Mariangela Bruneri, nasciuda ai 25 de oril dal 1944, l’é la neza de Tita Piaz. Cresciuda anter Busan e l Vajolet da beza, anter Busan e l Pordoi da grana, la ne conta zenza coltrine e mese mesure sia vita de tenc bie baticheres. Na rìsola colorada su l’amor, coche l nasc e coche l pel morir, de storie longe e de storie curte, romantiche, feruscole, sconete, platoniche. Dute bele. Na fenestra averta su la vita de na femena che no scon nia e che la ne dasc l met de veder da vejin la vita sentimentala de na tousa ti egn ’50.

Mariangela, chi él stat to prum gran amor?
L prum amor, mie grandiscim amor, aea inom Mario. Tinpruma l me fajea mingol balar ajache l n’aea dotrei, fin canche son stata bona de l’aer demò par me. Ere coscita enamorada de chel bez! Dapò l’era ben feruscol vè, vigne porta e porton l’era sò! E na outa l me à ence rasà daldut percheche l dijea che aee i poies…
I aeeste dalbon, e?
Ma na na, ma el me volea zenza peiles e dapò me fajea na gran piza canche i crescea da nef…
Co él fení chest gran amor?
El l’era massa gelous... dapò l’aea la man forta e valch outa la ge sciampaa. L vegnìa a me controlar sun Vajolet, l restaa fora dal refuge per ore a la longia a veder chel che fajee. Se l vedea che rejonae con zachei dapò l me fajea l “terzo grado” e gio zacan m’é stufà. Peissete che doi dis dant de me maridar l me à cerí e l me à domanà se sciampae con el! Sò mare, amò en pont de mort, l’aea l teror de me!
L second gran amor?
Silvio. Son sciampada dal Vajolet par jir a l troar sot Saslonch. Son vegnuda ja Pera a pè, dapò con zachei e autostop son ruada fin vin Gherdena e dapò sù a pè e l’é spetà vindò n sas. Canche l’é passà l’é chiamá. L se à sperdù. Gio ere beza e el l’aea ja 24 egn e no l volea storie che l’era n melitare. L me à metù sun Vespa e l me à portà de retorn. Fora Pera me spetaa mie pare che con cater peade tel cul l me à fat jir coran de retorn sun Vajolet.
Amores platoniches n’aste abù da beza?
Ei, n grumon. Me recorde Silvano ma el l’era semper a messa e dapò amò a messa, ence dant de jir coi schi l jia a messa… m’é stufà sobito. Dapò me recorde de doi todesć, duc doi ja morc. Un, Klaus, l me piajea dalbon ma el no me vardaa nience e dapò Ingo che l sonaa la chitara e l me fajea proar de gran emozion. Dapò ence un da Verona che l me portaa via per l Santner a veder l panorama, ma se mie amor l’era platonich chel sò nia daldut! Mort ence chest. Diste che porte sfortuna?
Per esser i egn Cincanta t’ere belebon ledia de viver chisc amores e fosc tu jie ence contra na cultura che no pervedea chest met de viver. Èrel rebelion la toa?
Mia mare la era n muie severa e dut l contest l’era n muie tradizionalist. Me recorde che la me manaa a scola co le ciauze de lana che fajea la giava da Pera e me tegnìe demal. Coscita a jir a scola me mudae le ciauze de lana con chele de nylon e i ciuzé dal tach che Licia Soraperra la me lasciaa te n ciamp, sconete sot n alber. Ma se per cajo mie pare vegnìa a me tor a scola... el l vedea pa ben le ciauze e i ciuzé ma cogne dir che l me tegnìa la sćiala, l me capìa. Mia mare me aessa volù con cinch lauree e n lurier de nonzech. Ma a mi no me piajea studiar. Volee doventar infermiera. Canche é podù jir a scola a Maran – e ere ence brava - i me à manà demez percheche ere massa viva e feruscola, ma descheche son semper stata! Fin da beza.
T’ere dassen n spirit ledie!
Ere coscita e bon. Peissete che en seconda elementara aee trat l ciapel del maester de religion, n preve benedetin, ju per closset e spenjee e spenjee percheche l jisse do l’aga ma no l jia… A oute, sentíe mia mare che dijea, desperada: “i me l’à baratada te ospedal chesta beza!”
Èrel te chi tempes ence de autre beze che aea na vita – dijon - “libertina” o èreste la soula a rompir tabù de amor e ses?
Siane ben de pece enlouta… l’era amò i egn Cincanta e prumes egn Sessanta, tu cogne capir i tempes. Ma jie pa a messa ence gio dute le domegne e jie ence a me confessar. Ge dijee chel che fajee coi moroji (ma a la dir duta no me sentìe pa en colpa per nia), ciapae da dir sù i scioliti Pater, Ave e Gloria e dapò jia inant dut desche dant.
Che èrel pa che te fajea enamorar?
Me enamorae de na persona da la veiada. Sentìe i pìcoi pavees tel venter, descheche se disc, canche chesta persona me vardaa. Dapò me engaissaa la ousc, sensuala, bassa, fosc più che la parbuda fisica. Sentìe zeche da ite da coche i me vardaa e da coche i me vedea. N’outa l’era proprio bel, no crese che aldidanché i sie amò bogn de sentir dute chele emozion.
E tu co fajeeste a far enamorar?
Na outa un me à dit che l se à enamorà de me da coche magnae.
Canche un l te piajea ma tu a el enveze no?
L’é ben sozedù ma canche capíe che no l’era verso lasciae esser.
T’aste mai domanà percheche tu piajee coscita n muie?
Peisse per mie spirit ledech, algegher, lighertin. Ma ence ajache ere la neza de Tita Piaz, la fia de Pia dal Vajolet. Raprejentae n muie de robe. Ere n spirit ledie, rebestech, anticonvenzional. E chest piajea. Soraldut te chi tempes.
Ma canche te ferata te à tacà boton Spadolini [l politich] no l podea veder che t’ere n spirit ledie….
Ere ence belota enlouta. En chela di ere eleganta, vegníe da retorn da na beliscima setemana passada a Roma con n beliscim amor e chesta legreza chi che te é apede i la veit. El l’à vedù chest.
Co éla stata?
Siane su la ferata per Busan da Roma. L me passaa sot man pìcoi biliec. Dapò canche sion stac a Bologna l’à manà le vardie dal corp a se tor zeche da magnar e l me à domanà olache jie e se volee jir a cena con el. Ge é dit de no. Dapò la di dò l’é ruà n beliscim maz de fiores e l’envit per jir a cena jun Busan. Ge é dit amò n’outa de no. No me enteresciaa. Ere massa contenta con chel auter. Demò da sera a la tv é capì chi che l’era…. gio enlouta no me cruziae pa tant de politica.
Can nàscel pa n amor?
Te chel moment olache manco tu creis tu scontre na persona che la te fasc bater l cher. Pel esser n joen, n veie, n bel, n burt. Ma te vegn l baticher.
Che se fàjel enlouta?
Se lascia che l bate e se l’é zeche da bon se se lascia jir.
Ence ades?
Ades l’é egn che no é più nesciugn e no voi più nesciugn. Son contenta coscita e stae ben coscita. É vivù na vita piena e no me n’é recor de nia. Cogne dir che me endespiasc se valgugn à padì per chest mie esser ma a vardar endò se veit che la cognea jir coscita. Ma no l’é pa dit: magari pel esser che na di o l’autra troe ‘l’anima gemella’!
E se chesta anema aessa 30 egn?
Amò miec! Chi de mie temp i me sà massa veies! Fossa proprio bel. Fossa da grignar me sentir dir: “Vosc fi me à dit…” e saer che l’é mie om!
Coluna él pa stata la storia più bela?
L’é dut stat storie bele. De duc i autres é dut bie recorc. Chela de Mario, la pruma gran vera storia, che bela! Me recorde che na outa d’istà son vegnuda ju dal Vajolet e son jita a l spetar fora da la frabica de acial a Busan olache l luraa d’istà. El no l me spetaa e canche l me à vedù se aon fat n braciacol tant strent e fort che amò recorde chela emozion! De Almo ence é de bie recorc. S’aon maridà che ere proprio joeneta e aon abù doi beze ensema che ades le é grane.
Co fenìel un amor?
Bastaa che un fajesse n fal de ortografia e l me jia debot ju da calandar! No podee tegnir fora na persona che scrivea mal! Ma la fenìa ence se i dijea mal de mie amiche, se i me tolea la ledeza de aer mia vita e mie amezizie… Canche i volea me cambiar. Ma ence canche i dijea zeche contra mie fie. Ma soraldut canche i volea me tor mia ledeza.
La storia più longia?
La storia più longia con chel da Unejia, cinch egn.
Chela più curta?
Crese che sie stat chela con chel da le casse da mort. Fenida demò parcheche sò femena aea capì ‘l’affaire’… doi meisc en dut.
Chela più particolara?
Con un che se dijea gay ma gio no ge é mai cherdù.
Amores con femene?
Assolutamenter no!
Ses estrem?
Mai!!!
L’ultim amor?
Un da Genova.
Na storia zenza adie?
Con chel da Roma. Che pascion!
L’om più enteressant che tu as cognosciù?
Chel da Roma.
La femena più enteressanta?
N muie. Ma ades desche ades, mia amica Nadette Bertolini da Ciampedel.
Che pèisseste canche díe ‘enteressant’ per n om?
L met de esser, de viver, de se prejentar.
E per na femena?
Na vita piena de enteresc e de atività, l’esser bona de star en pè da soula, l’indipendenza te dut.
Aste n muie de amiche?
Tropes amisc e amiche. Ge dae n gran valor a l’amezizia e crese de esser na bona amica ence gio. Varde de esser semper canche le à de besegn e me piasc che le sie canche gio é de besegn.
Veiste amò i veies amores?
Na, canche na storia la é fenida, la é fenida. Però n muie me chiama per me far i augures canche fae i egn o per autre ocajion. Con Almo, mie ex om, son semper n contat e sion ence bogn amisc. Se vedon e se la conton ence perché so femena la é proprio valenta e da ferstont. Ence con ela sion en muie amiche.
Zeche par serar sù chesta ciacolada sun enamorament, amor, ses e sentimenc?
Dut ta la vita śira entorn a chisc. Fajesse dut da nef e son contenta de aer podù far chel che é fat. No me n’é recor de nia. É arjont na bela serenità e son contenta de mi vita. É dat n muie e ciapà amò de più de retorn. Stae proprio dalvers e me piajessa che autre parsone proasse chest sentiment de serenità.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>