I é passa 80, ence se no se dijessa. Caterina Chiocchetti - ma l’é miec dir la Rina del Moro, ajache de Caterina Chiocchetti a Moena n’era amancol 7 chisc egn - la é del 1931. No l’é sorì la troar a ciasa, perché l’à semper da jir e da far: te ciasa de paussa o dò miscionaries, a far valch raida sa mont o a n conzert. E de fonins no la vel n saer, descheche perauter no l’à (e no la vel) ne l’auto ne la televijion. Per trenta egn la é jita a crepe con rampinadores e menacrepes de nonzech, l’à fat vie senestre lascian na pedia te la storia de l’alpinism al feminil. Ma no l’é stat sorì la far contar: massa tema de se meter en mostra”. A la fin le parole é vegnude fora sot ousc: no la storia de n personaje”, ma le riflescion de na vita vivuda de pien.

Pense che mia vita no la sie stata emportanta, ence se ogneun l’é emportant, dant da dut davant dal Segnoredio e dapò ence davant da la jent. Giö no è abù na familia, no è abù fiöi... è abù la mama che la é stata malada al lonch, viveane ensema e l’era na bela persona... ma pense che a no aver na familia tu cogne troar valch motivazion, valch da fort. La pascion per le crepe, e amò de più l volontariat, l’é stat per me chest valch da fort, che ge à dat segnificat a mia vita. Che vöstopo che die? A chi vösto po che ge enteresce mia storia? La mia podesse giusta esser “la contìa de na zitela”, coscita amàncol fosc chi che i la engesc i podesse se grignar mingol... Varda, n’è scrit jù n tochet, la podesse scomenzar coscita: “È abù la fortuna de nascer en te sta bela val, en te na familia, una de le tante familie, olache i ne à ensegnà a prear, a ge voler ben a duc, a proar a no giudicar mai nesciugn. Fosse stat l moment de jir a studiar, ma l’era tant che finì la guera, e i ne à metù subit a laorar...”

Da tosata en temp de guera
L’era temp de guera e l’era n muie senester esser seregn. L’era paura: paura che no la finisce più, paura che no se ge n vegne fora, e alora no l’era nia de bel bel, proprio... beh, la familia, per grazia: se era te na familia olache no i begava, no l’era de gregn problemes. L’era paura percheche se sentiva che i bombardava Busan, se sentiva e dapò se jiva ju te piaza e se vedeva dut luster da la man del Latemar, e se sentiva sti aerei che passava: l’era burt. De bié recorc di tempes de la guera no n’é tropes. De burc, me recorde ence i todesć che i passava ju per Ramon e i ciantava, e i contava che i vegniva da Caviola, olache i aeva brujà mez l paes, con la jent laìnt. Cheste l’é robe burte, che no se desmentia più, pense che chisc recorc i reste per semper daìnt per duc. Canche la guera la é finida e l’é ruà i merichegn, enlaoita taca i recorc bié: i passava te piaza Ramon coi cingolati, e i ne petava ciocolate, che a noi tosac ne pareva de ciapar chissà che.

Aesse tant volù studiar
È fat le commerciali, trei egn dò le elementari, e dapò i te dajea l diploma. I le fajeva chigiò, l’era subit dapò la guera, anzi anter int la guera, ti egn dal ’41 al ’44, l’era chigiò valch professor, e per chest se à podù en profitar. Dapò le scole i me à subit metù a laorar. L papà l’aeva l monopolio, e coscita i me à “confinà” aló e aló son restada enfin ai 60 egn. Dajeane fora l tabach per duta la val de Fascia, fajeve conc, conc e conc. No me à mai piajù. Me saeva bel demò tei primes tempes, canche i vegniva ju a se tor la roba col musciat, me recorde, e se aeva duc temp de parlar. Dapò i à scomenzà a vegnir con na machina pìcola, e dapò semper più grana... e semper manco temp. Giö é semper abù l recor e l dejaje de no aver studià, ma jir a crepe me à ensegnà che sion duc valives, me à ensegna a me sentir compagna ai autres ence se l’era jent con doi lauree, a no esser scì complessada e timida come che ere, che no me fidave nince ge vardar tel mus a la jent. Sa mont, canche tu es sun n passaje senester e tu veje de no ge la far, e dapò tu ge la mete duta e tu l passe, tu capisce che en fondo aon duc capazità che al moment giust saon le tirar fora, e chest dapò l te serf te la vita. La pascion de jir a crepe La pascion del jir sa mont pense de l’aer ciapada dai fradié de la mama, i Soraperra, che i era duc e doi a studiar, un a Firenze e chel auter a Milan, e canche i vegniva i fajeva le guide alpine, e giö è semper sentù parlar de mont daìnt da usc. Dapò del ’37 un di fradié de la mama, Raimondo, l’é mort, l’é restà sot la levina del Sas Becé, e l’é stat na tragedia en ciasa... Sui 18 egn è scomenzà a jir sa mont. De cà e de là e daperdut... uh che bel che l’era, Mio Dio! Fajeane autostop e se n jiane su per Sela, no se aeva la machina... scì, giö no l’è mia nience ades, a enlaoita nesciugn aeva la machina... ge n’era bele calche una. Ereane calche amica, la Flavia del Janac, che dapò la se à maridà, e la Berta, che duc i la cognosc percheche la era te coprativa che la laorava, la é stata a Moena enfin de 30 egn e dapò la é jita monia, ades la é tel Brasile. De chele raide sa mont è tenc bié recorc. Me recorde de aer vedù tante robe bele. Canche rueane sunsom ciantave l’Alleluia, ma l bel l’era soraldut l raport che se aeva semper con chi che te portava. I era proprio valenc. Giö no è mai abù n amich che l me aesse portà de seghit, come tante amiche, che dapò le se à ence maridà e le jiva con so om, se sà ben, enveze giö jive con tante persone diverse, e i me portava. Canche no i me portava, me meteve japede i crepes su per Sela o int per l Vaiolet, e stajeve aló e... i cognea bele me tor canche i passava. Fazile i pensava “Chesta chigiò la é mingol fora”, ma i me toleva dò, e giö me è fat tenc de amisc proprio te chel modo aló. Se proprio no troave nesciugn jive ben ence da sola, la Stabler me l’è fata cent oite giö die. L post più bel l’é semper la Marmolada, olache se pol jir a rampear, ma ence coi schi. Ence coi schi me saeva bel jir. Ades l’é jà doi egn che no vae più... sa mont vae amò a far raide no massa senestre, de trei o cater ore. L’autra dì per ejempie son jita su le Odle. Pense che jir sa mont te ensegna trop; duc tira fora valch, duc met ensema le robe. Me recorde canche l’é mort l Marco Dellantonio su la Sud de la Marmolada, che son restada aló 5 ore a spetar i socorsc, canche son vegnuda ju da sera ere duta medeada sù, perché la corda me era passada te le man e sul col e ere duta piena de sanch, pensave che la dì dant aeve n problem che me saeva da no poder tegnir fora, ma chel problem no l’é mai più sautà fora te mia vita, ence se ge è pensà n muie, no l me è mai più vegnù tel ciau. Davant da le robe gravi, tu ge das la mesura a dut cant.

L’era n mondo dut de omegn
Te chel mondo dut de omegn ereane ben mingol mosće bience, i ne segnava mingol a deit. L’era comedie... a Moena i me dijeva: “ma esto mata jir a crepe, ma che vegnelo po fora?” No l’era nince da se empensar, perché ere una de le prime, de più velge n’era de chele che jiva magari a far valch traversada, ma no proprio a crepe. Fosc proprio perché l’era n ambient olache l’era soraldut omegn, me recorde che don Fortunato na oita l me à dit: “Ricordati bene di non dare troppi bacini in cima alle montagne“ e giö ge è dit “Ma io veramente non ne ho mai dati bacini in cima alle montagne”. Perché se vesc che zachei usava coscita. A mi me è capità na oita, me recorde, che l dotor Donato Zeni l me à dit “Nessuna donna mi ha mai negato il bacino della vetta!”, ma giö ge è dit che no usae... aesse cognù n bossar valch centené... Fosc con chele foreste, che le sentiva l “fascino” di menacrepes, la ge jiva miec... Me recorde che, giö die che l’era del ’60 e valch, Fulvio Campiotti, n milanese giornalist specialisà da mont, l voleva ruar sul Bianco con cent femene. Dant l’à fat na proa con 20, ereane demò 2 taliane, l ne aeva tot de cà e de là, franzouse, svizere. Sion jic su da la man franceje, l’era na sort de refuge a 4000 metri olache i cognea adertura ne lear per jir te cescio. L’era burt temp, sion stac ló a spetar che miore l temp fin canche no l’era più nia da magnar, dapò aon bele cognù jir ju de retorn... Na na, no i me à cernù me perché ere la più brava... fazile i voleva ence zachei de le Dolomiti. Però cogne dir che giö a jir a crepe è cognosciù tanta bela jent, e fazile i se recordava, perché de femene n’era proprio pöce che jiva a crepe, e coscì na femena la fajeva prest a esser brava... Ere pascionada, chesta l’é la parola giusta, aeve na gran pascion e troave semper zachei che me portava, e coscita n’è fat n mulge de rampinade. Anter le più senestre me recorde per ejempie su le Cime de Lavaredo l Spigolo Giallo de la Comici, che l’é n bel 5° grado da enlaoita. E no l’é demò n passaje, perché n passaje ben o mal duc é bogn de l far, giö pense... desche te la vita. Ence te la vita se l’é n moment senester se é bogn de l tegnir fora, ma se l’é na vita semper grama, enlaoita la é ben dura. L dolor dant o dò tu l scontre te la vita, però giö è amisc olache l dolor l ge rua daìnt da usc de spes, e aló l’é più senester n vegnir fora. Ge völ aer fede, giö è semper vedù che l’é chi che à fede che é bogn de tegnir fora problemes coscita burc.

La fede
Per me la fede l’é la roba più emportanta che è, no n’é de scì emportante, per bel che me saesse jir a crepe, per tant che ge tegne a l’amicizia. L’amicizia con Dio crese che sie la roba che no podesse far zenza, Davant da El tu es tota en conscidrazion, tu es emportanta, ogne persona, ence la più pìcola come me la é emportanta, son segura. Ma no è mai pensà a na vita religiosa. Canche la Berta la é jita monia me n’è fat na gran marevea: “che forza”, pensave e ge dijeve, no l’é possibol! Ela la é stata chiamada, e da chest tu veje che l Segnoredio l’é, no pol esser autramenter, se no la fossa stata mata patoch a se n jir coscita de 32 egn. La é ruada tel Brasil e la grigna semper amò come enlaoita, la é semper contenta. Giö la fede la é ciuciada col lat de la mare, ela ence la vegniva fora da na familia olache fede ge n’era tropa, come te ogne familia chi egn. Ma dapò ste bele usanze no semper se é bogn de le portar inant. Ades veje che i jovegn i stenta a jir a messa, dapò magari a livel personal i à n contat, no se cogn mai giudicar, ma canche giö ere jovena se jiva duc te gejia, n’era demò un che no jiva e i ge dijeva “l comunista”... dapò magari no l’era po nince comunista... ades enveze sarà l 30% che va a messa. Se mencia i valores l’é dut possibol. Per carità no voi dir che chel che va te gejia l’à duc i valores, e chel che no va no l n’à, ma pense che se un l va te gejia l cognesse ence se empegnar e cercar de cambiar.

Nia auto ne fonin, e nince la televijion
Percheche no è volù aver l’auto, l fonin e nince la televijion? Fosc no l’é mia nince dut positif, ma veje che se pol viver benon ence zenza dute ste robe. La televijion no la me mencia, perché la radio la fa de bié programes. Me sà n mulge bel engejer, engeje trop, e dapò scoite trop la radio, son semper sul Trei a me scoitar musega classica. Me recorde che canche l’era amò la mama, che ela la la voleva la tele, me saeva bel scoitar Zavoli, però ades no n sente l besogn. L’é ben vera che tu es mingol taià fora, se to sente rejonar de valch de emportant che i à fat veder a la tele magari no tu capisce, ma se proprio fosse valch de emportant i l’à duc la tele, basta che vae da mia sorela o da un o da l’auter a la veder. Co la televijion se risćia de deventar dependenc, de star aló a se scoitar dut, e no engejer più. Esser dependenc da valch no l’é mai positif. Giö l’é stat n temp che ere dependenta dal jir a crepe, e no jìa ben, perché se se é dependenc da valch no se é liberi, vol dir che no se sà “durèr l cef”! Per l’auto, sui 20 egn me aeve ben scrit int per fat la patente, ma dapò l papà l’à scomenzà a brontolar, che “to me porte via ence l’auto per jir a crepe” e coscì, piutost che sentir ogne dì chisc brontolamenc, è renunzià. Dapò no l’è più fata, percheche è vedù che jir co la coriera l’é beliscim, tu scontre jent, tu pode far doi ciacole... ma me rende ben cont che no duc i pol far condemanco, che l temp l’é prezios. Me recorde che i ùltimes egn che laorave e cogneve me n jir na oita en setemana ju per Trent coi paches di biliec de le loterìe, fajeve ence fadìa, enlaoita la é stata dura... ma fosc me à aidà ence a capir che l’era ora de desmeter. Segur la jent che laora la dora ence l’auto... ma a oite fajon somear besognes ence chi che besognes no fosse. L fonin dapò l’é na dependenza spaventosa, te coriera veje i tosac che i à l’amich enlongia jù, con l’auricolar e l telefonin... ma parleto con chel che no l’é? No élo miec parlar con chel che tu as apede ju? Cheste l’é proprio robe che no capisce!

Tor part a la vita culturala e soziala
Me piasc trop la musega, soraldut chela classica, è tropes dischi... l’é stat l Dario a me passar la pascion per la musega classica, e me piasc trop ence jir ai conzerc. Jon a Busan o a Trent, a Ciavales, con la Enrica del Tonac o con autre amiche, e me sà proprio bel. È na foto che i me à fat con Uto Ughi. L sona a na maniera... e dapò tu sente che l’à na gran fede, canche l te spiega tu sente soa spiritualità... son jita via e ge è dit “Maestro, posso baciarle le mani?”, el l me à ciapà int, l me à metù n brac entorn al col, e i me à fat la foto; son proprio contenta, perché l me sà n muie bravo e na gran persona. Ei, l’é vera è ence ciantà. Ereane col Canori, l prim grop che à fat l Canori, dapò l’era l Pierino Scarpari, è ciantà ence con chel coro aló. Me recorde che aon fat ence n disco, ma soraldut l’era chest bel raport... giö ge voleve ben al Canori, perché l’era na persona particolare. Me recorde na oita su per Lujia, ereane su de set o ot del coro, e l Canori l’à ciapà n gran sas te man, e l l’à petà, ma fort veh, su per chele laste, e l’à dit: “voi saver che nota che l’é chesta!” e l l’à dita tant scerio che duc se aon stremì e nesciugn se à fidà ge responer... l’era particolare, però l’era na persona col ciau... L’é ence n mulge de egn che vae a la scola de la terza età, da canche i l’à metuda sù, sarà stat del ’94, me sà, e se empara dalbon n mulge de robe. L’é segur da ge dir n gran diotelpaie a chele che i l’à metuda sù e i la porta inavant. Calche oita vae ence a teater, ma de manco, perché no troe la compagnìa, no sè chi che l’é che va. E dapò me sà bele le mostre de art. La pascion per l’art la è ritada dal zio Bepino [Soraperra, a el é dedicada la Scola d’Art de Fascia, ndr ]. Me recorde che vegniane fora da la guera, sarà stat l ’47 o ’48, e l me à menà a Firenze, olache l’aeva n mulge de amisc. L me à menà al Palaz Pitti, te la Galerìa di Ufizi e me è subit enamorà de chi cadres, ence percheche mio zio l saeve me i spiegar polito.... amò ades se pode vae a veder. Sion ben de tropes che coron de cà e de là a veder calche valch da bel. Fin canche è mingol de salute ge völ ben che fae valch, vösto che stae dut l dì a ciasa a scoitar musega e engejer? L volontariat? No fae trop veh... e dapò no me sà bel parlar de chel che fae, no serf a nia, se no sćiampa dut. Sun ciasa de paussa pense de jir a emparar a viver. Chele persone le é aló e no le se lamenta, le vif come che le vif, ence jent più jovena che giö, e cogne amò de più rengraziar l Segnoredio. L’é stat tempes de mia vita che vedeve tante robe che no jiva. Ma ence te me l’era robe che no jiva, dant de dut aesse cognù me comedar me. Cerche de no jir a ge dir ai autres che che i à da far, no son mai stata na polemica. Massa de spes se sà dir canche l’é robe che no va, e enveze me sà che, giö per prima, no se rengrazia mai nisciugn. Però se l’é proprio robe che veje che no va, le die ben... per ejempie son ben jita te comun a ge dir che per piazer no i refae te Ramon l fal che i à fat te l’autra piaza, che i tegne chesta fontana che la é de monzonite batuda a man, e fosse n pecià che la finisce te n magasin... con dute le crepe che aon dintornvìa no se pol jir a tor l granit... I viajes Me à semper sapù bel viajar. Son stata tel Nepal, int per i egn ’70, ereane en cater e se aon organisà noi, con la refa su la schena e sion jic su fin a 4.500 metri, fin olache l’era insediamenc de jent, aveane dò doi tende, ma giö no è mai dormì te tenda, è semper volù dormir, ben con mie sach da not, ma te le fazende, olache i te dasc alberch, perché demò coscì tu pode veder dalbon come che vif la jent tei autres posć. L’era stat proprio bel, siane jic su a pe, e no l’era come che l’é ades che l’é dute le carovane che va su, enlaoita l’era pöcia jent che jiva su co la refa su la schena, e viver con la jent enlaoita l’era proprio bel, ades rua n sach de jent e l’é dut più comerzialisà. Tel Tibet se cogn esser en grop, perché de doi o trei no tu vas ite. Aló me recorde che a Lhasa, la capitala, duc i posć emportanc i é tegnui dai cinesi, e i cerca dalbon de destrujer dut. L Potala, che l’era l più gran e l più bel monaster del mondo, olache l’era int più che 10.000 monaci, l’é stat proprio masciacrà, duta la part bassa la é destruta patoch, duc i depenc a fresch che l’era i é stac scuerc. I à copà jù n mulge de monaci, i à roinà sù dut proprio con cativeria, se l vesc, aló de segur i cinesi no i à fat giust, dapò i fajerà ben ence robe polito, giö no sè, ma aló l’é proprio chiar che i voleva destrujer la cultura di tibetegn, chel popol puret che l’era colassù che no l ge fajeva del mal a nesciugn. I völ proprio i far fora. Pecià. Dapò son jita ence a Mosca, con n viac organisà e soraldut son jita doi oite en Africa, n mes en Uganda e n mes en Somalia, da fratel Elio Croce e da Don Elio Sommavilla, dapò son jita en Bolivia a 4000 metri da suor Clelia. I viajes più bié l’é stat zenz’auter chi che è fat te le miscion: aló to vas int subit te la vita de le persone, del popol, perché l miscionarie l cognosc duc e l va da duc, e a jir con el se vif la vita vera de la jent di posć.

Che nisciugn me toce i miscionaries!
L’era amò i egn ’60 o ’65 che a Moena l’era 7 o 8 miscionaries, dapò valch un l’é mort. Per i aidar tireane sù le massarìe che maneane via, ma ence carta, viere, e i jovegn ne aidava, bastava ge dir te chele giornade che bineane sù, e i vegniva semper, ence se dapò tel rest de l’an no i vedeane più. A far le esperienze mingol forte de le miscion tu veje che ge völ saer se adatar. Tu veje che l miscionarie no l se tegn nia per el, no l’à mesura. Che no i me toce i miscionaries, perché devente cativa, no azete che nisciugn die mal di miscionaries, percheche è vedù come che i vif e a chel che i renunzia... Me recorde demò l’èga, en Uganda, che se cogneva jir al poz, se la tirar sù, jir te cojina a la far boir, spetar che la se sfreide e dapò finalmente se podeva bever n bicer de èga... da cheste pìcole robe se capesc trop, l’é ben per chel che ge volesse le far da jovegn cheste esperienze, canche tu vegne a ciasa e tu verje la spina vegn ju l’èga, tu capesce tant che le é emportante e preziose certe robe. Star en miscion più de chel mes? Scì, me aesse piajù trop, ma se tu vas con valch capazità concreta, desche infermiera o medico, tu aide dalbon, se no l’é esperienze che te joa più che auter a ti per emparar.

La vita la é bela e l’amicizia fondamentala
La montagna la me à regalà momenc maraveosc segur, veder l sol che vegn sù e ensema la luna che va ju, co la moza sot int e le crepe che vanza su, e tu co le lègreme che tu ciante l Magnificat... l’é spetàcoi che no se desmentia, però chel che te resta amò de più, più che l percors de le vie, l’é le persone che à fat chele vie con te, l’é i amisc che resta. Canche se à na certa età l’é proprio bel aver tenc de amisc. Pense che na persona la se sent sola se no l’à enteresc, se no la sent che zachei ge völ ben. Pense che te n paes, se un se sent sol l’é fosc percheche l völ, perché se tu vas fora da usc a pe tu scontre diesc persone demò a jir a tor l pan o l giornal. Te zità l’é desferent, aló se padisc de più de solentum. Se tu tu vas envers i autres, la jent respon. Giö ence ades che è cent egn prest empare tant da miöi amisc, da chi che scontre, ence da chi che scoa sù enlongia strada. L’é n mulge de bele persone a chest mondo, e dute le te dasc valch se to es bon de le scoitar, i te ensegna. No sion più bogn de scoitar, me mete ben davant. Pense che ogne tant sie giust tajer, l’é tante, massa parole en giro, e no l’é più nesciugn che scoita, enveze saer scoitar l’é na gran roba. Canche to vas a troar na persona no to pode ge dir chel che l’à da far... almancol giö crese... l’é da jir e emparar a scoitar, se se völ crear n raport, se no no pol esser n raport che dura tel temp. Canche l’é stat l’azident sun Marmolada che l’é mort l Marco, te chele ore giö è pensà a tantiscime robe, è pensà per ejempie che no tu es patron de toa vita, pol sozeder che da n moment a l’auter to te n vas e basta, e per chest ogni dì, ogni moment l’é emportant. È emparà a tor demò l prejent, che doman no tu sas, e da aló è proà a viver a na vida più fona, più intensa, a pensar a le robe che conta e no a le stupidade. E canche se é velges e se sà che se va envers la mort, ge völ star più ascorc a certe robe. Giö ge pense a la mort, ge è pensà ence ancö. È ben mìngol de paura, ence se fosc se à più paura de le malatìe che de la mort, però la mort te fasc pensar soraldut a cotant bela che l’é la vita e tant emportant che l’é viver. Ence jir a crepe te ensegna chest, la precarietà: basta n sas per finir dut. Ogne oita che ruave ju de retorn pensave: che bel che l’é esser vives!

Na “zitela”... con mingol de rempiant de no aver fiöi
Percheche son restada “zitela” e? Giö de 18 egn me è enamorà de na persona e son restada semper con chela, m’è proprio enamorà. N’era ben de autres che me sgolava mìngol dò, ma no son mai stata bona e... son ancora chigiò che spete! L Dario l’é mort canche aeve 32 egn, e giö dapò se me è troà davant da zachei no son stata bona de no far confronc... coscì ge son semper restada fedele. Rimpianc? Na. La familia l’é n valor enorme per la persona umana, soraldut per la femena, però piutost che dir “me fae na familia con na persona che no ge voi ben”, sol per me far na familia, no son stata bona. Me endespiasc no aer abù fiöi, perché per me, e pense per la maor part de le femene, ence se è amiche che me disc de no, soraldut canche rua la menopausa, se sent che se à perdù per semper valch. Se no aesse abù tenc de enteresc e tenc de amisc fosse jita en criji de segur, percheche la mencianza de n fiöl l’à de gran ripercuscion fisiologiche e psicologiche. Per chest giö ge die a duc “enjegnavene fiöi”, ence ai sciores che vegn chigiò... te chesta ciasa n’é stat generà più che un, perché ge fajeve n ciau coscì, e preave ence... l’era doi sposc che i era maridè da 14 egn e no i aeva fiöi, e ela la é restada proprio chigiò... è amò le letre de rengraziament... se sà ben che l’era na situazion più sorida, en ferie se é più rilassè, aboncont giö pree, pree semper ence per i jovegn sposc, che dapò no conta nia jir a dir “chisc jovegn coscì e chisc jovegn colà”. Na zitela che podela far de auter? Giusta prear!

Autora

Lucia Gross
Diretora responsabola

Fia de genitores fascegn e cresciuda tel Trentin, fora de Fascia, son enciasada da 30 egn te chesta bela val ladina, a Poza. Scrive per ladin da passa 20 egn, desche coordenadora e responsabola de la redazion de Fascia del sfoi “La Usc di Ladins”: del 2012 son doventada giornalista profescionista fajan l’ejam de idoneità a Roma, per ladin. Me piasc chest pìcol e glorious lengaz, e me piasc ... >>