L’é passà 80 egn da canche, del 1938, te la Tèlia fascista vegnìa metù en doura la leges de discriminazion aldò de la raza per ge jir dò a l’antisemitism nazista de la Germania. Na vergogna che à ciapà pe te l’acort, te l’azetazion per tema, o adertura tel belfestidech o te l’aproazion de pèrt de la jent.

Del 1938 Liliana Segre l’aea 8 egn. La era nasciuda n an dò da Anne Frank e la stajea a Milan, te na familia ebrea agnostica, che no jìa al tempie. Liliana, desche n muie de etres, l’à abù consaputa de esser ebrea travers l dram de la leges raziales e desche Anne Frank, amò beza, l’aea vedù sia vita straouta de colp per la orenda discriminazion razista.

“Mi ricordo la sera di fine estate del 1938: avevo fatto la prima e la seconda elementare in una scuola pubblica del mio quartiere, quando mio padre cercò di spiegarmi che siccome eravamo ebrei, non sarei più potuta andare a scuola. Io che mi sentivo così uguale a tutte le altre bambine... Quel momento ha segnato una cesura tra il prima e il dopo...”

L “dopo” l’é l tentatif con sie père de sciampèr te la Svizera, e dapò la perjon per eles, de 13 egn a Varese, dapò a Como e a San Vittore, e da aló, ai 30 de jené del 1944, la deportazion, dal Binario 21 de la stazion de Milan fin a Auschwitz-Birchenau, destachèda sie père che no l’aessa mai più vedù.

L numer 75190 tatuà sul brac, l’ossescion de la fam, la mort dedant ai eies, e dapò la liberazion da pèrt de l’Armèda Rossa: de 776 bec taliegn sot i 14 egn rué a Auschwitz, Liliana l’é stat una di 25 a vegnir deretorn.

Per n muie de egn Liliana Segre no la é stata bona de fèr vegnir fora chi recorc teriboi, e perauter la jent no la volea i sentir, la volea desmentièr, utèr piata e scomenzèr da nef. Demò al scomenz di egn ’90 l’à cernù de parlèr, de “fèr del dolor di recorc n strument de forta valenza etica”. Perché dèr testimonianza no l’é n at spontan o automatich, l’é na dezijion.

Ai 19 de jené de chest an l president de la Republica Sergio Mattarella l l’à nominèda Senatora a vita (l’é la quarta femena a ciapèr chesta encèria, dò da Camilla Ravera, Rita Levi Montalcini e Elena Cattaneo), per sotrissèr, a 80 egn da la leges raziales, che no se pel desmentièr chela piata foscia, no se pel azetèr che chela tacia grija de razism o de belfestidech che à permetù l genocidie de 6 milions de jent la tache endò a se enscinuèr ite te anter la jent.

“Chesta nomina l’é n onor e na responsabilità - à dit Liliana Segre – e la portaré inant seghitan a testimonièr, coche é fat te chisc egn, per creèr memoria, ades che la generazion che à vivù en pruma persona chela esperienza la é dò a jir fora. Gé son na persona normala, na giava, che conta chel che l’à vivù. Esperienzes tremendes che no desmentie e no perdone, ma fae cognoscer zenza odie e spirit de vendeta, percheche son na femena de pèsc, na femena ledia, e la pruma ledeza l’é chela da l’odie.”

L’é dalbon de besegn che la cultura de la pèsc e de la ledeza abie la venta su la cultura de l’odie, e l’é gran besegn de testimonièr e tegnir viva la memoria, te chisc tempes olache i descorsc su la “raza” i ciuta endò fora e, amancol te na pèrt de la jent, no i soscedea nience gran scandal. L’é besegn de l fèr ai 27 de jené, dì de la memoria, ma ence duc i etres dis, semper de più.

PS: La storia de Liliana Segre é contèda te:

- Sopravvissuta ad Auschwitz. Liliana Segre fra le ultime testimoni della Shoahde Emanuela Zuccalà, Milano, Paoline Editoriale Libri;

- La memoria rende liberi, de Enrico Mentana e Liliana Segre, Milano, Rizzoli, 2015;

- Fino a quando la mia stella brillerà, de Daniela Palumbo e Liliana Segre, Piemme, 2015 (per bec)

Autora

Lucia Gross
Diretora responsabola

Fia de genitores fascegn e cresciuda tel Trentin, fora de Fascia, son enciasada da 30 egn te chesta bela val ladina, a Poza. Scrive per ladin da passa 20 egn, desche coordenadora e responsabola de la redazion de Fascia del sfoi “La Usc di Ladins”: del 2012 son doventada giornalista profescionista fajan l’ejam de idoneità a Roma, per ladin. Me piasc chest pìcol e glorious lengaz, e me piasc ... >>