Erika Castlunger la é tant che deventèda Presidenta de l’Istitut Ladin “Micurà de Rü“. Erika la se cruzia de cultura ladina da temp e la é cognosciuda soraldut per sia pascion per l teater: la é pedagogista teatrèla e ades, fenì che l’à abù na formazion, ence terapista teatrèla. La colaborea con la RAI con trasmiscions desvalives, ti ultimes tempes la roda fora per la Ladinia per la lingia de trasmiscions “Paijes de la Ladinia”. Chest ge dèsc l met de cognoscer delvers dut l raion ladin, olache l’à amisc e colaborazions ence te etres ciampes. La é stata te la redazion de gana e l’à metù a jir per tropes egn l festival de teater “Ateteater”. Dotrei domandes dant de meter man chesta neva ventura.

Na bela oportunità. Con coluna paroles saludeste la jent che vif te la valèdes ladines?

I á tut sö la incëria de presidënta cun plajëi y i sun ince dër cuntënta dla crëta che i á ciafé. I me rënd cunt dla responsabilité che toca pro na te incëria, mo por me él ince na bela sfida y i porvará da dé le miú che ala va. La cultura y le lingaz ladin á por me na gran importanza, da ponsé che i sun na picera mendranza che é stada bona da suravire amesa döes gran cultures sciöche chëra taliana y chëra todëscia, me sá na morvöia y i sá da l’aprijé.

La enciaria sarà per trei egn. Che proponetes te piajessel pa portèr ite te chest temp tel mond de la cultura e de la rejonèda ladina?
Mia incëria sciöche presidënta sará dantadöt aministrativa, mo sambagn oressi contribuí a ponsé a proiec y iniziatives culturales. Dantadöt pënsi a proiec che reverda dötes les valades ladines, por fá a na manira che an röies adöm plü gonot, che an se conësces damí. Por fá chësc adorun zënzater la colaboraziun cun atres istituziuns ladines.

Tie curriculum l’é bel rich. Tu cognosce la scoles olache tu as ensegnà, la istituzions de la scoles olache tu as lurà, la RAI amò apede... Che sort de colaborazion te piajessel con duc chi che laora e ge stèsc a cher la cultura e la rejonèda ladina?
Dantadöt pënsi che al sides dër important avëi tres indo n confrunt cun les istituziuns, da chël che al podess gní fora de plü idees de sciöche an po fá da valorizé le lingaz y la cultura ladina. Spontann pënsi a proiec che an podess mëte a jí adöm cun les scores cun l’obietif de ne ti fá nia perd la vöia y la motivaziun ales scolares y ai scolars de adoré le lingaz ladin. O n ater proiet che foss interessant da mët indo a jí é i „Dis de ert, leteratöra y teater“, che ê na bela ocajiun olache an â l’oportunité de avëi n confrunt cun chi che se dá jö cun la cultura y le lingaz ladin.

De lurier tu ge ensegne a picoi e gregn de esser se enstesc tres l teater e l teater, tu ne ensegne, l’é na esprescion che deida a crescer e a se cognoscer. Co pelela crescer e se cognoscer miec la jent ladina?
Le teater insëgna dantadöt da se ascuté sö un cun l’ater, de se intëne dl’atra porsona. Iö á la gran fortüna de fá n laur, olache i vad tröp incërch tles valades ladines, i á l’oportunité de conësce n gröm de porsones, che i ascuti tres sö dër gian. I aprijëi dër che ares me cunta de süa vita, de süa vijiun, de sües esperiënzes, y insciö ái imparé da conësce la Ladinia, y i sá che i ne la conësc nia ciamó döta. Ma da se ascuté sö un cun l’ater se ciaran ti ödli unse la poscibilité da se conësce damí.

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>