Gessica Defrancesco l’à 21 egn e la studia lengac a Verona. Ge pièsc cognoscer l mond, soraldut la jent e sia cultura. Per sia tesi de laurea la é dò a enrescir fora la storia del turism fat da la eles. Ela enstessa la é cresciuda te hotel e l’é aló che ge piajessa restèr a lurèr. Perauter, dant de se dedichèr a l’hotel, la vel studièr e viajèr, a na vida da poder l rejer con legreza e saer. Gessica, cognosciuda te l’ocajion de na trasmiscion DF Dut Femenin (da veder su la Mediateca de la Rai Ladinia, jita en onda ai 13 de dizember 2017) en cont de la vijions politiches de la joenes de Fascia, la respon più avisa a valguna domanes che ge aee fat te chela ocajion en tema de eles e turism, rejonèdes e cultures, eles e l mond.

Gessica, tu ti es nasciuda e cresciuda te n hotel ret più che auter da eles. Co veiste l ruol de la joenes tel svelup turistich de Fascia? Che podessel esser i lurieres per la eles del doman tel setor turistich? Colun valor arjont podesseles pa portèr?

Pense che le joene le pel far trop per noscia Val de Fascia. La femena l’à jià n ruol emportant tel turism, semper de più femene le fasc cariera e le vegn fora e chest dasc feduzia. Le joene che le à studià fora o le à viajà trop le pel portar na neva vijion del turism, di besegnes del ghest, de chel che pel piajer. Se se fasc esperienze desvalive, se veit la val con n eilge desferent e se pel se emprevaler e crear valch da bel. Perché pa no, ence portar neves lurieres, che i respon a le domane di neves ghesć, ma ence e soraldut mantegnir nosce bele tradizion e le valorisar amò de più, percheche noscia val la pel se desferenziar proprio per chest. La mior roba fosse mantegnir le tradizion, ma con na velgiada semper ascorta ai besegnes e ai mudamenc de la modernità, e te chest pense che le femene le sie più portade. Fondamental l’é soraldut no aer paura de valorisar e de crescer te chel che aon, a partir da nesc monc. Per ejempie, aon de beliscime vedude, che sion coscita usé a veder duc i dis e che no se rendon cont che le fosse da valorisar miec per ge le far cognoscer ence a i ghesć. Ajache demò se noi cherdon te chel che aon e fajon, podon ge l far piajer ai autres. Donca, cognon se meter semper te i eilges del turist che no cognosc e che no sà.
Te dis che cognoscer la cultures serf ence per ge dèr n impuls al svelup turistich. Éla coscita?

Zenz’auter. É viajà n muie e é capì che più culture tu cognosce e più lengac tu sas, più tu rue a cognoscer la jent e donca soe tradizion, so modo de viver, si besegnes, soe particolarità, che che ge piasc de più. Chest saer te deida ence a far paragogn coi autres e con noscia val. L’é na vida per cognoscer n popul, poder l far vegnir da noi e saer ge dar chel che l dejiderea. Bendaspes dò cheste esperienze tu ge das più valuta a chel che tu as e tu aprijiee semper de più toa cultura, toe tradizion, toa storia, to lengaz. Coscita tu sas sun che jiar desche hotel, desche manifestazion, desche turism, desche atrazion, desché val. La persona rica culturalmenter la é bona de star dalvers daperdut, la é bona de troar fora neve scomenzadive e de se adatar te ogni “esigenza e situ”.
Tu dis del valor de la rejonèdes. Co veiste la situazion de Fascia en cont de plurilinguism e olà ge voléssel envestir de più?
Gio é studià n muie de lengac: ingleis, todesch, franzous, spagnol, rus e cineis e me à semper piajù cognoscer. Proprio a i rejonar tu entene l’emportanza che i à per so “Paìsc” e per mantegnir soe tradizion, soa cultura e storia. Per chest noi cognon creser e lurar n muie sul ladin. Sion dò che l perdon, perché semper più joegn no i lo rejona. Ence chiò no cognon aer paura de l dorar: da le feste de paìsc, ai cartìe, a la publizità, sun internet, sul fonin… perché se ge penson ben l ladin raprejentea noscia tradizion, nosc popul, noscia val e donca l’é na vera atrazion ence per i ghesć, per l turism. L’é n meso per far viver e far cognoscer noscia Val de Fascia. E ence chiò: se noi sion stolc de noscia identità e de nosc lengaz, incurioson ence i ghesć. Me n’é amò fat marevea che da spes l’é proprio i sciori che i é stolc de cognoscer calche inom de posć e calche rejonada te nosc lengaz.
Da joena che ti es, aldò de tia esperienza, te Fascia végnel valorisà i talenc dei joegn e de la joenes?
Gio pense che i vegne valorisé, percheche l’é semper più scomenzadive per far vegnir fora i talenc di joegn e de le joene te noscia val, ma no demò. Dai contribuc per i studies, a la partecipazion di joegn a le gran feste, desche chele sul sport che veit protagonisć sportives desche Gross, Deville, Costazza e dute le sociazion e i gropes, dal schi, a l’hockey, a la cojina… Vedon semper de più joegn e joenes te la televijion, olache i se met en jech, tel prejentar tg o documentaries per ladin, i fasc comedie o film con nosc bel lengaz. Pense però che mence amò zeche, fosc percheche noscia val la é picola e l’é normal che sie coscita se se confronton co na gran zità, olache l’é n muie de più poscibilità per far vegnir fora i talenc di joegn. L’é polito che i joegn i vae al lont, a la foresta, che i fae esperienze, che i empare robe neve, che i slarge sie vijion, ma ge volesse che dò i vegnisse de retorn te Fascia e i aesse coraje a portar de neve idee. Da l’autra man ge volesse che l Comun General o i comuns i ge dajesse na man, no demò coi contribuc, ma ence co la burocrazia e col dar l met che chisc joegn i se mete en proa.
Per serar su, coluna femena reprejentea pa per te n mudament emportant te la storia sozièla, culturèla, economica, politica?
Per pruma me vegn tel ciaf Violeta Parra, cantautora e “pintora” cilena che é studià l’ultim an de liceo jun Busan. Te soe opere la vel portar inant e far cognoscer la tradizion e l folklor de so paìsc, ma ence denunziar e protestar per le ingiustizie soziale de chel temp. L’à vivù te n moment n muie senester e pensar che na femena l’à lotà per i deric de soa jent tras n lengaz comun a dut l mond, la musega, cogn ne far pensar n muie. Chiò entorn enveze dijesse che per me l’é la fegura de Maria Piaz, la Mare del Pordoi. Na femena che l’à antizipà i tempes, che l’à capì cale che l’era le potenzialità de noscia bela val e zenza paura la se à metù en jech te chi tempes olache de sorì no l’era proprio nia.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>