Samantha Pederiva l'à 29 egn e la é do che la studia per deventar avocata (l'ejam de stat l'é parvedù de dezember). Se aon cognosciù en ocajion de na trasmiscion DF (la jirà n onda ai 13 de dezember, da le 20:50, da veder su la piata web de la RAI Ladinia, sot Mediateca) olache volee mingol far vegnir fora le vijion politiche de le joene anter i 20 e i 30 egn.
Canche se rejona de politica se peissa a la politica de partit. Perauter la politica, te sie segnificat più fon, vel dir rejer na comunanza per l ben de dute e de duc (amancol coscita dijea Aristotele). Vigne azion che fajon te la vita la é reta da na politica. Aon la politica de la familia, chela de le femene, chela de l'art e de la cultura, chela economica e coscita inant. Fosc demò le emozion e l mond de la spiritualità pel se permeter de no far i conc co la politica, per l rest sion ite fin tinsom. Samantha Pederiva l'à studià iurisprundenza, fosc la materia che più che le autre se lea co la politica. Per chest deventa amò più enteressant ge far domane mingol senestre o "toste" descheche ge disc ela.

Lurieres semper stac de omegn, desche chel de avocata, pélei troar na dimenscion femenila?

I lurieres che storicamenter i é semper stac di omegn, aldidanché i cogn far i conc con femene semper più enjignade e competitive. No l'é più luries che pel no tegnir cont de chest dat. L lurier de avocata l’é segur un de chisc. Me recorde che a l’università l professor de "prozedura zivila" l ge aea dit ai studenc omegn de se enjiniar ajache le femene avocate e magistrate l’é na categoria bela “tosta”, le é n muie enjignade e soraldut n muie forte, percheche le à voa de rescat.
Te chisc egn de formazion e soraldut canche é fat la pratica me n’é ascort che l’aea rejon. Me n'é ence adat perauter, n muie da spes, che per ruar a chest resultat le femene le se troa a cogner renunziar a sia dimenscion feminila. Pece le é le avocate che se fasc na familia, percheche l’é senester conziliar le doi robe. Pece le é le femene avocate che vadagna desche i avocac omegn. Chest percheche le femene se spezialisea te materie che no le porta a n gran vadagn desche chele che ge vegn dat su a n om, e percheche se le à la fortuna de se aer conzedù na familia, le cogn corer a ciasa per ge dedicar l pech temp vanzà. I omegn enveze i pel se dedicar ence a le "public relation", e chest vel dir dut anchecondì.
Le avocate dapò, desche libere profescioniste no le à l derit a la maternità, la cassa forense la recognosc na endenità che la é calcolada sul redit e la scuerc demò trei meisc, più o manco. Chest vel dir che no se pel nience se pissar de star a ciasa endana che se compra e canche se à l pop te brac.
No l’é per nia sorì capir coche se podessa mudar cheste situazion. Fosc se le femene le se metessa adum, le rejessa adum i studies profescionai per ejempie, fossa più sorì, soraldut te realtà desche le nosce, olache n’é pec s studies coscita.
Ma dandaldut gio crese che se enscin ades aon sbatalià per aer la medema credibilità de n om tel mond de l'avocatura, ge volessa che scomenzassane a se empontar sul recognoscimet di deric leé a nosc esser, e strutar de pissar che chest ne fasc manco bone desche profescioniste.

Apontin en cont de azion de conziliazion familia-lurier. Co sione metude?

Le azion de conziliazion familia e lurier l’é zeche de gran atualità: l’é dalbon na endesfida per la politica da anchecondi. Al scomenz le era state pissade desche n aiut per ge arsegurar a le femene la possibilità de se far ite tel mond del lurier. A la fin di egn '90, enveze, se à capì che chesta cultura de conziliazion la cognea tegnir cont ence del nef ruol di omegn te le familie.
L’emportanza de chesta tematica l’à tout ite l lurier del legislator european e de chel talian. Dijon che la normativa de referiment per la Talia l’é la numer 53 dai 8 de marz del 2000 che l’à portà dant l conzet de valivanza di omegn e de le femene te la cura de la familia co l’istitut di "congedi parentali", l’à metù dant l diviet de licenziament e el diviet de meter le femene che speta a far lurieres sfadiousc, e l’à scomenzà a sperimentar azion positive per proar a arjonjer l rejultat de la conziliazion.
I intervenc che l'é vegnù dò i é stac tropes e i à permetù de portar ite de gregn didamenc per le familie. Purampò i resultac se stenta a i veder, soraldut chiò da noi, ajache le statistiche disc che le femene taliane l’é chele che laora de più.
Senester l'é soraldut tel setor privat, olache da spes vegn tout su n om piutost che na femena e olache vegn fat de ogne sort de prescion su le femene. L’é da capir, ben segur, ence la dificoltà che à na firma privata a far i conc con chesta situazion, ajache la situazion economica del paìsc no la deida segur. No voi pa le giustificar, ajache l'é a la leta ence politiche de "welfare aziendal", ma cheste le revarda semper firme n muie grane che le pel se permeter de sostegnir i cosć. Dijon che le istituzion le cognessa se tor l’enciaria de meter a la leta de le familie più servijes zenza partender che le firme le se troe da soule tedant a cheste situazion.
No crese pa che sie na "impresa impossibile", basta vardar la Franzia olache l’é n grumon de servijes per le familie, per la comunanza e per la familia enstessa. Per ejempie, aló le familie le pel se permeter de tor su na kinzidier percheche ge vegn garantì l finanziament per la paar, le coe le é convezionade e i à na flessibilità de orarie trop più grana che chiò da nos. Chiò da nos enveze n muie da spes le coe le é rete da sociazions e da privac e coscita le familie le se troà a spener n grum de scioldi.
Chel che cognessa cambiar, dò mie veder, l’é la concezion de la familia: ge volessa che la vegnisse conscidrada n valor per la sozietà, percheche a la fin, se volon esser concrec, la familia la cresc i atores de l’economia del davegnir. Donca la pruma roba da far per aer n cambiament fossa apontin chela de pissar a la familia desche a n investiment.

N investiment l'é ence chel che la sozietà fasc su le joene e sui joegn. Na comunanza che veit l valor di joegn la pel crescer. Te Fascia, aldò de to veder e de toa esperienza, végnel valorisà i talenc?
L’é na domana n muie senestra chesta, parcheche Fascia l'é na val che sporc ocajion, ma aboncont cheste ocajion le é limitade a chel che l’é l setor economich che da semper vida Fascia e donca l turism. Dut chel che roda dintorn l turism pel esser na ocajion de lurier e de empegn per i joegn. Dut l rest stenta mingol a ciapar pé. L’é per chest che n muie de joegn se n va da Fascia e a la dir duta, ence gio ge é pissa e ge peisse amò ades.
La soluzion a chest problem podessa esser chela de no se encontentar de chel che se à semper fat te chesta val e cerir enveze de etres setores de atività e dapodò verjer a una vijion "multidisciplinare" de le atività del turism, coscita che l turism doente l met de esprescion de neve idee e de autre profescionalità.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>