Vèlch outa, ence massa da spes, se seron vindedò i ciancìe de noscia vites privilegèdes, tant da creer che demò chel che ne tocia diretamenter l ne revèrde; ma dapò, canche no se l speton o percheche enveze l volon, se troon te situazions che les à l poder straordenèr epura coscita scempie de straoujer noscia vida de veder la robes e de ne meter te dant a la realtà. No semper l’é sorì azetèr chest tant e cree che chi che à abù l met de viver situazions de chesta sort l’abie ence l doer de les spartir coi etres a na moda da renforzèr n sentiment comun che l posse jir sorafora i confins chenos enstesc se meton dant duc i dis. Per chesta rejon volesse spartir con vo mia esperienza personèla o, miec, la stories de la persones che en fèsc pèrt.

Enscin acà set egn la Siria l’era n Paìsc olache se stajea belebon, con n livel de istruzion zis aut e na sozietà n muie svilupèda, ma ence passà fora da ferides che vegnìa ca soraldut da la politica de represcion con chela che la familia Assad l’à goernà l Paìsc enscin dai egn ’70. Chel che l’é dò a sozeder en Siria da set egn en ca l’é dassen complicà e segur no son gé chela che pel spieghèr inout la rejons de chest tant. A envièr via la protestes pazifiches che à portà a la situazion da ades l’é stat l’arest, l’emprejonament e la tortura de joegn adolescenc che aea fat sù scrites contra l goern sui mures de la scola. La protestes les é states sofoèdes co la violenza e les se à mudà te na revoluzion e dò te na vera, che i Paìjes più potenc del mond à dezedù de desfrutèr per si enteresc.

No l’é chest l lech per rejonèr de la dinamiches de la vera o chierir de enrescir fora chi che à rejon e chi che à tort, semper che chesta categorìes les abie amò n segnificat. Volesse enveze ve contèr che che é vedù a Gaziantep, na zità turca a presciapech 50 km dal confin sirian, olache é lurà per doi meisc apede chi che à cognù jir demez da la Siria per sciampèr da na vera crudeila da spaent, olache no vegn respetà neguna regola e che a nos la ne vegn contèda a na vida no demò superfizièla, ma deldut sfaussèda.

L lengaz mediatich e la informazion a chela che duc à azess sorì ne met dant na vijion del mond che la ne l moscia desche se l fossa spartì fora te setores che no comunichea un co l’auter: chest ne porta a pissèr de no aer nia a che fèr con chel che sozet tel rest del mond ma bèsta pa pissèr bele mingol per entener che vèlch situazion la ne tocia più da vejin de chel che podassane se fegurèr. Se la Ruscia no fossa un di maores fornidores de gas per n gran numer de Paìjes, e anter chisc ence la Tèlia, la vera te la Siria no la fossa seguramenter coscita. Fossa stat metù en esser azions segur più fortes per la fermèr e no lascèr che na revoluzion se mude te na vera mondièla. Enveze la dependenza de tropes Stac da la distribuzion del gas l’é na arsegurazion per la Ruscia che, a chesta vida, la se tol la libertà de meter en esser intervenc militères che, se no, i metessa dassen a risech sia posizion tel panoram internazionèl. E chest l’é pa demò un di ejempies che ne deida a entener che ence nos fajon pèrt de chel che l’é dò a sozeder, no demò dal pont de veduda uman ma ence da chel più pratich e concret.

Son pontèda demez da la Tèlia con spetadives più o manco realistiches, mìngol cruzièda per chel che me spetèa. Dapò é scontrà Mohammed, Kamal, Ahmad, Khaled, Fatima, Amira, Hussein, m’é sentà jù sun si canapees con na chichera de tè o na bira e é rejonà con ic al lonch, zenza mai voler lascèr sù, e m’é lascià tocèr da chel che i à vivù e che i vif amò duc i dis.

Tropes de ic i é stac te vèlch sort de perjon, i é stac martoreé e i à risià de morir più che n’outa. Beleche duc à vèlch ferida: na scaa te n eie, na sfrijèda sun na spala o sun n pé, su la schena o sun n brac. L’é i recorc de la bombes, o de la perjon, o de duc doi. Chesta persones les é sciampèdes demez da sie Paìsc, ma no les à amò perdù la speranza de jir de retorn. Les ama la Siria, te l lejes te si eies lustres canche i rejona de sie Paìsc, canche i te conta che nesciugn se aessa pa mai fegurà, dant del 2011, che ence te la Siria podessa se envièr via na revoluzion. I te disc che i Siriegn i cresc sù col pensier che i morirà tel medemo lech olache i é nasciui, adertura te la medema majon. E ades milions de ic i é a la foresta e no i pel più se n jir de retorn.

L’é Ahmad, chel che ge encresc semper, che l taca na bona pèrt de si descorsc con “Zacan, a Aleppo”, e dò l te conta n fat da grignèr o zeche che l’à fat con sia familia, o de na manifestazion a chela che l’à tout pèrt con convinzion. L’à na vida de grignèr che fèsc grignèr duc chi che l’é aló, se ge peisse me vegn da grignèr amò ades. El l’é l’ejempie chièr de coche deric che nos cherdon che i sie naturèi no i é delbon coscita. Del 2011 l’era n student universitèr desche tenc de etres, ence per el l’istruzion l’era n derit da no meter en discuscion. Canche l’é sbrocà fora la pruma manifestazions l’à tout pèrt, desche tropes de si compagnes; canche dapò la situazion la é piorèda l’é jit te l’armèda ledia de la Siria, la pruma forza de oposizion co la èrmes. Dò trei egn l’à lascià l’armèda, ajache chela no l’era più sia revoluzion, l’era massa influenzes islamistes, massa enteresc. L’é sciampà en Turchia ma, desche opositor del regim, duc i documenc che vardèa sia istruzion i é stac socastré e fazilmenter brujé; en Turchia l’é senester per el jir a l’università zenza nesciun document che l zertee che l’à n diplom, ma en Europa chest tant se podessa l fèr. El no l vel auter che aer l met de fenir sù si studies. L’é stat enscinamai senester per me entener tant emportant che l’é per el, tant emportant che l’à dezedù de jir envers l’Europa dant a pé e dò co la bèrca, l soul viac che l pel se vaghèr: n viac pericolous, con de gran probabilitèdes de vegnir serà via, ma che l vèl n tentatif.

Fuad ades no l doura sie inom ver: l porta didamenc ti ciampes de enfughé te la Siria, fossa massa pericolous. L disc che vèlch outa sia femena ge recorda zeche de el, na vida de se comportèr, na capazità che l’à e che no l se recorda più de aer. Da canche l’é tacà la revoluzion, ma amò de più da canche la se à mudà te na vera, l se à destrabonì na pèrt de sé enstes, l’à ciapà sù zeche da nef, l se à mudà da dotor a operador umanitèr, desche tropes Siriegn, e l ge à dedicà la vita a sie Paìsc. Ma no l’é più bon de dormir delvers, desche n muie de etres de chi che conte te chest scrit.

L me conta che na dì, tel passèr te dant na boteiga de jeghes, un de si fies l ge à scecà n bon pech percheche l ge compre Aleppo: canche l se à arvejinà a la vedrina per entener che che l volea dir l’à vedù la reproduzion de na zità dessatèda.

Mie grignot da ogne dì i me l’à arsegurà trei bec: Mohammed, Omar e Youssef. L’é trei frèdes de 8, 11 e 13 egn che per doi meisc i me à fat desperèr e enamorèr ogne dì. Trei bec con na inteligenza da fèr marevea, en ultima m’é pissà che sibie n don de familia. Omar l me à ensegnà a jièr ai scaches, ma no aesse pa mai avent na partida: l fajea fora te pecia mosses ence chi che jièa da n muie più egn che el. Canche me entorcolèe te na mossa con pech anterveder l me grignèa fora zenza retegn. Youssef no l volea mai scutèr na lezion de ingleis ma, zeche che l’era, l lo rejonèa miec che duc e per l fèr stèr cet l cunst l’era chel de troèr fora n jech de stimol inteletuèl, zeche da senester che l tolesse ite, se l’era meso, Ronaldo. Mohammed l’é l fra più gran, chel anter i trei che la vera, fazilmenter, l se la recorda miec. Na dì, endèna che siane de fora a mateèr, l’é passà n aeroplan sora nesc ceves. Cruzié, i bec se à fermà per vardèr olache l’era. I sà ben che i é en Turchia, per ades nesciugn trèsc bombes sora Gaziantep, epura na sort de reazion de refles la i porta de retorn te n medeat ai momenc de poura che i à vivù. Pech dò somea che no sie sozedù nia, tacon endò a se mateèr, ma duc saon che sot si grignoc l’é l peis de na esperienza che la i à segné per semper e fazilmenter no i arà più pèsc. Chiò en Turchia sia situazion no la é sorida: enceben che la leges turches les perveide che chi che à n document de stravardament temporan (chesta tessera l’é l status di Siriegn en Turchia e la stabilesc si deric e si doeres) i à derit de jir a scola; te la realtà la situazions les é desvalives e n muie più complichèdes, mingol per via del grumon de Siriegn rué tel Paìsc e mingol per via che l sistem no l’é endrezà coche carenea.

Aboncont demò Youssef, l mender, l’à ciapà sobito la documentazion che serf; alincontra, per i etres doi frèdes, l fat che i à cognù sutèr un o de più egn de scola per via de la vera l’à portà sacotenc problemes per la enscinuazion a la scoles. Amò apede sie père l’é mort, la mère la laora ma no la vadagna assà, donca bendeché i cogn sutèr ence la ativitèdes de nosc zenter per jir a ge didèr a vèlch marcant del bazar.

Yomna l’à vint egn, sia familia la é stata bona de ruèr te la Svezia e sora n pech la podarà la arjonjer ence ela. La vel studièr lege e soraldut la pèrt legala di prozedimenc de pèsc e de la soluzions di conflic; per poder ruèr ite te na università svedeisa la tol pèrt a duc nesc corsc de ingleis e vèlch outa la stèsc te zenter dut l dì per poder jir a duta la lezions che la pel, no la se lascia sciampèr nience na ocajion de rejonèr con nos volontadives e bèsta pech per se n’adèr de la gran capazitèdes che l’à. Na dì la doventarà na avocata de valuta.

Marwan l’é una de chela persones che te fèsc stèr sorì, na persona col cher ciaut, con na gran ironìa e n grignot gustégol, una de chela persones che te te afeziones, te ge rejones diesc menuc e te ge ves jà ben. L’à denunzià situazions de coruzion de n grop armà che stèsc en Siria: l’é stat emprejonà, martoreà, l’à cognù sciampèr en Turchia ma l’à lascià a cèsa sia femena e si trei bec. Se vedea benon tant destrametù che l’era, semper cruzià per sia familia ence canche siane senté jù a se beiver na bira e a grignèr; tinultima l’é stat bon de jir de retorn en Siria ma dotrei meisc dò l’é stat endò ciapà e ades no se sà olache i l’à metù. Fossa bel dir che la soa l’é na situazion isolèda, ma i é mile e mile i Siriegn che i é stac ciapé e no se sà più olache i é rué, vèlch outa demò percheche i à dit fora sie pensier o i à fat pèrt de n grop.

Kamal canche l’é crepà fora la revoluzion l’à lurà desche ensegnant ti zentres per i enfughé (en Siria ades l’é apresciapech 6,2 milions de enfughé intergn). L podea ensegnèr de de dut, no demò chel che comanèa l regim. Dapò, del 2016, canche i bombardamenc rusc i à dessatà dut, no l’à più podù lurèr. Enlouta Kamal l’à dezedù de sciampèr en Turchia ma si genitores, oramai veiac, i é amò en Siria. I ge mencia a dò a dò. É amisc che combat te l’armèda de Assad, l disc. I é del grop etnich di Alawic e per ic se spostèr te raions no controlé dal regim fossa pa zis pericolous, no i é stac bogn de se la cavèr dal servije militèr.

Duc pel cerder, ma vèlch outa l’é dassen senester. Dapò, canche taca la vera, te ves defener tia familia. Co se pélel pa se spieghèr chest tant? Tie amich l podessa esser anter chi che dessatea tia majon e tu te rues a aer compascion per el. Chest ejempie l pel fèr entener da soul tant che la é complichèda la vera e dalonc da chel che podon entener, o amancol da chel che posse entener gé, che vèlch outa canche sente contèr chesta jent me n’ascorje demò de l’aric che vegn fora da sia paroles e da si eies e sé che fazilmenter no l se arvejinea nience a chel che proa na persona canche la vif delbon chesta stories.

Chel che m’é sentù dir fora e fora per doi meisc alalongia l’é che l maor didament che podon ge dèr l’é desmostrèr che vedon chesta realtà, che no se uton da l’autra.

Contèr sia stories l’é chel che posse fèr gé per me sentir manco dejùtola, l’é chel che posse fèr per mantegnir na emprometuda e ence per reter l piajer de me aer azetà, tout sù anter de ic e spartì co me dotrei de la miora seres de mia vita.

Autora

Ilaria Bertacco
colaboradora

Son da Poza, te Fascia. Me é laureà en scienze de le religion e me é conzentrà soraldut su l'Islam. Dò la laurea é fat desvalives lurieres te desvalives paìjes del mond, semper tel sozial.

Me piasc star anter la jent e scutar cheche à da dir i etres, me piasc desfar mi pregiudizies e far de neve esperienze che me fae veder la realtà da n auter pont de veduda. Ame cojinar, magnar e jir sa ... >>