L'an passà no aea fiocà beleche nia e l'ultim an da gran neif l'é stat l 2014. Canche l fioca, ge vel spalar e se l'é zeche da fadìa l'é spalar neif, per l sforz che l dora brac forc e man che tegn fora vescìe. Spalar à semper spalà i omegn, l'é na costion de forza, ma no demò.
Chisc dis à bon fiocà e gio co la pala é vedù n grumon de femene che spalaa. Che él sozedù?
Aon sbatalià per aer i medemi deric, aon volù jir te la vita publica, tor part a le dezijion del mond (pian pian). Aon volù che l'om l'empare a far su i mestieres, a rencurar ti fies, a meter dant le emozion (sui rejultac podon se rejonar).
Tant o cant, volaane ence ruar a spalar neif do aer lurà, metù a post la ciasa, netà su l cartier per i sciori, cojinà/lavà/soprescià, fat far i doveres, aer fat l taxi per i fies, jite a troar la mare e rencurà la veia giava, jite a proveder e pissà a dut chel che aane da pissar?
Gio, saede, son per la valivanza de deric ma ence per la desferenzia anter femene e omegn e me é semper pissà che fin canche i omegn se cruzia de jir a legna e spalar neif, l'orden del mond no l'é n pericol.
L raport femena-om da ebig n cà l se poja su n dar-aer, joar-emprevaler. La sozietà la stasc su coscita.
Far su legna e spalar neif l'era chele doi robe che per me aea n valor simbolich e che me piajea che se aesse tegnù i omegn, desche spazie che podea definir na sort de identità mascolina: chela de la protezion de la familia e de la sozietà.
Col veder dute chele femene che chisc dis paraa te neif me é vegnù da pissar che se i omegn i va a perder ence chel, che ge restaràl? Che ge réstel a ic da dar/donar?
Endana che spale me domane se l priesc de noscia emancipazion no sie chela de restar soule a rencurar l spazie/i ben, de duc e de dute, chel de noscia familia e de la sozietà olache vivon.

P.S.1 A onor de cronaca: endana che cerìe de vegnir fora dala neif co l'auto che no volea fora da na buja, se arvejina n gran bel om con na gran bela pala. Dò doi menuc son fora da la stenta e ence contenta. Che bel canche n om l'é bon de passar chel sens de protezion e segureza! Se i se rendessa cont de chest, ai omegn se ge volessane trop più ben.

P.S.2 hm... pecià che chel om l'era mie jerman.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>