L Sri Lanka me à semper soscedà mingol de interes, a ge vardèr su la chèrta somea na lègrema del gran subcontinent indian, ma canche se ge rua apede se descuerc che l’é na picola perla. Ge é pissà sobit che l’é tanche la “Svizra” del subcontinent indian che mingol cognoscee e me spetèe de troèr vèlch da tèl ma ….nia del dut! Manco jent, manco biteboi, dut più rencurà e ence sorì, fosc ajache l’é ence dut mender ma no per chest manco interessant. Sia storia l’é n crousc de via de cultures, popoi e lengac, tant che pec é i Paijes al mond che à mudà inom coscì tropa outes desche chesta picola isola. Te la pruma croniches se lec de Tambapanni, color del ram, i viajdores arabs ge dijea Serendib, l’incantevola, da olache nasc dapò ence la parola ingleisa serendipity che vel dir descuerta da marevea nia spetèda te chela che se chier zeche da auter. Col dominie di portogheisc doventa Ceilao straout dapò te Ceylon dai ingleisc. Dal 1972 l Paisc ciapa ofizialmenter l’inom de Sri Lanka che tel singaleis vel dir isola venerabola e per tamil Lankai, la maraveousa…..Dut chest per dir che l post l’é dalbon spezièl e da marevea olache se pel troèr natura salvèra, sic archeologics, momuments storics ma ence spiages tropicales te na spersa de 65.525 km2 olache vif zirca 21 milions de persones. I mudaments de inomes ne conta ence de sia storia: popolèda da singaleisc e tamil enscin dal V centené dant de Crist, chesta isola la é stata colonisèda dai portogheisc del 1505, dai olandeisc del 1658 e dai ingleisc del 1796. Demò ai 4 de firé del 1948 el Sri Lanka doventa na democrazia indipendenta. La storia lascia dò sia pedìes no demò ti inomes o monuments, ma ence te la jent. Aldidanché l 75% l’é singaleis, l 12% tamil a chisc se jonta n auter 5% di tamil, dic di autpians,( ajache rué adalèrch dal sud de l’India per lurèr te la piantagions de tè che à endrezà i ingleisc) e n auter 8% de arabs mussulmans. N mescedoz de cultures, lengac (singaleis e tamil apede ence a duc i dialec) e religions ( buddism, induism e islam) che no à abù na vita sorida e à cognosciù 26 egn de vera zivila anter l 1983 e 2009. Dut l’é scomenzà co la indipendenza del Sri lanka canche del 1948 vegn tout demez l derit de zitadins ai tamil e dapò co la strategia populista del premier Bandaranaike che del 1956 à declarà l singaleis soul lengaz ofizièl. Da alò l’é scomenzà na lingia de descriminazions contra i tamil che del 1976 à endrezà l moviment Liberation Tigers of Tamil Eelam che à fat tropes atentac e aea sche obietif la creazion de n stat per sé tel nord. La vera la é stata cruva: atentac, represcions, bec e bezes spenc a la vera, violenzes de vigni sort e miles de persones restèdes soules, zenza cèsa…..la represcion del goern contra la Tigres Tamil à lascià bèleche 80.000 morc e n gran mur de desfidenza anter chesta doi popolazions olache i Tamil vif più che auter al nord e est e i singaleisc tel rest de l’isola. N mur che se sent demò se se vel esser mingol ascorc, ajache ic no rejona bolintiera de chest tant e te n prum moment a veder placac dutintorn scric te 2 o 3 lengac (singaleis, tamil e ingleis) se dijessa che l’é na bona valivanza e recognosciment. L singaleis e l tamil é aldidanché i doi lengac ofizièi aldò de la Costituzion e l’ingleis l’é chel che l’é restà dò egn de colonisazion, utol anchecondì soraldut per i turisć che l’é na fontèna emportanta de vadagn. Ma i lengac é trop desferenc, la scoles é despartides, vignun empèra te sie lengaz e l’é l’opzion de studièr chel auter o l’ingleis, ma bèleche duc studia ingleis coscita l sistem de vita é dalbon despartì e l’é pec chi che sà duc doi i lingac. Doi popolazions, doi lengac, doi cultures sot a n ciapel che no à la medema lèrga per duc: per chest se sent amò rejoner de descriminazion e l’é na sort de desfidenza anter un e l’auter. Per n forest no l’é sorì ruèr a se entener ne coi tamil, ne coi singaleisc se chisc no i sà mingol de ingleis, ma tel veder dutintorn de gregn scartabie con inomes te duc 3 i lengac me pissèe che zeche de più i aessa podù saer……soraldut me fajee marevea canche i dijea che no i entenea nia de tamil….ma dò me é vegnù tel cef la situazion del Südtirol e ence chiò tabeles e scrites de vigni vers (amancol per todesch e talian, valch’outa ence per ladin) ma no per chest la jent rejona duc doi i lingac (sic!) Senceben che l’é passà jà 6 egn da la fin de la vera zivila la costions politiches é mingol entorcolèdes colavìa e, ence se é vedù stroz tropes polizaineres, me sà ampò che sibie n Paisc sorì per viajèr, enteressant e che paa la speisa veder. I posć più cognosciui l’é l triangol culturèl (Anuradhapura, Sigiriya e Kandy), la gran piantagions de tè tel zenter e la costa del sud turisticamenter più endrezèda. Gé son stata te chisc lesc e ence te etres, mingol manco de nonzech ma segur enteressanc, desche la costa de l’est con sia spiages netes (olache se veit amò vèlch outa postazions militères…) e se sà ben ence duc i sic archeologics. N lech che me à trop emprescionà l’é Sigiriya , na formazion naturèla spetacolèra de zirca 300 metres olache l’é stat troà segnes de n ensediament de acà passa 5 mile egn (vèrda retrac). Da enrescides somea che chiò jà tel 3. secol dant de Crist fossa stat monacs budisć, purampò chest lech é cognosciù per la fortificazion fata sù dal re Kashyapa anter l 477 e 495 dò Crist. Dò sia fin tragica l lech l’é stat sorandat ai monacs budisć e durà enscin al 14m centené. Per ruèr sù se passa fora per vidores e festii bie rencuré e en or sù la crepa l’é sćialins zipié fora tel sas. De na fineza e beleza emprescionantes é i depenc su la crepa olache vegn dit che fossa stat sù passa 500 eles! Aldidanché se n’à salvà na pèrt e se ge rua apede fora de n bel nia endèna che se va su per chi sćialins. Sigiriya, desche etres lesc tel Sri Lanka, l’é Patrimone Mondièl de l’Umanità dal 1982 en ca. Auter lech nteressant é Dambulla, amò anchecondì n lech spirituèl olache troon murales depenc su na spersa de 2100 m2 e 153 statues del Buddha… Storia, architettura, lesc da meditazion o pelegrinaje ma ence natura salvèra e gregn parcs naturèi l’é chel che sporc l Sri Lanka, olache te pech temp con mesi publics belebon endrezé se pel ruèr mingol dutintorn. Sorì l’é ence viajèr con auti e sciofer olache se é più ledesc de se mever e se rua più apede a la vita e la cultura del post. Chest é podù proèr de persona de jugn olache, co la pruma luna colma, é podù viver sie spirit de condivijion te la festa budista “dansal”. Te chesta festa più families se endreza a cojinèr e sporjer a duc chi che passa zeche da magnèr e da beiver. Zachei stèsc sun strèda con na bandiera śala, segn de envit a se fermèr. Te una de chesta cèses i me à fat cognoscer delvers l jackfruit, l frut più gran del mond che pel esser magnà desche bèst salà o, se se l lascia aló, doventa n frut mingol ègher (vèrda retrac). Canche se viaja no se fenesc mai de emparèr….ence te n picol Paisc coscita l’é sacotenc secrec da descuerjer ma canche somea de aer scomenzà a se fèr mingol ite e magari dir zeche pech l’é ja ora de s’en jir!

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>

fotos Enrico Farina