Ma vo saède che l sistem de chejer a “bagnmaria” l’é na invenzion de Maria l’Ebrea che aea na scola de parfumes ti prumes secoi dò Crist? A Maria l’Ebrea, che vegn zitèda dal filosof e scienziat Zosimo de Panapoli, ge vegn recognosciù de esser stat anter chela persones che à dat n sistem a la chimica e la l’à fata deventèr moderna.
Fèr parfumes no l’é nia da sorì o banal: ge vel conoscer i materiai de la natura e saer l funzionament de sia trasformazion: ge vel, en pecia paroles, esser feré de chimica. No se sà avisa olache la é vivuda, fazilmenter a Alessandria te l’Egit, tel temp anter l prum e l terz secol dò Crist. La era cognosciuda enlonch e la era conscidrèda la più gran alchimista de chi tempes. Se sà che l’é stat ela a se enventèr l sistem che vegn chiamà “a bagnmaria”, ma ence la creazion de doi sorts de lambiches: l kerotàkis e l trìbikos, che apontin vegn amò inchecondì durà te la parfumeria. Maria, dita ence “la profetessa” la era cognosciuda ence per sie pensier filosofich (la era sia la teoria dei “cater assiomes”), ma per chest ge volessa scriver zeche a pèrt.
Che la eles saesse da semper se curèr co la erbes no l’é n secret e dutes saon che la erbes les é semper states ence per l bel: l bagn tel lat de Cleopatra vèl chiò per dut. E no stajon pa a pissèr che l’era zeche demò per ela o demò te l'Egit. Da canche se à testimonianzes, se sà ence che la eles à fat de dedut per esser più beles.
La femenes de la Roma imperièla les saea beleche dutes enjignèr mescedoc de erbes, cosmetics e parfumes. Na tradizion che no à mai lascià sù, jita inant fin te l’Auta Età de Mez. Tel VI secol per ejempie, l manual de Dioscoride – n beliscim erbarie – l’era stat scrit per Anicia Giuliana, la fia de l’emperador Anicio Olibrio (da zeche man é let adertura che l’era stat ela al voler e se l fèr fèr). L cronist Michele Psello dapò l conta che la emperadora Zoe (980-1050), adum con sia sor, l’aea metù sù adertura n laboratorie de parfumes. Te la Chronicon Salernitanum se à n grumon de enformazions en cont de eles de la nobiltà longobèrda co la pascion per i parfumes.
En cont de Scola Medica de Salern no se pel no tor cà la fegura de Trotula che la era dandaldut dotora/medica (su la eles dotores/mediches te i prumes secoi tost l’articol) ma ence na gran esperta de èrt de restèr beles. Sie l’é l liber “De Ornatu Mulierum”. Inchecondì duta sia rezetes vegn studièdes per veder se les à fondament scientifich e somea proprio de scì, ajache sanch de drach, spuma del mèr e resa salvèra no l’é n filter magich ma ingredienc che vegn fora da piantes da medejina e minerèi.
Trotula de Ruggiero l’era na dotora de la scola de Salern vivuda tel XI secol, stimèda e chierida te dut l mond. De ela se à recamà ence duta na lejenda (che la era beliscima, per ejempie). Storicamenter se sà che la era fia de na rica familia (i Ruggiero, o miec Roggiero o De Ruggiero, che fosse stat la pruma generazion de Normans rué en Campania) e che l’era la femena de n dotor (Plateario, ence el belebon cognosciù), e somea che ence si fies i fosse stac dotores.
Aboncont si manoscric, che i deve esser stac belebon cognosciui te sie temp, i à n gran fascin e ne i conta de coche la eles da enlouta se rencurèa per esser più beles. Sessaben che i scric i cogn esser traslaté dal latin e dapò esser enterpreté, e no semper l’é sorì entener de che sort de pianta o fior che se trata e de coche ge vegnìa dit enlouta. Aboncont, fat chest lurier, se veit che tropa rezetes les era bendeché sorides.
La scrif, per ejempie, che per se embeletèr l vis e i slefes se cogn meter miel con vitalba, cetriol e mingol de èga de resa a boir fin che deventa l mez e dapò con l rest de l’ont se cogn se onjer ite i slefes sora net. Da doman dapò ge vel lavèr ju dut con èga tebia. Chest remedie l fèsc a na moda che i slefes reste bie dures e la pel devente tendra zenza che la se spache. Vedede ben, zeche che amò inchecondì se pel fèr o zachei segur fèsc. Per aer denz bienc, dapò, la disc de rejentèr la bocia con bon vin e i slizier ju con n fazolet de lin. Se amò no i é bienc, se pel ciugnèr mingol de fenocio o parscemol.
E per curgiosità: podede ve enmaginèr che che podessa esser stat chest sanch de drach e chesta spuma de mèr? Desche dit, nia da misterious e nesciun encanteisem. L sanch de drach l’é la Dracaena Draco (“sanguinaria”) na pianta che amò inchecondì vegn dorèda per sie pigment chécen (ence per l color per ciavei). La spuma de mèr enveze l’é n derivat de la silice, ge vegn dit ence “sepiolite”. Sie polver vegnìa durà per fèr l scrub (che no l’é auter che puzenèr la pel con zeche da grovie) o per serèr i pores. Inchecondì l vegn durà per cremes “anti-age”. Donca, nia da magich, ma la natura che enlouta desche inché, semper se dona. Ence per la beleza de la eles.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>