Ve lecurdëis’a de Nadia Comăneci? La ginasta rumena che ova tl 1976, cun 14 ani, fat cialé ca l mond ntier arjunjan pra i juesc olimpics a Montreal – coche prima n assolut – i sensaziunei 10,0 ponc tla disziplina dla bares a scialier? L resultat univa ratà mpuscibli da arjonjer y per la cumpetizions ne fovel nianca da garat scherms da mustré su na nota da doi zifres. Deguni, no ëiles y no ëi ne ova mei arjont 10, 0 ponc.

Ie ne son nia na tipa da idoi, ne son mei stata na fan de zeche o de zachei – almanco mei tant da vester bona de me ntujiasmé ora de mesura per n personaje de vel’ sort – ora che per Nadia Comăneci. Ëila fova la ncorpurazion, l simbul de cie che ie ësse ulù fé y deventé. Ie ësse ulù vester ëila. Comăneci, nasciuda tl 1961 y cundechël mé doi ani plu vedla che ie, me ova acumpanià ti ani dla scola mesana, canche ne perdove deguna de si cumpetizions che n lasciova udëi tla televijion. Si cialé ora, si grazia y si forza, si artenienza y cunzentrazion, si disziplina y lesirëza me ncantova. La ne rijova mei y chësc ne fajova auter che avané te mé mi faszinazion per ëila.

Mo plu che Olga Korbut, la blota atleta bielorussa de dejeset ani dai codins sciche chëi de na popa, che ova n valgun ani dant fat cumuever l mond ajache la ova bradlà do na performazion melgarateda. N ucajion dla olimpiada de Minca dl 1972 ova la favorita dla scuadra naziunela sovietica – per rejons che nianca ëila nstëssa à dadedò mei sapù da splighé – spurzenà defin si proa. Purempò fovela stata n’atleta geniela che ova mudà i standarc dla ginastica nen fajan n sport scialdi populer dloncora. Bradlan per la mueia de si performazion sfertuneda ova ch’la bielorussa deletëula ntlëuta desmustrà al mond decà dla cultrina de fier che la fova mé na pitla muta sciche duta l’autres, che la ova n cuer y sentimënc y che la ne fova – alincontra di pregiudizies cun chëi che n udova i atlec dla Union Sovietica - n cocul zënza emozions. Olga Korbut fova n valgun ani plu vedla che ie. L fova dessegur ëila che ova descedà mi nteres per la ginastica. Ma l fova pona stat Comăneci che me ova faszinà.

Nadia Com?neci me ie n ch’sta dì inò tumeda ite. Te n iede do ani d’assënza àla inò fat julé mi pensieres, tant che é ulù nriescer cie che ie deventà de ëila: Dl 1989, puec mënsc dan che Ceausescu ie tumà dal pudëi y unit mazà, se n iela muceda dala Romania. La ie emigreda tl’America (sciche perauter nce Olga Korbut), la ie marideda cun l ginast Bart Conner y à n mut. Te na ntervista dijela che a si ani da ginasta pënsela cun plajëi, ma che la ne uel al didancuei nia plu avëi da n fé limpea, chëi tëmps ie passei. Nadia Comăneci ie stata la ginasta che à tla storia dla ginastica venciù l plu tituli: de ndut àla venciù pra i juesc olimpics dl 1976 a Montral y pra chëi dl 1980 a Mosca cin bedaies d’or, trëi d’arjënt y una de bront, ora che na lingia d’autra bedaies te d’autra ucajions. Per duta na generazion de mutans ie ëila stata n gran model. Y dal pont de ududa da ncuei, dessegur nia l piec.

Da liejer:

Nadia Comăneci: Letters to a Young Gymnast (autobiografia scrita per nglëisc), y
Lola Lafon: La piccola comunista che non sorrideva mai (biografia, traduzions nce per talian o tudësch)

Autora

Ingrid Runggaldier
Redadeura

Son de Urtijëi, é studià anglistica/americanistica y germanistica a Dispruch, de prufescion sons tradutëura (dantaldut tl ladin) y lëure tl Ufize Cuestions Linguistiches dla Provinzia autonoma de Bulsan. Ie me nteressei de cultura n generel, plu avisa de rujenedes, de leteratura, de “mendranzes” d’uni sort – da chëles linguistiches a chëles sozieles, religëuses y de pensier. Ti ultimi ... >>

Fotos ora dla plata http://www.librarising.com y http://fangymnastics.com