1) Ciun ie pa vosc program coche ambolta per i cater ani che vën?

Adum cun mi team ons fat na nrescida scrita y doi sëires de "workshop" sun tematiches desfrëntes che reverda nosc chemun. L fin fova de audì dala populazion ciche ie la cosses che ti sta a cuer y ulache l foss da mëter la prioriteies. On p.ej. rujenà dla situazion dl trafich privat y publich, dl frabiché, dla scoles, de na sala dal teater y chino, dla Cësa di Ladins y dl Museum de Gherdëina, dla plaza da fé l juech cun l palé per chëla che l toma la cunzescion, dla plaza de dlieja, dla situazion dl turism y dl’economia n generel. Son iust tl lëur de lauré ora n program n relazion a chël che ie unit ora scutan su nosta jënt. L sarà nosc fin nce tl daunì de crì l dialogh cun la populazion, dantaldut sun tematiches mpurtantes y proiec mpurtanc per l luech, p.ej. n proiet de trafich per Urtijëi o l’idea de na streda de zircunvalazion nueva o la scola mesana nueva y.n.i.

2) Ciuni ie pa i trëi traverc prioriteres che ve tulëis’a dant de arjonjer?

a) Persunalmënter me stajëssel a cuer n bon tlima de lëur te cunsëi y te jonta, ma nce danter i dependënc y tl raport danter chemun, aministrazion y zitandins. Dassënn mpurtanta me sà nce na bona culaburazion cun i chemuns ujins.
b) Nosta vijion ie "Sté bën y sté gën a Urtijëi", y var per var ulëssi ti unì daujin adum cun mi team y a duc chëi che laurerà te chemun. Cuncretamënter saral da lauré su n grumon de cuestions. Tlo se tratel suvënz de scumencé cun de pitla sauridanzes per la zitadina/l zitadin da pert di ufizies o de pité plu lerch per lascé l auto y.n.i. per jì inant cun proiec plu granc.
c) Lauré y aministré l chemun cun cuscienza y miec che la va per l bën de duc y tl respet dl singul y de nosta cuntreda y ti dajan dassënn pëis ai valores de basa de nosta sozietà sciche ala tradizions y ai valores culturei, ma nce ai valores morai, zënza me stlù al’inuvazion y mantenian n spirit daviert.

3) Ciuldì ëis'a tëut la dezijion de ve candidé sciche ambolta?

Ajache ngrum de persones che me sta daujin y che me cunësc bën me à dat la crëta y la sburdla de fé chësc var, ma dantaldut ajache l feje gën.

4) Ciuldì dëssa pa la zitadines y i zitadins de Urtijëi ve lité?

Ajache rate d’avëi cër recuisic per chësta ncëria: lëure gën y truep, é diplomazia, na ududa lergia y n cër fundamënt, son sterscia de nierves y mantëne la calma te situazions zities.

5) Percie dëssi pa lité la SVP?

Ajache nosta lista à candidates y candidac cun vijions y ideies tleres per l daunì de Urtijëi, davierc al dialogh y cun spirit critich tl respet de nosta cultura y tradizion.

6) Ciun ie pa vosc valor njuntà?

Ie é esperienza tl’aministrazion de chemun y esperienza de vita. Rate che n’ëila veije nce truepa cosses da n auter pont d’ududa, suvënz pratich, y chësc possa ti dé na nota positiva a truepa cuestions y tl traté cun jënt. Povester fossel na ucajon per Urtijëi.

7) Cie ve n dijëis’a che vosc jurman ie vosc concurënt per la funzion d’ambolt?

Perdrët se àl purtà pro zënza che un o l auter l ëssa prugramà avisa; sambën iel mpue nteressant che te n luech cun na cërta cumpëida de jënt iel iust doi jurmani che candidea per la stiera da ambolt. Dal’autra pert iel n sëni de stima y crëta da pert dla jënt che nes ie daujin... y che nes sustën, y chël ie bel.