Viajèr l’é zeche da bel, cognoscer e descuerjer storia e cultura l’é zeche che me dèsc gaissa de viver e desceida mie spirit curious. Viajèr dalonc, te Paìjes deldut desvalives dal nosc, me deida a me destachèr dai pìcoi cruzies o tran tran de vigni dì, olache se ceida perder la dimenjion de l'universèl e se se sera ti cater ciantons de cèsa o de lurier.
Viajèr vèlch’outa l’é ence sciampèr, ma per me l’é soraldut troèr stories, cultures e ritmes desvalives che me deida a descuerjer ence n'autra pèrt de me. Ultimamenter é dezedù de fèr curc viajes te la Tèlia, cognoscer miec èrt e cultura de chest Paìsc che aee viajà en lonch e en lèrch acà egn e dapò l’aee mìngol desmentià te sia beleza, fosc ence per sciampèr dal sofoament dat dal maraut de informazions su scandoi e gabolèdes de vigni sort.
Napoli, Firenze, Bologna e Verona l’é la zitèdes che é descuert endò da nef….na marevea te vigni cianton! L’architetura, l’èrt, la storia che se vif te chesta zitèdes, desche te autres te la Tèlia, l’é dalbon na fontèna de beleza che fèsc vegnir seit de saer, de cognoscer e man a man che se studia o che se domana fora la jent vegn fora n chèder che me empienesc de marevea ma ence de domanes.
Napoli, n zenter storich e na metró che me saea de esser a Oslo dal net e rencurà, ciantons e strèdes carateristiches zis enteressantes, joegn che rec picoi cartieres fac fora per fitèr cambres, cooperatives de joegn che endreza vijites a la Napoli sot tera…..storia, cultura, enventiva…. e no demò chela del jech da la trei chèrtes o de Totò che te venea festii.
Napoli aldidanché l'à ampò na forta coscienza culturèla e artistica olache, tel descuerjer la storia di poc da l’èga e di tunìe di Borbons, te vegn contà ence de coche dut l'era stat empienì de refudam e, acà vèlch an, na sociazion de joegn archeologs à dezedù de jir a puzenèr fora dut – zenza mai aer ciapà finanziamenc publics - e creèr n'atrazion turistica…..n viac te la storia de 2400 egn da l’epoca greca a chela moderna a 40 metres sot tera anter stoi e cisternes olache se pel veder i resć de n veior resservar da l’èga grech-roman, refuges antiaerei e adertura maraces de auti o moto che la polizìa metea via chiò sotite…..somea béleche na instalazion, ma l’é la storia de coche l'é stat durà chesta lèrch sot tera olache l'é vegnù lascià adertura n mont de refudames (bon che no i puza!)
Napoli dèsc segnèi concrec: la jent vel crescer, mudèr, aer n davegnir, se creèr n davegnir no demò col ge domanèr al Stat didamenc e assistenza ma col sporjer zeche da concret. Pìcoi segnèi che contrastea co la imajines che ge vegn dat a chesta zità, segur senestra, con livìe de dejocupazion n muie auc, malavita, gabolamenc de vigni sort,ma che la é de na beleza unica. Vardan l golfo de Napoli me vegn tel cef la “Tera di feghes”, l’entesseament, la speculazion, la coruzion ma, ades, ence si monumenc unics, palac comedé ma pech rencuré. Pompei, Ercolano…..che se demò i fossa te n auter Paìsc de l’Europa fossa na cassa bancomat che podessa didèr ben auter che la desgrazièda e desfrutèda “cassa del mezzogiorno”.
L patrimonie artistich e culturèl talian l'é dalbon unich e l'aessa da vegnir valorisà amò de più….Firenze l'é n'autra zità da marevea che paa la speisa vijitèr ence più outes, cuna de èrt e cultura rinascimentèla, l'é n spieie de beleza te vigni cianton e te chest ùltim viac la me à sapù dalbon ferùscola e dinamica. Apede Palazzo Vecchio, la galarìa di Uffizi, e duta la gejies, Firenze se averc al contemporan con mostres e instalazions modernes desche chela del cineis Ai Weiwei olache, anter l’auter, l palaz Strozzi enstes vegn durà desche instalazion con gomons checens taché sù dintornvìa la fenestres…zeche da cert che vel ne fèr pissèr dò a duc i migranc che rua adalèrch sun chi gomons.
Èrt, cultura, storia,vita e bon magnèr l'é chel che se troa ence a Bologna, zità che la é dò a se fèr descuerjer dai turisć con sia bela piazes, torns e béleche 40 km de portesc che i é stac candidé desche Patrimonie de l’Umanità Unesco. La basilica de San Petronio, piaza Maggiore, la torns…vigni cianton conta de storia e cultura tant da restèr béleche zenza fià tedant a n'architetura che l'é spieie de beleza. No l’é demò per contèr de ciantons artistics e culturèi che scrive chiò ma per pissèr dò e viajèr amò n'outa col cef te atmosferes e colores olache èrt e cultura à reijes sotes …tant che vèlch’outa stenton a les veder.
La Tèlia l'à n patrimonie artistich te vigni cianton e zità, apede o dalonc, desche Verona che con sia piaza Brà e l’Arena la dèsc vita a spetàcoi maraveousc, i scric de Shakespeare su per i mures, l barcon de Giulietta e Romeo, ciantons che fesc ruèr adalèrch schiapes de turisć da dut l mond. Se scomenzon a jir stroz con etres eies noscia Tèlia, sia belezes storiches, culturèles e artistiches, averc ence nesc ensomesc, noscia lum, noscia beleza…

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>