Corer te muda segur l carater e la personalità, de dì en dì tu dovente più forta, tò ciaf se deslea dai pensieres che no tu dore e tu veide più chiares ti obietives. Se dapò tu te enjigne par corer na maratona, te sozet valch ite tal ciaf, dant che tal corp. Doventa na endesfida con te vigni outa che tu vas a corer.
Tu pes esser stenciada tant che tu ves, ma se tò ciaf l’à dezedù che tu cogne ruar aló da chel alber che angern tu as vedù demò da dalonc, empedapò tu aló tu rue. E no l’é pa demò toe ame che rua, l’é to ànema. Ànema che se enpienesc amò de più se endana che tu core tu pes ge vardar a nosce maraveouse crepe, te sentir na roba soula con noscia bela natura. Corer te deida a capir che che tu ves e che che no tu ves e, parché pa no, ence chi che tu ves e chi che no tu ves dintorn. Canche tu es alenada e tò corp l vegn dò più segur, vigni varech che tu mete jù no tu te arvejinee demò a la maratona, tu te arvejinee a te enstessa, a chela che ogne tant se pert par strada, dò pensieres falé o dò fac che i te somea gregn ma che, alincontra, i é pìcui pìcui. Corer redimenjionea, corer libra, corer te fasc star dalvers, da ite e de fora. Rejone da femena no competitiva, no me cruzie de canche rue, me cruzie de ruar.
La maratona de New York l’é stat na esperienza fora de anter soraldut par la jent che se à dintorn. 42 chilometres i é ben n muie ma no i somea coscì sfadiousc con duta chela mùsega, dute chele man da ge dar el 5, duta chela jent che ciga par te parcheche tu vae inant e ence valch bel tous che ciga “I love you” l deida, ben segur! ;)
La emozion che se sent canche i cianta l’in american e, dò doi colpes de canon, part la musega de “New York New York” e tu tache a corer, chela emozion ge la augure a duc. L’é n moment che tu te dis “son chiò” “é lurà par chest moment”, tu te dis “resta conzentrada”, “tu l’as fat mile oute l moviment de tacar a corer”, e ló te deida tò corp, par fortuna se auza l prum jeneie e l rest l va aldò, par 42 chilometres anter colores e alegrìa. Vigni chilometer tu te sente stolza, stolza de esser aló, de star ben, de esser dò che tu te gode vigni moment, de no aer pissà nience na outa de zeder.
La emozion de canche tu rue la é certa, no tu te rende cont, na làgrema, na grignada, doi ciacole con chi che l'é ruà con te e soraldut l cher tant pien che se tu podesse tu ge fajesse n braciacol a duc. Gio la é fata par me e par mie star ben ma, del 1966, l’é stat na femena che l'à coret na maratona par dute noi, par ne mosciar che podon ge la far e che nesciugn pel ne dir olache podon o no podon ruar. Demò noi saon tanta de forza e tanta de determinazion che la pel aer da ite na femena.
Roberta Gibb en chel an l'à proà a se enscinuar a la maratona de Boston e, enveze che ge manar l bavarel con sù l numer, la direzion da la maratona la ge à manà na letra che dijea che la corsa la é averta demò ai omegn e che le femene no le à fisicamenter la forza par corer na maratona. Roberta la corea duc i dis da doi egn te si bosć, dintorn ciasa e, ence se i aea proà a ge ensegnar che le femene le é passive, ela la saea benon che no la é coscita e l'à volù ge l far veder al mond entrìech.
Ge à volù cater dis de viac par ruar a Boston en chela dì del 1966 e se sconer vindò zeche albres fin canche no l’à vedù che la podea se mescedar anter i omegn che corea. Chisc i se n'à ascort che l’era na femena e i l'à scuerta bel dalvers, parcheche “ la strada la é de duc”, i ge à dit. La jent de sport la se recognosciarà segur te chest: no vel dir nia om o femena, vel dir che tu leve sù de canapè e tu fas valch. Posse dir chest tant parcheche te dut chest istà de corete é scontrà jent che cognosce, foresć e jent dal post che no cognosce, ma i se à fat cognoscer demò parcheche coree, par me dar forza o par me domanar fin olache ere ruada en chela dì. L sport l’é n lengaz universal.
A ogne bon cont, jon de retorn a noscia Roberta Gibb che, anter struscie e fadìe, la é stata bona de ruar a la fin. La conta che su par n col l'aessa volù zeder, ma no l’à zedù par noi, femene dal davegnir, femene che coron aldidanché zenza se pissar che acà 50 egn no assane podù. L’à coret regolada da om e con ciuzé da om, ajache no i n fajea ciuzé da femene par jir a corer enlouta. La é ruada co i pìe da sanch, disidratada e coi granfes, parcheche enlouta se pissaa che i granfes i vegnisse apontin parcheche se se idrataa endana che se corea. No l’aea mia le “barrette energetiche", i "punti ristoro" e l "gatorade”.
Duc peissa che la pruma femena a corer la maratona sie stat Kathrine Switzer del 1967. Ela la é più cognosciuda, dal moment che va stroz foto con l diretor da la maratona che proa a la tirar fora da la corsa par n brac, ma na, la pruma l’é stat noscia Roberta, sconeta anter duc chi omegn. Noscia Roberta, stravardada dal vero spirit dal sport, ajache un che cor l sà che ben che fasc e endana che tu core con de autra jent tu te tire e tu te deide un co l’auter, parcheche corer averc l ciaf e l cher.

Autora

Luisa Bertacco
Colaboradora

Stae a Poza, te Fascia. Do na laurea en scienzes internazionales e diplomatiches e n master par ensegnar talian ai foresc ades fae jir en garni con mia sor e ensegne talian ai migranc che vegn te nosce val. Me piasc lejer e viajar, ogne neva cultura che scontre, ogne post nef olache vae. Adore magnar coche ven magna alò e balar che che se bala alò e, se son te n post desché volontadiva... >>