Balèr per se reconjonjer al divin no l’é nia da nef se se vèrda la storia di omegn e de la fémenes de chesta tera. Aer però l met de veder i “dervisces che roda” (na outa frati che jia a s’el preèr, ades più che auter laics, che ge va dò al pensier de Rumi, n mistich e poet de la religion islamica che à fat nascer chesta tradizion pech do el 1000) l’é zeche de unich, ajache la paroles e el moviment ritmich sun na musega veiora che porta chisc omegn a l’estasi la ciapa ite te na dimenscion duta particolèra. Ence chi e cheles che ge vèrda sora, ruè alò adinfal, zenza saer nia, resta fascinà. En Turchia, a Konya, i pascioné de formes de meditazion i pel se arvejinèr al sufism (la enrescida de la dimenscion mistica de la cultura islamica), troan no pa pecia analogies con la cultura mistica de la religion catolica (me vegn tel cef per ejempie Sen Jan da la Crousc), tel festival che vegn metù a jir via per dizember, ma che se pel veder dut l’an tel beliscim zenter dedicà al pensier Mevlana metù a jir apontin da Rumi). Na idea mingol neva per se fèr dotrei dis fora de anter, te un post olache i turisc no i é tropes e olache se pel descorir zeche da nef. En consei per jir a dormir: n hotel boutique, olache i tousc che lo manajea i ge va do a na filosofia managerièla zis particolèra, n muie “mistica” vegnissa da dir per restèr n tema (Hich Hotel Konya).

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>