“La vera che burta malatia!” la revista Gana - che se jonta chest an al magazine online - la é vegnuda prejentèda al publich en sabeda ai 16 de oril a Pera aló da l’hotel Rizzi.

Sporjer l nef numer de Gana de papier che rejona de la eles e la Gran Vera l’é stat n piajer. L curt domesdì culturèl l’à corì fosc na locia e mingol la seit de saer ma tel medemo moment l’à orì la gaissa per sporjer de etres momenc de confront per crescer, se orir al mond olache vigneun e vigneuna posse dèr sie contribut. Fèr lum sul passà, enrescir, cognoscer e uzèr fora de picola e de gran stories del passà per entener miec i fac e i mudamenc l’é chel che se à tout dant l grop de lurier de la revista Gana che à dedicà sie ultim numer a la Gran Vera co l’intent de contèr chel moment storich te na prospetiva feminila e glocala olache vites e stories locales se ciola ite a stories globales.
Tras la moderazion de Lucia Gross l domesdì culturèl à sport cerces de storia e vites de eles endèna la Gran Vera olache la storica Luciana Palla à uzà fora che la eles cognea manèr inant l’economia, la familia e les se à troà a conviver con militères e perjonieres. L lurier de la eles l’é mudà, les cognea ciapèr te man dut, les à scomenzà a fèr lurieres desvalives desche sciofères ma ence fotografes e giornalistes; jà dant, perauter, valgunes se cruzièa de pazifism desche Bertha von Stuttner recordèda da Ingrid Runggaldier. Trop l’é mudà, sessaben, te nosc raion, ence en cont de femenes che, descheche à recordà la procuradora del Comun General de Fascia Elena Testor, les rec l’economia turistica, à vèlch post te la politica ma fosc, - jonte gé - l’é n prozes de pensier che cogn amò troèr sia lèrga per na sozietà più solidala. Descheche à scrit Lucia Gross recordan la paroles de Teresa Sarti, cofondadora de Emergency “Se ogneun de nos fajessa sie tochet se troassane te n mond più bel zenza nience se n ascorjer”.
L’intent de chest numer de Gana, descheche à dit Olimpia Rasom, l’era chel de uzèr fora l ruol de la femenès per capir chel che l’é sozedù e chel che aea vivù sun sia pel noscia antenates. Anter l’auter l’é stat recordà l spirit feruscol e l’amor che Maria Piaz saea trasmeter ai fies tras sia letres endèna che la era internèda a Katzenau, l coraje de la fodomes che con fies e veiac resté à cognù lascèr sia cèses e jir utró. Na realtà che à tocià l raion ladin acà 100 egn e che fèsc padir inché de autra popolazions che sciampa da de autra veres.
L’argoment à orì n confront dintornvìa la veres aldidanché ma ence dintornvìa la tema de l’auter e i preiudizies, l besegn de se chierir informazions veres e no se lascèr fèr jù da “slogans de venter”. Sciampèr da cesa, ruèr te etres Paijes zenza nia, cogner jir a se la preèr inché desche zacan crea tenjions che no se sà co desciarièr….endèna la Gran Vera, à recordà Anna Mazzel, valgugn ge dajea la colpa de la vera adertura ai Fodomes! Aldidanché somea de lejer fora en pèrt la medema stories e cruzies da zacan ouc a de autra persones, a de etres raions. L publich ascort e enteressà se à segur portà a cèsa vèlch conscidrazion, defat l besegn de confront dintonvìa chesta e autra tematiches l’é stat palesà da più persones. N stimol che podessa orir autra scomenzadives per l staff de Gana!
La revista Gana de papier “La vera che burta malatia!” vegn data fora debant e se pel la domanèr te la biblioteches de val, aló dal Comun General de Fascia e da la boteighes di sfoes.

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>