Chel tel Giapon l’é stat n viac che l’é scomenzà n bon trat dant de partir e no l’é amò fenì. Un de chi viajes che tu cogne lejer e te enjignar dant e amò no tu capiras . Un de chi viajes che lascia dò per n bon trat energìe e neve maniere de esser, ence na outa de retorn.

Posse scomenzar da la fin e dir che, scheche son ruada de retorn te Fascia, é tacà a svetar ciasa dal da ite. É tout fora dut da armeres, da scatole sot i lec, da vedrine de ciasa da fech e é tacà a dezider che che dore, che che podee trar demez e cheche podee dar via. Descheche é cognù svetar mie ciaf per proar a capir l Giapon, é svetà ciasa per me capir miec me, na outa de retorn.

É segnà l’itinerarie dant per didar zachei che magari vel far l medemo percors e no l sà co se endrezar e percheche no posse spartir chest reportage per “posć” , ma cogne l far per esperienze, o miec, é dezidù che le trei part le arà l’ inom e mìngol de ànema de trei femene che é scontrà. De n viac anter la jent voi rejonar e no post dò post, zità dò zità. L’é n itinerarie n muie pien e se vegn de retorn belebon stencé, ma segur se pel far dut ajache tel Giapon dut va dalvers e giust, le ferate le part al menut e se troa semper valch da magnar dutintorn, san e bonmarcià.

Volesse proar a contar cheche é vedù de gra a chi che me à didà fora te chest Paìsc: Akiko, Ryuko, Matsue, Pablo e soraldut… Angela. Di etres rejonaré man a man, ma de Angela die ades chi che l’é, percheche, se no fossa stat ela, aesse dat fora da mat ja la pruma sera a Tokyo. Angela Terzani Staude l’é la femena de Tiziano Terzani, che l’à contà di 5 egn che i a vivù tel Giapon tel pìcol liber “Giorni giapponesi”. Me é tout dò chest liber te mie viac e el me à spiegà n muie de robe che vedee e ence chele che no vedee; donca Angela la me é stata apede te ogne mie dì giaponeis. Sarà Angela a me spiegar percheche i omegn sul marciapè de le strade de Tokyo, da sera, i fasc mena de jiar a golf, senza maza ne balote: i à tant la gran prescion per la partida de la domenia col capo che i proa e i riproa i movimenc sot ciasa. E sarà amò Angela a me didar a azerar dut che che cognoscee da dant e lasciar l Giapon vegnir ite.

Ei, percheche la terza dì che ere aló me é retroà piena de informazion, mìngol chele mie, de mia cultura de origin e ence de mi etres viajes e mìngol chele neve che l Giapon me metea ite e che someaa esser dut l revers de che che saee da dant. L’é stat Angela con so liber a me dir che l’é normal e ensema aon capì che l’unica soluzion l’era se svetar, lasciar che l Giapon fajesse te nosc ciaf so mestier, no giudicar, lasciar esser, copiar chel che fajea i etres, domanar perdonanza (SUMIMAZEN tel lengaz del post) ajache se fasc semper zeche da falà e vardar che che sozet.

L’é na cianzon che va benon per i viajes te l’Asia e per chel tel Giapon amò de più. L’é “Across the Universe” dei Beatles, canche la disc “nothing’s gonna change my world”, nia mudarà mie mond, che se pel lejer desche: gio son semper gio ence te n post olache dut somea jir a la reversa, gio son semper gio, l’é che son desche l’aga, posse ciapar la forma miora per l post olache me troe te chel moment.

1. AKIKO.

Coche rue a Tokyo me fae na pìcola raida al ciastel e si vidores per veder la Sakura, la fioridura di albres de ciarejie, ma da le sie rua ja Akiko a me tor. L’é n’amica de n’amica che l’à intenzion de me menar stroz vigni sera a Tokyo (gio no l sé amò).

Mia pruma sera donca vegne petada te n grop de giaponeisc che vel far ejercizie de ingleis e duc volarà rejonar co me. Gio no capesce nia, é l fusc orarie sbalà e me troe a magnar con doi bachec e a chejer salata e ciarn cruva te aga boìda śala e resa. L’é l SHABU SHABU, che dapò fossa el rumor che fasc la ciarn che se chesc te l’aga endana che tu la meve en ca e en là coi bachec: sciabuuuu sciabuuuu.

Akiko la vif soula te na ciasa de Tokyo tant pìcola che no la vel nience me la mosciar. La leva bonora da doman, la laora n muie e da sera la magna beleche semper stroz. Ja da la pruma rejonada capesce che sie conzet de ciasa no l’é l mie. Ela la la dora sche n post olà dormir. Per me ciasa l’é n post segur, l’é mie post.

I rua duc spaviesc chisc neves amisc del Giapon che cenarà co me, ma dò valch bira somea dut de autra jent e dò aer magnà i me mena stroz per bares. Endana i me spiega che dant da le 6 da sera i é duc scheche se i veit stroz, no i disc nia, duc regolé valives, demò lurier. Dò i cogn sfogar fora e l’alcol l deida. L tegnir fora l beiver l’é na calità te chest Paìsc. “Beiver ben”, per ic no vel dir n bicer de vin bon, ma vel dir tegnir fora duta la bira che l’é possìbol zenza zeder.

Vedaré Tokyo al scomenz e a la fin de mie viac, da vidores beliscimes a ofizies turistiches con n robot al post de na femena, da tempies maraveousc a bares olache bezate regolade da chèlera de l’800 te mena a beiver valch e le te petolea mesora, le te la conta sù. I “maid Cafè” i é nasciui aldò de la gran solentum di giaponeisc. I va aló e i se compra mesora de compagnìa, finta, ma compagnìa.

A Tokyo l’é ruves de jent dutintorn: l crousc de via de Shibuya, olache i ferma el trafich te ogne cianton per far passar la jent e l parch de Ueno, olache duc i va a ge vardar ai fiores: jent, jent dutintorn, ma nesciugn che se rejona. Duc i somea soi.

Che che é podù emparar dal Giapon l’é la desferenza anter “pazienza” e “saer spetar”. La pazienza la é, ma l’é dassen l saer spetar che tel Giapon l deida. Ge vardar ai etres dant de far valch, no dir fora dut te n colp, ma pissar dant de rejonar. Na bela proa per me che die semper dut fora dret (ence massa!).

Angela la me spiega che tel Giapon la jent la vegn educada coscita, che la spontaneità no la é veduda trop dalvers, che l’é regole che ge vel respetar, ence ti gradi de tant che se cogn se piar jù canche se fasc na reverenza. La me spiega ence che, per grazia, a noi, jent europeaana, i ne scusa mingol fora se no fajon dut giust. Donca l’é de gra a Angela che proe a capir percheche l controlor de la ferata l fasc na reverenza dant de jir fora de mia caroza e ence percheche Akiko, canche la rejona ingleis, la domana perdonanza vigni doi menuc: la dora la parola “scusa” sche se fossa n intercalar de so descors.

Dò Tokyo vae encontra a n mie ensomech da beza, el mont Fuji tel raion de Hakone. Na marevea. Pissae che aesse stentà a ruar, ma chiò dut va aldò, l’é na pìcola ferata che va su anter l bosch, dò na forenadoa e, amò dò, na cabinovìa sun dopia corda che rua te na val vulcanica: a man dreta se veit vamp che vegn sù da tera e, a man cencia… velo ló, l Fujisan. Canche son ruada te aeroport a Tokyo me à intervistà la televijion del Giapon e i volea saer percheche ere aló. De istint ge é responet per l Fuji. I me à domanà se no n’aon monc te la Talia e ge é dit de scì, che gio vegne dai monc più bie del mond, ma de crepe no son mai stufa e star te dant al Fuji l’é dalbon na emozion forta per me.

2. MATSUE

Te stazion de Osaka cogne mudar ferata per jir a Hiroshima. Ge vel ciapar n lift e ge tegne l’usc vert a na segnora de età che rua mìngol dò da me. Na outa te lift la me varda e la me domana per ingleis da olache son. La rejona n muie pech ingleis, ma proon a se la far ca a valch vida e capion che jon dute doi a Hiroshima e nesciuna de le doi à resservà l post: donca sion ensema te la caroza nr 3, chela per chi che no à resservà. Fajon noscia pìcola couda dant che rue la ferata e se senton jù apede. Me fae doi conc de tenc de egn che la podessa aer e capesce che fazilmenter la era beza te chel an de la bomba atomica de Hiroshima. Rejonon de auter, la scrif mie e so inom te doi sort de scritura giaponeisa e per cineis e la me conta che ela la vegn de retorn da n viac per jent en penscion. La é stata 5 dis te la Grecia, la me moscia foto e n passaport strapien de stèmpei de chisc viajes de grop tipics giaponeisc. La me disc che a ciasa la n’à n auter pien e che ades la cogn far so terz passaport e, che la é nasciuda del 1936.

Me peisse co far a domanar senza esser agressiva, ma é la fortuna de aer apede zachei che pel me contar da sentadin normal coche la é stata ai 6 de aost del 1945 a Hiroshima, canche i à vedù chel gran soreie ge sutar ados.

Con bela maniera e giran mingol dintorn, descheche se fasc tel Giapon, rue a ge far capir che volesse saer de chi dis de la bomba. La me conta che enlaùta ela la stajea fora da Hiroshima, per grazia, ma che dò mìngol de temp so scola se à svetà. N muie n muie de bec morc de leucemìa. La me disc che ei, l’é stat n burt moment, ma che ades Hiroshima la é beliscima, duta neva e piena de energìa. Endò chest sutar al present de la jent del Giapon, che per me, che vegne da n post de tradizion e da n Paìsc pien de storia, l’é dalbon cert.

Matsue la fasc de de dut per me mosciar da fenestra de la ferata n ciastel. La leva en pè, la fasc sentar apede me n om che l podessa me mosciar miec, ma dut chest per me dir che duc i ciastìe del Giapon fora che un i é stac restauré, i é en pratica neves, no antiches, ma segur bìe.

Desmonte te sta neva Hiroshima embendapò e, ei, l’é na zità lumenousa e neva. A mie eies beleche finta a saer che che l’é sozedù e soraldut a ge vardar al parch de la pasc, al museo de la vera, a la sala de le conferenze restada en pè, svetada dal da ite da l’esplojion. L post olache vae a dormir l’é vindò l’ipozenter de la bomba atomica, tacà tel parch, cogne ge passar te mez. Me aea sapù na bela roba canche aee prenotà, ma son giusta ruada e son ja che pianje. L’ostel l’é pien de americhegn, che te dut el Giapon no l’é che n’abie troà n muie. I va tel Vietnam o mingol stroz per l’Asia e tel Giapon i passa demò da Hiroshima, ence ic a cerir so storia.

Te dant a Hiroshima l’é valch che te fasc desmentiar l despiajer e le domane: l’é Miajima, na ìsola pìcola e piena de tempies e natura, olache se pel renvegnir mìngol da pensieres de vera e dessatament e dal pensier che, anchecondì, soraldut vindò n computer, i somea amò duc più eniré, più catives. Miajima la me fasc desmentiar per n moment che no aon emparà nia da noscia storia e che aon portà dant più l burt e la ira che l bel e l’amor.

Angela endò la me deida canche la me conta che ence per ela Miajima l’é stat n moment lijier anter dut el peis che se tol dò Hiroshima.

La dì do vae a Osaka olache stasc da cater egn en ca n mie amich spagnol, Pablo. Per ruar a Osaka monte sun na ferata de color violet, zenza me domanar massa percheche la é de n auter color. Sobito capesce che l’é valch da desvalif: la jent la fasc foto, passa joegn che tira sù le coltrine a cerir valch e l’é scrite che somea rejonar de roba da gejia. Sta outa cogne jir su internet per capir che ferata che é ciapà. L 500 TYPE EVA PROJECT l’é la ferata de “Evangelion”, n personaje di popes animé, o, dit de miec, di ANIME. La ferata de la medema sort che ruarà dapò sarà chela dei Pokemon (amancol aesse capì che che l’era!). La jent la se resserva cheste ferate ence doi egn dant percheche l’é sù l’animazion e vegn let tòc de storia endana che se va…che da grignar: ogne stazion l’é aló jent aposta per veder passar la ferata e far foto. Pablo da sera l me mena te n post pien de pìcoi restoranc dò strada: endò l Giapon l me recorda che sion te l’Asia. Dut tecnologich e che podessa somear ozident, ma dapò se cena te chisc posć che l’é sche n “souq” fat e fenì, sche tel rest de l’Asia e l dì do i me scrif ite n biliet de la ferata a man. Sion te l’Asia e per tant che i proe a te l far desmentiar l’é momenc che la sauta fora con duta sia potenza e, a mi, me sà n muie bel.

3. RYUKO

Te stazion de Kyoto na sera é apuntament con Ryuko. Gio vegne da doi dis sul Koyasan, l mont sènt, olache son stata en pasc e te l’acort. É dormì te la forestarìa de n tempie, n monech l me à portà da cena e da disnar te cambra dò che é partezipà a le orazion buddiste de la bonora. Rue a Kyoto da na parentesa de calma, e rue endò te anter na marea de jent dò aer godù l’acort, chel ver. Chest mescedoz de tradizon e modernità che é vivù sul Koyasan me recorda dute le religion del mondo. Canche dapò vae te n museo a veder l cader famous del Nirvana del Buddha che i met fora demò ogne trei egn, l ge somea trop a le raprejentazion de l’ascenjion de Gesù Crist. Pech da far, sci trop desvalives e sci trop valives.

Son contenta de aer destacà dut anché: fonin, rejonade, ciaf. Per na dì me n stae da soula te chest acort e en vegnarè fora neva. Son passada te na cortina de 2 km, son stata demò con me, jita te tempies, cenà e disnà soula te cambra, vardà vidores rencuré scheche no é mai vedù e, fosc, capì l valor del vet.

Na outa a Kyoto, scheche dijee, Ryuko la me trasc sobito tel mond zitadin del Giapon. La me mena a magnar Teriyaki, gialina rostida, e tacon a ciacolar del più e del manco. Gio proe a jir tel fon e, coche ela la se verc, la taca a me rejonar de so robe private e a me dir che con soe peconte del Giapon no la pel contar dut, percheche te la vida de se rejonar, de jir fora, l’é dut vindò leames de la sozietà che ge vel respetar, gerarchìe a chele che ge vel star ascorc a no ge passar sora. Per grazia Angela la me à ja rejonà de chest, e ence mingol Pablo, donca me spetae n descors coscita.

Kyoto l’é una de le zità più enteressante che aesse mai vedù: l bosch de bambù de Arashiyama, l cuert de òr del tempie Kinkakuji e la beleza, chela scempia, de vidores de sasc e piante, la “wabi sabi” del tempie Ginkakuji.

Vae tel bosch de bambù, chel più turistich, ma coche l’é fenì veide n vial che va su per n col te anter i albres. Ciape l vial, voi veder posć olache no l‘é massa turisć e son curiousa de saer coche i tegn l bosch tel Giapon.

Seghite a jir ence se no l’é jent e son dò che me perde, ma l panoram de Kyoto da l’aut l’é na marevea e chest bosch l me piasc. Da zeche ora, veide n vial che va n jù e dezide de l ciapar. Ora che rue junsom me troe sun na outa a comedon de n pas da mont e google maps (che zacan l ciapa endò) l me disc che son dalonc 5 km da olache cognesse esser. No passa nesciun ne co l’auto ne a pè, donca me n’arloe ju per strada. Canche taca a se veder dotrei ciase, scontre n segnor che mena a spas l cian e proe a ge domanar a el. L rejona benon ingleis e l me disc che ei, son dalonc, ma che podessa dalbon me piajer jir de retorn a pè e che, ogne tant, se perder pel portar de gran bele robe. E de gran bele robe vedaré. L’à dalbon rejon. Passe anter picole ciase, jent che laora ti ciampes, tempies no turistiches. Veide zacan l’umanità del Giapon, chela che cerìe, i ritmes de vita normai, pecia jent, ma duc a la leta per me didar a troar la strada. Ciao google maps, rejonar con sta jent me sa trop più bel!

Da Kyoto vae ence a Nara, al de fora di posć più cognosciui; dò esser jita a pè mesora, troe n tempie, l tempie de le femene, olache pecia jent rua e che a mi me sà el più imprescionant de duc. Che marevea, pecià che no se pel far foto dal da ite, ma l’é 12 statue granace a vardar via el tempie. No se pel descriver.

Kyoto l’à na dimenscion più umana che Tokyo e, enlongia n ruf, posse ence far la “promenada del filosof” anter doi tempies (Nanzen-ji e Ginkaku-ji) e, envers sera, vae a me goder Gion, l quartier de le geishe e de la vita.

L’é i 21 del meis canche lasce Kyoto e son tant fortunada che l’é l dì del marcià de le robe durade te piaza del tempie Toji. Chiò nia l’é perfet, chiò l’é jent de ogne sfera, le regole le é mìngol manco forte, confujion te l’acort, perfumes e órden, sacral e profan. Te dant n tempie tanta de bela umanità a vener robe veie e magnares!

Dant de jir de retorn per mi ùltimes dis a Tokyo, vae na dì a “Kinosaki onsen”, n paìsc de Terme turistich, ma soraldut per la jent del Giapon, no per i foresć, e se l veit sobito percheche chiò nesciugn rejona ingleis, nience mìngol. L’é 7 bagnes e voi i proar duc, ence se é demò na dì, più che auter per veder la reazion de la jent canche la me veit jir ite me, bèleche soula foresta. Sarà reazion desvalive, ma le più bele le aré ti bagnes più scempies e pìcoi, olache le giave le mena le beze pìcole e dute le se la conta sù. Son stata tirada ite anter na grignada e l’autra ence se no capìe nia de chel che le dijea.

Tache a sentir la fadìa de cheste relazion umane, dute vidade da regole. Mencia la spontaneità, no i pel se la permeter e, canche a mi la me sciampa de istint, i resta duc de sas a me vardar.

De retorn a Tokyo tache endò a jir a pè da na man a l’autra de la zità. Posse passar da n post a la veia a n cianton de lus olache, se tu cuche te le vedrine di restoranc, i magna duc con pirona e cortel per far “i ozidentai”. Passe dal biteboi de Akihabara, la zità eletrica, a na picola via olache vegn fora mùsega rilassanta da autoparlanc taché sù sui lampiogn. Passe da Odaiba, so mar, so statua de la libertà, a Kabuchiko, l cianton da le lum rosse: chiò l’é ence n restorant olache te serf doi femene-robot en bikini. Chest viac l me à metù a la proa: son stenciada tel corp, ma soraldut tel ciaf.

A Tokyo da sera troe da nef ence Akiko e valgugn de si amisc, i me mena te n restorant tipich e i me disc che vegnarà fora a saludar n personaje de le contìe del nord del Giapon. Canche l rua grigne doi ore: l’é n Krampus! Fat e fenì. Giusta a me dir che te dut el mond se pel troar tòc de ciasa.

L’à dalbon rejon Angela, ma ence i Beatles, sun na roba che val tant per i viajes tant per la vita: demò canche no se se recognosc più ge vel mudar, nosc mond sion dant de dut noi.

· Angela Terzani Staude – “Giorni giapponesi. Incanti, enigmi e contraddizioni di un Paese che non smette di affascinare” Tea Trenta Edizioni 2018 (pruma edizion 1994)

· Beatles “Across the Universe” 1970

Autora

Luisa Bertacco
Colaboradora

Stae a Poza, te Fascia. Do na laurea en scienzes internazionales e diplomatiches e n master par ensegnar talian ai foresc ades fae jir en garni con mia sor e ensegne talian ai migranc che vegn te nosce val. Me piasc lejer e viajar, ogne neva cultura che scontre, ogne post nef olache vae. Adore magnar coche ven magna alò e balar che che se bala alò e, se son te n post desché volontadiva... >>