mond ti egn ’50 a Palla, proprio sot ite l Col de Lana. Curiousa fin da joeneta, la enten che per capir la storia de sia familia e de sia val la cogn fèr zeche. De scrit no l’é nia. Coscita ela la se met a chierir, studièr, analizèr. Dapò la conta. Sie libres i é fondamentèi per cognoscer la storia di ladins e de la ladines del Nefcent. Luciana rua amò a intervistèr persones che à vivù l passaje dal Otcent al Nefcent, dai Asburgh ai Savoia, dal venter vet a mingol de benesser. N cont de femenes, Luciana l’à podù ge jir do al prozes de emanzipazion (se coscita l podon definir ence per la ladines) en pruma persona: l’à cognosciù e osservà eles che deventèa peres dal lurier te ciamp a eles che per prumes a chierì de troèr neves modie, desferenc da chi che l’era stat destinà per secoi a la eles ladines. La se à enterescià de tanta eles e en particolèr de una: Maria Piaz che raprejentea per la ladines zeche de extra. Maria l’era na persona ledia, originèla ma soraldut l’aea n coraje che amò inchecondì fèsc marevea (nience da se enmaginèr enlouta!). L liber de Luciana Palla su de ela l’è proprio da lejer.
Te l’intervista che publicon, Luciana Palla la se conta con sie recorc, sia esperienzes e osservazions personèles. Na ocajion, tel centenè de la gran vèra, de fèr n saut de noscia storia.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>