Senester contèr la fascinazion de Bali, senester spieghèr chel chiet che se sent daìte te chest picol cianton de l’arcipelagh indonesian…. Sorì l’é, perauter, lascer l cher aló, olache dimenjion terena e spirituèla se mesceida te n balanz armonious.

Bali l’é una de la passa 17.000 ìsoles de l’Indonesia, demò sun 7000 de chestes vif jent e, dut adum, l’Indonesia dombra na popolazion de passa 250 milions de persones. La Republica Indonesiana vegn al quarto post dò Cina, India e Stac Unii en cont de popolazion e l’é l più gran Paìsc del mond a maoranza mussulmèna. Purampò dut se poja sul respet e la costituzion medema perveit la libertà de religion: defat l stat-arcipelagh tol ite passa 300 gropes etnics, linguistics e religiousc con 742 lengac e dialec e l stèsc adum sot al mot Bhinneka tunggal ika (unii te la desvalivanza o miec “ tropes ma un”).
A desferenzia de l’autra ìsoles de l’Indonesia Bali, che à zirca 4,5 milions de abitanc, la é a maoranza de cultura e religion hindu. L’induism balineis Hindu Dharma l’é na sort particolèra de induism che tol ite la reijes animistes de Bali, l cult di antenac Pitru Paksha e l’à ence na vèrda ti confronc di Bodhisattva, i “iluminé” del Budism. N compendium de credenzes che ge dèsc a chesta ìsola n mus béleche magich, olache vigni aspet de la vita se spieia te na fona spiritualità.
Chiò con passa 20.000 tempies se veit man a man persones che prea o che enjigna cà e sporc ofertes. Vigne dì picoi cesć de foes de pèlma o pandan con laìte fiores, ris, sèl e incens
(canang sari, o sesajen) vegn metui sun sèva de usc de cèsa, tedant a boteighes o restoranc. Con fèr jentil e chiet i vegn pojé jabas, beleche semper da fémenes, a na vida scempia. N rengraziament per la dì che scomenza, per la pèsc tel mond e na curta meditazion/orazion che vegn fata da chi che poja l canang sari tedant cèsa ma ence sun strèda tedant la boteighes o auter.
Tel lengaz Kawi ca vel dir maraveous e nang proponeta donca l canang sari l’é ence na sort de oferta per l bon ejit de la giornèda.
Fosc l’é apontin chest che me à fat sentir Bali desche vèlch de spezièl: l’é n lech olache duc e dutes dedichea na lèrch a chisc momenc e i ge lo passa ence a chi che passa enlengia jù che no pel fèr condemanco de sentir la magìa de chest sentiment sot de noscia vita ciolèda a l’univers.
De chisc pìcoi cesć se n veit dutintorn e se risia enscinamai de ge pestèr lassora, ajache tropes i é bele te strèda…ma no ge vel se cruzièr trop, ajache col jir del dì i vegn schicé più outes! Ic no se cruzia, ma no ge vel ge jir soraìte con intenzion, ajache chest, aldò de la credenzes di balineisc, portassa desfortuna….
Son ruèda a Bali beleche adinfal de jugn del 2016, aesse volù jir tel Perù ma tinultima é dezedù de jir a Bali……. E che gran marevea! Se cognesse chierir fora na parola per la descriver dijesse segur “spirituèla” ajache l’é apontin zeche de sot chel che se sent canche se rua a Bali: na magìa fascinousa, jentila e chieta olache cultura e natura se spieia te n armonìa che dèsc pèsc. Seben che tel Sud sibie posć desche Kuta e Seminyak, olache l turism de massa à mingol dessatà chest’ènema jentila, l cher de Bali se l troa te la spiages chietes de saolon bianch de la penisola de Bukit o de la ìsoles mendres de Gili, olache no l’é auti o motores, te forestes olache èlbres e piantes cresc bie verc e ge dèsc alberch a scimies e a passa 300 sorts de ucìe, te spauches de ciampes da ris coltivé col sistem veior di subak olache passa 1200 sociazions de bachegn rencura la destribuzion democratica de l’èga.
N sistem enteressant, tant da se aer vadagnà l titol de Patrimonie de l’Umanità UNESCO del 2012. Ma l cher de Bali l’é ence ti vulcans che rua a passa 3.000 metres e ti tempies fac sù te posć da marevea. A Bali ence la natura à n segnificat spirituèl e religious e vèlch’outa se se embat te èlbres fornii su con sciai bienc e neigres ( kain poleng, n drap che raprejentea l’energia spirituèla) e l waringin ( baniano) l’é l’èlber balineis che no pel mencèr delaìte de la cort de n tempie. Te chesta pìcola ìsola vigni pìcol paìsc à sie pura puseh (l tempie de la origines) un pura desa ( l tempie del paìsc) e l pura dalem ( l tempie di morc). Ma l’é tempies dutintorn : en or sù i vulcans, ti leghes, su la costes e apede chisc vigni cèsa à sie picol tempie, na lèrga te la cort dedichèda a la divinitèdes, a la ènemes di morc e al preèr. Anter i tempies l Pura Tanah Lot l’é un di più emportanc. Fat sù sun n peron tel mèr, ma curious, l’é ence l Pura Ulun Danu Bratan su la spones del lech Bratan o l’Ulu Watu a stravert sul mèr te la penisola de Bukit. Chisc l’é i tempies con maora devozion e ence i più cognoscui ence anter i turisć, ajache sia posizion la é dalbon spetacolèra. Bali à abù sie gran exploit turistich di egn Setanta e Otanta del centené passà, soraldut per l mèr, l surf e sie bon clima, ma da n trat en ca vegn dò e dò più aprijià ence sie aspet spirituèl e artistich.
L’èrt del zipièr, depenjer, la danzes e la mùsega desceida enteresc desche ence sia terazes verdes olache vegn coltivà ris. Jir te galarìes de èrt o jir a pé te lesc chiec o su per i vulcans porta tropa jent a descorir etres aspec de Bali. Te Ubud, l zenter culturèl e artistich, se stèsc sorì e apede galarìes de èrt, boteighes originèles, bie posć familières olà poder dormir (homestay) se é debota tel verd de la Sacred Monkey Forest o te valèdes verdes de ris. Chiò tropes foresć se loga jù ence per n bon trat e i tol pèrt a corsc de yoga o meditazions de vigni sort per troèr chel balanz che a Ubud somèa esser più sorì da arjonjer per duc.
N viac a Bali aur l’ènema e deida a troèr n mior leam col mond dintornvìa, olache se é bogn de se destachèr da dut ma tel medemo moment descorir zeche de più te sé enstesc e chel sot leam che aon duc co l’univers. La lijiereza che dèsc Bali se pel fosc la entener tras i draghes che é vedù sgolèr tel ciel: no demò bec ma ence gregn tira laìte….chiò, i me à dit, i draghes no l’é demò n jech ma i à n segnificat spirituèl e i vegn mané per ciciolèr zeche te la oreies di dees……Gé volesse ge dir de me lascèr jir via amò n outa….

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>