A Amsterdam se pel veder la cort olache eles nia consacrèdes stajea ensema e se dedichèa a na vita de orazion, ciarità e lurier. L moviment de la beghines se à slargià fora ntorn al 1100 per desvaliva rejons. Una de chestes, l’era l fat che la eles che no se maridèa cognea jir beleche semper te convent e te chi tempes la tousa cognea portèr al convent na dote; coscita la eles puretes stentèa a ruèr ite e per chestes l beghinaje l’era na bona soluzion.
La eles vivea te ciasetes e spartìa l viver: l lurier e l’orazion soraldut, zenza perauter fèr nesciun voto. Canche les volea, les podea se n jir. Chest fenomen l’à abù n gran svelup, soraldut te i paìjes del nord de l’Europa e apontin n Olanda, olache amò inchecondì se pel veder olache duta chesta femenes vivea. La cort la é te mesa zità, sconeta perauter da cèses e presservèda dal biteboi de la zità feruscola, n post olache amò se pel stèr te n bel gran chiet.
La beghines de Amsterdam les era devotes a S. Orsola (l’era sia patrona); te la capela del 1671, te una de la cèses de la cort, olache i disc messa duc i dis da les cinch domesdì, l’é n reliquiarie de chesta sènta.
Per tropes egn/secoi se à cherdù che S. Orsola fosse stata copèda dessema a 11.000 vergenes, enveze somea che les fosse states (demò) de undesc. La lejenda conta che Orsola, vivuda ntorn al 300 o 400, fia de n re breton, se aea consacrà al Die cristian. Per rejons politiches l’aessa cognù se maridèr con l prinz pagan Ereo ma na vijion ge disc de ge domanèr trei egn de temp per pissèr sora. Per la fèr curta: te chest temp la rua a Roma dal Papa, passan per i Paijes Todesc e la Svizera, compagnèda da undesc(mile) touses. Tel viac de retorn la passa per Colonia, olache dutes cantes vegn martirizèdes per orden de Atila.
Somea che vindò chesta contìa ge sie l recort de n mit pagan leà a Freyja, che col inom de Horsel o Ursel, l’era chela fegura che ge dajea l benvegnù a la touses tel mond de i morc. Da dir ence che Orsola pel fèr pèrt del trio de sèntes che les se lea al mit de la Gran Mère, ence chest zeche de belebon sparpagnà fora dant che ruasse l Cristianeism.
Chi che mai la raprejentèa chesta ela - se sà che la credenzes se à sorapeà e se sà ence che te na lejenda l’é semper zeche de ver, donca pel benon esser che la doi stories a zeche vida se lee adum-, la devozion per Orsola o Ursula la se à sparpagnà fora belebon te duta l’Europa a partir ja dal VII secol e la é jita inant fin a la fin del Medieve (ence tel liber “I misteri del Cjaslir” de Chiocchetti, “Ursina” l’é na fegura che raprejentea credenzes veiores).
La storia de S. Orsola la é stata contèda e depenta da gregn e picoi artisc te duta Europa. A Amsterdam se troa daperdut sia rafegurazions, soraldut ziplèdes tel legn o tel bron. Anter l’auter, ence sun la gejia de Sacun (sora Urtijei), l’é n beliscim afresch (la foto te la galeria la é de Wolfgang Moroder) de Orsola co la friza, la bandiera biencia co la crousc chécena che raprejenta la venta su la mort tres l martirie e la corona e l mantel da reina. Per jir de retorn a Amsterdam, l’ultima beghina la é morta del 1976. Ence chesta na storia longia secoi, desche chela de la devozion de la fegura che l’era e/o stajea vindò noscia “Orsola”.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>

foto de S. Orsola sun Sacun de Wolgang Moroder