Nia demò fiores e perfums per Sen Valantin

One Billion Rising l'é n moviment global, laich, apartitich, avert a vigni persona, grop o organisazion che fèsc sie l prinzip olache vegn dit che vigni ela à l derit de viver e dezider de sie corp, sia sanità e sie destin. Nasciù per scomenzadiva de la scritora e dramaturga merichèna Eve Ensler (de reijes Yezides, donca bonamenter sirianes…) dal 2012 inant l se à slarià fora te dut el mond e anchecondì passa 200 Paìjes, ai 14 de firé, met a jir scomenzadives de bal e reflescion su la musega de “Break the Chain” - romp la cedena - scrita da Tena Clark, olache vegn uzà fora apontin l besegn de reagir, rompir la cedenes, esser patrones de sie corp e uzèr l cef.
L’idea de balèr, se tor na lèrga te lesc publics, dèsc l met de stèr adum con legreza. L bal – disc Eve Ensler - l'é contagious, sexy, maraveous, vèlch’outa ence pericolous, e l pel rompir la cedenes, se pel balèr con duc, l’é ledech, l deida a tegnir adum e a jir inant miec. Tropa eles che à padì violenzes no é più bones de amèr sie corp e les l vif destacà….l fat de balèr adum deida ence a ruèr a aer endò posses del corp, l’é na vida aiegra e artistica de reagir e tegnir fora, ma soraldut de dir “son amò chiò e voi respet”.
L’event, One Billion Rising, ciapa l’inom da la constatazion statistica olache vegn fora che te sia vita una ela sun trei vegn violentèda o la ciapa la legnèdes. Te n mond con na popolazion de 7 miliarc de jent chest fèsc fora apontin passa un miliart e donca n miliart de persones vegn chiamà a balèr, stèr adum, palesèr sia indignazion, levèr en pé e domanèr n mudament de cultura. Vegn balà ence per dir che la eles no se lascia fèr jù da chesta violenza e se vel creèr na neva sort de coscienza che refuda la violenza ence con azions artistiches. I egn passé la campagna aea ence l slogan One Billion per la giustizia, per la revoluzion, per l mudament de coscienzes. Chest an l mot l'é solidarietà contra l desfrutament de la eles ajache, coche à declarà Eve Ensler - “No l’é neguna revoluzion zenza solidarietà!”
Demò metan adum più persones che vel mudèr se fèsc dalbon na prescion su la istituzions culturèles e internazionèles ma ence su la politica e sia responsabilitèdes de fèr dalbon leges che defene la eles….no demò a paroles.
Solidarietà chest an, ence per creèr speranza, forza e vijions compartides, solidarietà contra l razism e l sessism olache l bal l'é na sort de protesta e resistenza creativa ajache luran adum dintornvìa temes globai se crea leames, maor coscienza e formazion. One Billion Rising ence per jir tel vers de n mond de valivanza, ledeza, pèsc e degnità olache l balèr adum te passa 1000 zitèdes vel rompir l’acort e dir no a vigni sort de violenza contra la eles.

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>