La lnses ie na verdura dla familia dla Papilionacee y si storia à scumencià dan truep centeneies. Da reperc fossilisei àn abinà ora che la linses ie la plu vedla verdura cultiveda dala jënt. Nce tla bibia vëniel rujenà dla linses. La linses ie riches de fibres, proteines, sei minerei y vitamines y univa perchël cunscidredes la cërn di pueresc. La linses se lascia cunservé saurì y costa puech y vën perchël maiedes te truepa nazions, dantaldut tl’a Talia, ulache l ie usanza de les maië ntan la cëina dl ultimo di dl ann per se mbincé segurëza finanziera per l daunì. Chësta usanza vën dala tradinzion romana de scinché a zachei na “scarsella”, na pitla tascia de pel per tenì su la munëides, ma mplenida per chëla ucajion cun linses. Scincan la tascia, ti mbinciòven pona che la linses devënte munëides.

Ncueicundì iel plu sortes linses: tl’America dl Sud cultiveien plu che auter la linses ghieles y vërdes. Tl Urient y tl’India al incontra cultiveien dantaldut linses dal culëur oranc, ros y cuecenin. Sce la va, dassëssen for crì ora la linses sëces y nia chëles che ie te scatules, ajache les ie plu riches de sustanzes mpurtantes per na nutrizion sana y ne à degun cunservanc.

Autora

Sofia Stuflesser
Culaboradeura

ie nasciuda ai 26.07.1994 a Persenon. Do la scola mesana àla fat l lyzeum de rujnedes a Bulsan. Tl mumënt studieiela storia, storia dl'ert y biologia tla Università de Dispruch. La à laurà doi d'insteies pra la Usc di Ladins y scrij for inò articuli per la lies, per la butëiga dl mond y de zënza vel’ manifestazions.