Olà siere pa? Che saee pa de chesta vera?
Siere chiò, siere aló, siere colavìa.
Saee pech, saee chel tant, no saee nia… più che auter no capìe trop.

De la vera en Bosnia-Erzegovina, te la ex-Jugoslavia (1991-1995), se lejea sui sfoes e se vardèa a la televijion ma a capir chela gran confujion ge n volea: chi che mazèa chi, l perché e l per co, stac che se fajea e se desfajea, recognoscimenc da pèrt de la comunanza internazionèla e descognoscimenc a livel jugoslaf, batalions ofizièi da una e squadres paramilitères da l’autra, nazionalismes estremes en contrapojizion a na convivenza storica de popui e religions. Che la vera ti Balcans sie stat n dejaster zenza fin, saon ben; ma la storia che stèsc sotìte e dintornvìa e la realtà de inchecondì, chestes i les cognosc de pec. É abù l’ocajion e la fortuna de fèr pèrt de n viac endrezà da la Fondazion Langer te la Bosnia-Erzegovina, olache acà vint egn se à consumà la pèrt de la vera di Balcans co la storia più entorcolèda. Son ruèda a Sarajevo, a Srebrenica e Potočari, a Tuzla e dintornvìa, dessema a na clas de studenc e a n grop de ensegnanc e jent de scola. N viac senester dal pont de veduda emotif e storich, ajache se à delbon l’imprescion che l’om no se miore mai. La pruma domana che vegn fora, sot ousc, l’é apontin chesta. Ma no emparone mai? N ensegnant che l’era co nos, fajan referiment a Fabio Levi (storich a l’università de Torin), l dijea che no empararon mai se no scomenzon a fèr storia co la storia atuèla, de vigni dì, chela che vivon su la pel (ades fossa da se dèr ju personalmenter, ma ence desche te scola, te familia, co la vera n Siria, co la desvaliva situazions te l'Africa e daperdut tel mond olache se se copa jù). E enveze ge fajon emparèr a nesc fies la storia di popui vivui acà milenees e nos se encontenton de scutèr mingol la radio, vardèr mingol la tele e a la fin lascion che “l mondo l se endestrighe enstes”, descheche se ciantèa zacan su la musega del Canori.

L’é vera, la sensazion de no poder fèr nia ne empedesc de fèr, de se cruzièr, de dèr na man, per pìcola che la sie, te la mesura che sion bogn. Do vint egn, passan fora per la fosses, vardan i inomes de duc chi morc, contan la femenes stuprèdes e scutan la storia de chi bec e bezes nasciui da chela violenzes, na vena sotila de sens de colpa se leva su la pel. Vegn da se domanèr se no se aessa podù fèr de più. Che magari aessa bastà pech, zeche de più de compascion fosc, padir mingol con ic, ence se da dalonc. Magari didassa a no se sentir coscita destrabonii te dant a la meseria che vedon amò inchecondì.

“No l’assane mai dit!” - Te na Sarajevo amò segnèda da la vera e da l’assedie (dai 5 de oril del 1992 ai 29 de firé del 1996), coi bujes de la bombes a man corii con cera chécena (“la reses de Sarajevo”) e lèstes per recordèr i morc per man di cechins te ogne cianton, cognoscion l general Jovan Divjak che rec na soziazion per la promozion de la cultura e de l’educazion per i joegn, soraldut orfegn, de Sarajevo (Obrazovanje gradi Bih, che volessa dir: l’istruzion costruesc la Bosnia). Om gustegol vejin ai 80, l conta de coche la é jita sot l lonch assedie jit inant per 43 meisc alalongia e de coche la jent se à parà e à emparà a soraviver. Soraldut l conta de sé e de sia dezijion.
Divjak l’é nasciù a Belgrado; de reisc serba e de formazion militèra (sia mère ge aea dit che se l volea studièr l cognea bele fèr l’academia militèra che scioldi te cèsa no n’era), l vegn manà a Sarajevo olache l fèsc pèrt de l’armèda teritorièla. L program politich pissà dai nazionalisć vidé da Karadžić en combuta col goern serb vidà da Milošević (la Bosnia se aea domanà l’indipendenza con n referendum che no l’é vegnù azetà), l’era che Sarajevo cognea doventèr serba, canche la jent che ge vivea da secoi la era mescedèda anter Bosniacs ortodosc (serbesc), Bosniacs musulmans (“bosgnaches”), Croac, Judieres e amò de autra jent apede. Divjak, desche militèr e desche serb, l'aessa cognù didèr i nazionalisć a conquistèr la zità. L se refuda: “Che aesse pa cognù fèr? Dijeme… – l domana - Vivee chiò da 27 egn e me sentìe pèrt de chesta jent e mia jent no l’era demò i serbesc ma duc chi che me stajea dintornvìa. Vedede, l’identità l’é zeche che se fèsc di per di. Gé a viver chiò, l’era l’ambient che me fajea, gé siere mingol dut chel che l’era a Sarajevo enlouta”.
A la domana se no l’aesse entenù dantfora chel che fossa sozedù, l respon sinzier: “Me recorde che en ocajion de na zelebrazion ofizièla en Kosovo, l president de enlouta Milosevic, en cont de stat jugoslaf, l'aea dit publicamenter che se aessa servì, fossassane stac vertesc ence a fèr la vera. Me recorde che gé me é dit: ma che dìjel su? La vera con chi, anter de nos? Ma no pel esser! Na, no aesse mai pissà che chel fossa stat bele te pech temp l davegnir de mie paìsc e me fae amò na colpa per no aer entenù”. Nesciugn se spetèa n tèl program de violenzes, nience la comunanza internazionèla, ma soraldut la jent enstessa, che delbon la era usèda a viver dessema, en generèl, zenza problemes. L'é da dir, perauter, che l sentiment nazionalist l’à na storia longia te chisc paìjes e l conviver de jent e religion desvaliva no fèsc pèrt de sie program.
A la domana, cotant de sentiment nazionalist che ge vel per ruèr a na vera, Divjan respon: “No l’é na costion de numer ma de situazion. Canche la sorices les é famèdes, bèsta pa n picol toch de formai per les fèr corer! La situazion enlouta no la era sorida: crisa economica, n gran numer de jent zenza lurier… canche l’é coscita, l’é sorì jièr col sentiment de la jent e i nazionalisć à jià proprio sun chest”. Se no la era sorida enlouta, fegurave ades. La dejocupazion a Sarajevo la é del 40%, l stipendie medie l'é de 200 euro per i fortuné, i etres cogn se n jir, migrèr. L 60% del bilanz l vegn ciucià ite da l’aparat burocratich e vanza zis pech per duc i etres setores. Investimenc pec, coruzion tropa.

En cont de sentiment nazionalist na pìcola parentesa: l’idea de la “Gran Serbia” la é veia desche l cuch. Dò la Gran vera, i popui slaves (Serbesc, Croac e Slovens) se met adum ma l’é la Serbia che cree de esser la patrona, roba che croac e slovens engiot semper con fadìa (e canche i pel i taa la corda co la declarazion de indipendenza del 1991). Sot l goern Tito duc cognea fèr acort ma l sentiment nazionalist l laora desche n ruf sot la crepa col rejultat che saon. Dò la mort de Tito met man n prozes de autodeterminazion di stac aldò del prinzip de la religion pratichèda (l soul fator che l li desferenzièa), ma l cogn fèr i conc co la jent de la mendranzes religiouses. Coscita i Croac catolics no pel più stèr te la Serbia ortodossa, i Serbesc no pel viver te la Croazia, i Serbesc de religios musulmana (dal 1993 definì desche “Bosgnacs”) no pel stèr nió e, de fat, de duc, l’é chi che paa l priesc più aut.

Per jir de retorn a Sarajevo, Jovan Divjak no l fèsc costion de eroismes (se no per chel de la femenes de Sarajevo che à tegnù fora fin a la fin jan duc i dis a orir la scoles, a chierir da magnèr, a tegnir auta la degnità de la vita), l disc foraldret che la vera no la é fenida per l valor di sudé che i l’à defenuda, ma demò per l’intervent de la forzes Nato che te n sènt e amen à fat fenir n assedie che regnèa da passa 3 egn. Alexander Langer, ence da pazifist, l l’aea capida che ge volea combater co la medema èrmes, tant la situazion la era grieva, ma enlouta desche ades, con etres paijes en crousc, enteresc da una e belfestidesc da l’autra, lascia che la jent la mere da soula.

“Chi él chel om col cher de sas che no pianc con me?” - Su la strèda per Potočari se veit amò la senta da na ex coprativa olache l’é stat copà te dotrei ores passa 1000 omegn che sciampèa nvers Tuzla (cognosciuda desche “marcia de la mort” – su 12.000 che sciampèa n’é ruà vives al zil dotreimile).
Te cortina de Potočari l’é sepolì passa 8 mile persones, soraldut omegn e tousc (l più joen l’à 13 egn), touc fora da la gran fosses. La mort se la sent amò te l’aria e no se capesc se chi morc i à pèsc o manco. A mi me sa de no. Potočari l’é n paìsc te la val che porta a Srebrenica, raion metù sot la defendura de l’ONU del 1993. Chiò ruèa la jent che sciampèa dai copamenc cèsa per cèsa (“sneteament etnich”). A la fin de jugn del 1995 l’é più o manco 40-45.000 persones anter profughes bosgnacs e jent de Srebrenica.
La storia del genocidie de Srebrenica la é longia e demò per chela di ultimes dis dant del genogidie ge volessa n liber entrìech. Burt da recordèr l’é che i sudé de l’ONU, batalion da l’Olanda, no i é stac bogn de defener chesta jent e i à lascià jir a la mort duc, ma dassen duc, i omegn che l’era aló. La femenes e i bec sot i 12 egn (chi sora i vegn copé) i vegn porté a Tuzla con corieres e camions. I omegn vegn sepolii te de gran fosses (canche se vegn a saer che la comunanza internazionèla la sà de chest, la fosses vegn orides con ruspes e i corpes de chi peres cosc vegn destrabonii doi e ence trei outes).
Canche i batalions serbesc rua a Srebrenica (no i aessa podù, ma no l’era più nesciun control da pèrt de l’ONU), la jent bosgnaca capesc che la é tel pericol e la scomenza a aer na gran tema. L’é l meis de messèl del 1995. Na sera 5000 enfughé sbrega ite te la senta de l’ONU, n gran capanon, per aer defendura, ma l general olandeis Karremans l li pèra fora la di dò (sot costrizion da pèrt del general Mladić e lascià belebon soul dal mond). I omegn vegn separé da la femenes, i tosec da la mères. I filmac tel zenter de documentazion te chel che l’era la senta del batalion l moscia ence chest. Sentir la ousc de chela mères che ciga l’inom del fi che l’é do a jir a morir no l pel lascèr insensibol nesciugn (se no l’om zenza cher, e de chi, chi dis, n’era n grumon, aló e chiò). La lègremes no pel che degorèr te dant a duta a chela madones metudes ensema.
Da 20 egn la vedoves e la mères se bina adum vigne 11 del meis a recordèr chel 11 de messèl del 1995 canche ge é stat destrabonì la familia. Les fèsc n "girotondo" tel piaz de Tuzla, te l’acort, vigne una con n fazolet bianch con su l’inom de n mort. Les ge recorda al mond l mal che pel entravegnir se no se stèsc ascorc a voler la pèsc, che bèsta nia per viver l’infern per l rest de la vita.

Su Srebrenica l’é da enstadì (24 de mèrz 2016) la sentenza del Tribunal internazionèl de l’Aja per Karadžić, l’ex president de la Republica Serba de Bosnia. Karadžić l’é stat condanà per i fac de Srebrenica ma no per l genocidie di Bosgnacs che l’era programà. Chest volessa dir che la Serbia cognessa ameter de aer abù sie ruol tel program de destraboniment de n popul (genocidie apontin) ma l prozes de negazion de duta la storia l’é fort e sparpagnà. Lavìa no i pel ameter, ajache vegn contà che no l’é vera o al mascim che ge vel tor ca ence i massacres che à fat i etres; chiò (Europa) l fèr ameter lavìa l jissa a fermèr l prozes per fèr ruèr ite chisc paijes te la UE. A la fin la sentenza encontentea la politica ma no i morc.
De chisc peres cosc, l fotograf de Sarajevo Ziyah Gafić l’é do che l fotografea duc i ogec che se à troà te la gran fosses dessema ai resć de la persones: veières e reloes, tacuins e fotografies, anìe e bracialec, moneides e chieves, rosères e orazions. Recorc de na identità jita per semper destrabonida.

“L temp, da soul, no l fèsc nia” - De Tuzla se pel se ennamorèr. L’à na storia particolèra, bela e de speranza. Per dir, l’é la soula zità che del 1943 la é bona de se librèr enstessa dal nazifascism e la l fèsc zenza aiuc dal de fora, bona demò con sia forzes che les vegn dal tegnir adum. L’é na zità che co la vera di egn ’90 no se à desladà, la jent: Bosgnacs, Serbesc, Croac e duc i etres, i é resté adum e i ge l’à fata. A Tuzla l’era e l’é la cèses di orfegn de vera ma soraldut l’é cresciù la gran pert di bec e de la bezes nasciui da la violenzes sessuèles che i serbesc à fat su la femenes bosgnaches (l’era pervedù de copèr i omegn e meter encinta la femenes, coscita che la jenìa, i fantolins nasciui, i fosse stac automaticamenter de “raza” serba).
De chesta femenes e de chisc bec se cruzia fin dai tempes de la vera Irfanka Pašagić che del 2005 l'à ence ciapà l pest Langer per sie empegn. Irfanka, psichiatra, la vivea a Srebrenica e se no fossa stat per n amich, la fossa morta da temp (la era su la listes de la jent da copèr per destabilisèr i paìjes e Irfanka la era de familia cognosciuda e empegnèda). L’à vedù e vivù robes che nesciugn volessa viver e veder ma l’à dat n contribut zis gran al retroèr mingol de normalità. La vegn conscidrèda una de la più gran competentes en cont de sindrom post-trauma, ence se, la disc, la fajessa pa bolentiera condemanco, vedù coche la è ruèda a se ferèr en chest cont. Ai joegn che l’é con nos la ge disc che no la é pa tant otimista de coche va l mond e che la l veit ades amò più burt che acà i 20 egn.
Na studenta ge domana se l’é costion de temp che dapò la robes se met a post da soules. Irfanka la respon dreta e sćiantiva: “L temp no fèsc nia se l’om no deida”. La conta de coche la jent serba e la jent mussulmana à scomenzà, dò egn de acort, a se rejonèr. Tinpruma no i era nience bogn de se vardèr tel mus. “Ma no stajé pa a creer, ajache – la conta inant – l’é pa più sorì stèr da la man di deboi e de chi che à padì. Senester l'é proèr a capir l’autra pèrt, se meter te sia posizion”. La vel dir la posizion de la jent serba. “Na, no l’é sorì nience per ic ma ge vel lurèr acioche pian pian se podesse se rejonèr. Nos sion stac bogn pian pian e aon emparà ence i mecanismes che sauta ite canche se fèsc chest lurier de conziliazion e ades canche l fajon con etres gropes ne vegn ence mingol da grignotèr a veder che duc i fèsc medemo de coche fajaane nos, la medema reazions emotives, se disc la medema robes, se fèsc i medemi vic. Dapò se muda, pian pian se se arvejina, se pel danef scomenzèr a se vardèr ti eies, ma no cherdé che l temp fae chest lurier. Chest cognon l fèr nos”.

“Gé é perdonà” - La storia de Zijo Ribic la fèsc vegnir i sgrices. L’aea set egn e sie sores canche l’é ruà n comando a i mazèr. La familia de Zijo la stajea te na vila con duta la parentela (chesta forma de viver la é tipica di paìjes di Balcans). Chela sera duc cogn fora de la cèses, bec, joegn, gregn e veies, la femenes da una (la joenes vegn violentèdes te dant a duc, picoi e gregn) e i omegn da l’autra. La gran familia de Zijo vegn copèda ju, na persona dò l’autra, a scortelèdes. Zijo l ciapa na scortelèda vindò l col e l croda jabas, ma no l mor, l’é demò na ferida soravìa. L vegn ciarià sul camion coi etres e trat te na gran fossa. Da soul, canche no l sent più nia, l vegn fora e l domana aiut. La femena che ge aur l’usc la chiama i melitères che i lo porta a l’ospedel. Chiò Zijo l recognosc i omegn che pecia ores dant aea copà ju sia familia. Per grazia, i doi melitères i lo defen (i etres aessa fenì l lurier de mazament) e i lo scon. Zijo l vegn portà te n istitut per bec traumatisé e pian pian l doventa gran.
Tinpruma l cresc con na gran fadia, dapò pian pian la va, ma resta n bez zenza familia, zenza n parent che sie un. Ge resta dotrei cèses arbandonèdes olache l’era cresciù con sia sores, sia mère e sie père e olache l stenta a jir. Massa recorc, massa dolor.
Gran che l’é, l va a testimonièr contra i sassins de sia familia. Nience da dir che i vegn assolc ajache no l’é proes assà per dir che l’era stat ic. Vegnisse normal pissèr a n sentiment de ira, de odie. Enveze Zijo l vel perdonèr. Una de nos ge domana canche l’é stat e che che l’é sozedù che l’é ruà a chesta dezijion: “No sé che che l’é stat, no posse dir n moment o na roba. L’é stat mingol dut, duta mia storia. Mi genitores no me à mai ensegnà a odièr e da zeche ora é capì che se aesse volù viver delvers aesse cognù me destachèr da chel sentiment che no me lascèa viver delvers. Gé ades stae delvers con me enstes, canche me vèrde tel spieie son content de me. Seghite a jir inant co la cauja percheche me sà giust che i morc aesse giustizia, ma no per me vendichèr”.
La storia de Zijo la ne dèsc a duc n sgorlon. Do dut chel che aon vedù te chesta Bosnia, la burtures, la maldoranzes, la violenzes no sion più bogn de pissèr al ben, a la speranza, al perdon. L’é dis che sion tiré da na forza che ne spenc en jù, na lora che ne condusc te la budeles più scures. La storia de Zijo la ne ciapa tel copin e la ne porta danef en su, te chela lum che ne moscia che se pel amò esser omegn e femenes, creatures sanes, bones de proèr amor per l’auter e l’autra ence te la più gran proes de la vita.

La creazion de mic identitères - Tuzla l’é na zità che se tira fora de anter, sie bel l’é che no la proa a no stèr al jech de n popul contra l’auter. Dut l raion, a partir da la Croazia enfin a Belgrado, l’é dut na costruzion de identità tras monumenc, scrites, gonfalons, stemes… Se sun ogne recort a Sarajevo se veit l stema de la Bosnia, sun ogne fossa de n serb mort en vera n segn che dèsc valor al sudà che à defenù sia tèra, sun vigne cortina la bandiera che parten a chel popul e demò a chel, a Tuzla l’aria la é mingol desvaliva. Per dir, a Tuzla, endèna l’assedie, canche i Croac i capesc che i é en pericol, i va da l’ombolt Selim Beslagic e i ge disc che ic i vel sciampèr. L’ombolt ge respon che se se n va ic, enlouta se n va duc, ajache o resta duc o se n va duc. I à tegnù ensema e i é stac bogn de se la cavèr.
Semper a Tuzla, ai 25 de mé del 1995, vegn copà 71 joegn e ferì n centené. Enlouta i genitores fèsc n gest simbolich de na valuta zenza fin: i sepolesc duc i joegn dessema, te la medema cortina, e no descheche se usa lavìa, vigne un te chela sia. Na desmostrazion de comunanza sćiantiva e forta, n levèr l cef per jir fora dai jeghes de costruzion identitèra coscita pericolousc (l pensier porta chiò a fèr paralelismes te nosc raion) e per dir che la persones l’é demò persones e l rest l’é delbon “dut nia”.
L frabicat co l’ostaria olache se festejèa la festa di joegn (festa che no ge à mai piajù ai nazionalisć, apontin percheche la met adum i joegn de duc i popui slaves), ades l’é n lech de la memoria, un di pec de la memoria compartida, un di pec che rejona de pèsc e conziliazion. Sul recort no l’é simboi de nesciugn, no bosniacs, no serbes, no croac, no judieres, no laics… nesciuna bandiera, nesciun stema, nia de nia. Demò i inomes di joegn, un sot l’auter, zenza distinzion de partegnuda. L’é scrit chi che à copà, chest per giustizia ai morc: “Fascisć serbesc agressores” e na poesia de Mak Dizdar (1917-71), poet che de la vita di morc (gran espert de la scrites su la fosses bosniaches del medieve) aea pascion.

Chiò no se vif demò per viver
Chiò no se vif demò per morir
Chiò se mor per viver.

Alexander Langer e la Fondazion Langer - Tropes cognoscion la fegura de Alexander Langer, ma l'é de giusta dir amò doi paroles acioché sia arpejon rue ai joegn. Alexander Langer l’era nasciù a Sterzing del 1946 da père austriach judier e mère todescia dal Südtirol, scolina talièna e scoles todesces a Busan, dapò l’à studià giurisprudenza a Firenze. Da picol en su l’é sensibol a la dimenjion che tol ite più popui, da joenet l met su (se no l prum, segur un di prumes) n grop de discuscion olache tol pèrt todesc, taliegn e ladins. Endèna duta sia vita Langer l chier poscibilitèdes, lesc e contesć olache più dimenjions - de lengaz, religion, pensier politich, e c.i. - pel se troèr adum e descorer dessema. L’é ence per chesta sia fina sensibilità ai temes che vegn tratà, che la vera che sbregarà fora ti Balcans doventa per el na pascion zenza fin (da persona enformèda l cognoscea benon la situazion bele a la fin di egn ’80 e l spenc acioche la UE la tole ite chisc stac per schivèr chel che dapò l’é sozedù: tenc de morc che se aessa sparagnà!).
Con Tuzla l’à n raport particolèr e a cognoscer chesta zità se capesc ence l perché (la enrescida de la convivenza, semper) e da sia posizion de europarlamentèr l se mef per troèr soluzions de dialogh e pèsc. L vegn scutà pech chi egn, descheche ge sozet zenza a chi mingol profec; da mort, sun tropa robes se cogn ge dèr piena rejon. Sia arpejon la se sparpagna fora an per an, persona per persona. Si scric i é più che mai atuèi e sia vijions pel didèr a chierir na strèda, te chisc tempes de migrazions fortes e movimenc estremisć, per se confrontèr e proèr soluzions pazifiches. Per portèr inant sie pensier de pèsc e convivenza l’é stat metù sù na fondazion che porta sie inom e che l’à la senta a Busan.
La Fondazion Langer met a jir scomenzadives per sostegnir l’empegn e l dialogh zivil, culturèl e politich. Da chiò en fora: l “Pest Langer” che met al luster personalitèdes o idees de valuta su la convivenza, la realisazion de proiec desche “Euromediterranea” o “Adopt Srebrenica” e n grumon de autra robes, desche l lurier co la scoles che à portà a chest viac sui lesc de na memoria che pel amò ne ensegnèr zeche.

Da lejer, vardèr, curiosèr:
Jovan Divjak à scrit n bel liber che fèsc capir la storia de la vera te la Bosnia-Erzegovia e ti paijes de la ex-Jugoslavia. L'à desche titol: Sarajevo, mon amour.
Per capir e cognoscer la fegura de Alexander Langer, doi libres vegnui fora da pech: Fabio Levi, In viaggio con Alex. La vita e gli incontri di Alexander Langer e rencurà da Edi Rabini e Adriano Sofri: Alexander Langer. Il viaggiatore leggero. Scritti (1961-1995).
La poejies de Mak Dizdar tel liber: Il dormiente di pietra.
N film cruf ma che fèsc “veder”: Harrison flowers (de Elie Chouraqui).
Plata web del fotograf Ziyah Gafic: www.ziyahgafic.ba/photo.php
Per cognoscer la Fondazion Langer ma ence la storia de la persones che à venciù enscin ades l pest Langer (Irfanka Pašagić de chestes): www.alexanderlanger.org
https://vimeo.com/133642947 na bela intervista a Irfanka Pašagić

Autora

Olimpia Rasom
Redadora

Cresciuda te Fascia, vive a Busan con chi de ciasa. Me piasc scriver de fémenes, contar sia stories, cognoscer sia vites. Da canche é scomenzà mia enrescida per l dotorat su la eles ladines, no é più lascià lò de scriver con eles. Mete adum ence documentars e reportage per la tv, no demò su la fémenes, e mete a jir picola enrescides e evenc.

Nata e cresciuta in val di Fassa, ora vivo a Bolzano ... >>

Con la colaborazion de Andrea Rizza de la Fondazion Langer