La dì dai 25 de november la é stata chierida fora da l’ONU desche giornèda internazionèla per tor demez la violenza contra la eles, n gran problem che zacan l’à scomenzà a vegnir al luster, ma che l’à amò tropes vèresc da fèr e amò massa l’é la eles che padesc de violenzes de vigni sort…. Vèlch’outa les ge jonta ence la vita. La violenza fisica, psichica, sozièla e economica contra la eles l’é n problem che à reijes te la mencianza de cultura, respet e cognoscenza.
A ben vardèr la violenza l’é l’ejit de na ledeza neèda, ledeza de la eles de lascèr n om o de ge dèr ousc a si ensomesc e fèr chel che les vel, ence jan de contra a la cultura dominanta. Na ledeza neèda, e donca violenza, l’é ence chela de no lascèr che na ela studie inant, se chiere fora n mestier, n sport o auter che ge piajessa fèr. L fat de no poder esser o doventèr chel che se à l dejiderie de doventèr l’é na forma de violenza che domana azions e reazions de coraje, segnèi forc ence per meter sotsora na cultura dominanta e ruèr a n auter livel culturèl, tant per la eles che per i ei. Ledeza e coraje ge vegn domanà man a man a la eles che no se lascia “fèr jù” che vel reagir a la violenzes ence te situazions politiches o culturèles che i les strenc ite.
Malala Yousafzai, la joena pakistana Pest Nobel per la Pèsc del 2014, à reagì a la violenza di telebans che no volea recognoscer l derit de studièr per la bezes e l’é doventà portaousc del derit a emparèr per duta la bezes, derit amò en pèrt neà te so Paisc: “Tolon te man nesc libres e nesc làpijes, l’é noscia èrmes. N bez, na beza, n ensegnant, n liber e n làpisc pel mudèr l mond”. Con chesta paroles Malala Yousafzai ge aea fat cognoscer al mond sia voa e dejiderie de studièr ma ai telebans no ge jia ben e i à proà a la copèr ai 9 de otober del 2012 tel bus che l la portèa a cèsa da scola. Malala aea demò 15 egn, la é stata bona de soraviver e anchecondì la studia inant te la Gran Bretagna, olache l’à cognù ampò sciampèr con sia familia.
Imajnes e colores te i film rua ence a contèr trop e soraldut deida a pissèr dò a desvaliva situazions de la eles, desche l film “Mustang” de la joena regista turca Denize Gamze Ergüven che conta la storia de cinch joenes che reagesc a na mentalità maschilista e patriarcala.Te chest film se veit ence la sozietà turca che la é mesa te l’Ozident modern, e mesa te la tradizion. L bel de chest film l’é veder da na man l’arjent vif de la cinch touses che sent l chiam del soreie e de la vita ma les vegn serèdes via te cèsa per vegnir emprometudes sposes (donca ledeza neèda e violenza) e da l’autra l percors che l’à fat l’om, da na man l’om patriarcal, conservatif e da l’autra chel che l’é jà dò n troi de svilup tel vers del recognosciment e del respet de la femenes.
N film enteressant che desceida tropes pensieres; da uzèr fora l’é che te chest, desche te etres caji, l gran problem che desceida violenza l’é chel del posses, ajache fin canche l’om peissa che la femena sie sia e el cogne o posse dezider dut, aon n problem de desvalivanza, mencianza de respet e la tenjions é granes…. ma tel moment olache l’om lascia la ledeza de esser ence a la femena, dut se muda.Stories de chesta sort n’é amò tropes tel mond ma a la ledeza neèda valgunes rua a reagir desche Sanita Alizaden, na joena rapper afgana che con sia musega ge à fat cognoscer sia storia al mond denunzian i maridoc de la bezes.
Refugèda clandestina te l’Iran zenza derit de jir a scola, demò de gra a na ONG la pel studièr e emparèr mùsega: coscita vegn fora sie talent e sia pascion per l rap e la scomenza ence a fèr curc video. Sie ensomech l’é fèr musega ma canche l’à 15 egn la vegn venuda desche sposa per 9.000 dolares….. Sie video rap “Brids for sale” l denunziea la violenza e l mestie destin de la bezes te sie paìsc e l’à didà chesta joena a scassèr la cedena del posses, viver sia ledeza e se n jir ti Stac Unii, per fèr sia vita e ge dèr lum a si ensomesc. La storia de Sanita la é vegnuda documentèda ence te n film: ”Sonita is a traveling swallow” (Sonita l’é n rénol che viaja) de la regista iranièna Rokhsareh Ghaemmaghami, olache vegn contà apontin l drama di maridoc sforzé de bezes.
Chesta stories no les é pa demò da l’autra pèrt del mond. Stories de violenza podassane les aer ence apede usc de cèsa, soraldut te n mond globalisà che vif te chest moment de gregn movimenc migratories olache se se embat tras de più te de autra stories e cultures . Purampò met pegn recordèr che l coraje e la ledeza che valgunes les é bones de viver scon dovìa ence mìngol de solentum, ajache tropa outes chesta eles zaches se troa soules te sia dezijion, no azetèdes da la sozietà e vèlch’outa no entenudes nience da chi che ge stèsc più apede. N ejempie de chest vers l’é la storia de la pruma ela teologa todescia, Helene Schlügen Strautmann, che à combatù na vita per ruèr a aer na catredra de teologìa e no la se contentèa demò de jir a ensegnèr te la “Hochschulen”.Autra femenes tel passà più apede nos à orì strèdes, desche Maria Piaz de Pavarin, che la é stata bona de dezider enstessa sie destin averjan n troi tel ciamp del turism co la pruma baraca – restorant sun jouf de Pordoi, al scomenz del Nefcent, enlouta segur n saut tel vet che no vegnìa vedù de bon eie e manco che manco entenù. Purampò aldidanché duc recognoscion che chesta stories de coraje, positives, stories de ledeza che la eles se tol, les segna n vèrech inant te la coscienza e te la vita de la eles e…. ence di ei.

Autora

Anna Mazzel
Redadora

Mi inom é Anna Mazzel, son nasciuda a Cianacei e vive anter Fascia e Busan. E' studià scienzes politiches, fat n master su la istituzions europees, un su la mediazion di conflic e na gran scola de vita tres i tropes viajes che é fat da l'Africa a l'Asia, Brasil, Nicaragua, Salvador e Guatemala e duc chi che amò à da vegnir. Laore desche programmista regista te la... >>