Ndana che speton la Gran steila de chest Nadal, podon vardar sun Tamion che l'é danef ruà la steila Michelin per Stefano Ghetta del restaurant "L Chimpl". Nstadì le ge é stata confermada per l cuinto an de seghit.
Ciapar na steila Michelin vel dir esser a n livel bon aut de calità e de servije e Stefano, dessema a Katia, che i porta inant l restaurant "L Chimpl" sun chel bel de Tamion, l'é chel che i é bogn de garantir de an n an. N bel rejultat e na bela sodesfazion.
Extra la steila Michelin 2017, a Stefano ge é ruà amò n auter recognosciment de valuta. Da part de la Soziazion Profescionala di Cheghes Taliegn, ai 20 de november 2017 (te le Cianeve de Mezacorona), Stefano Ghetta ciaparà l pest per "l'Eccellenza della tradizione culinaria" per l raion Trentin-Südtirol.
Per chele e chi che à voa de prar a cojinar la speisa de Stefano, prest ruarà fora n liber: 19 rezete con fiores, erbes e buc che cresc te Fascia.
La prejentazion del liber "Amor de fornejela. Stories e rezetes de Fascia" la é parveduda ai 17 de dizember da mesa la 4 a Pera alò da la Malga (strada Dolomites 233).
Dotrei foto de Doriano Brunel, sun gana n "anteprima", de la speisa che podaron sporjer sot le feste de Nadal.