L moto de l’enologh Samuel Mazzel l ne porta a descorir cheche l’é vindedò l mond del vin; n mond fat de lurier, cura, saores e teritories e che l fèsc proèr l gust de la condivijion tras na esperienza sensorièla.

„Na sensazion che me à semper compagnà l’é la curiosità, chel che me spenc a capir coche sie possibol che vegne fora n cert vin da na vigna e che da n’autra, che somea valiva, vegne fora zeche de desvalif. L’enologia l’é na scienza che se studia ma resta zeche che l’é desche na magìa. Me à semper encantà l fat che no sie demò scienza o demò numeres, ma che sie ence poesia e èrt.“

L post da olache vegn n vin l’é de gran valuta percheche ogne teren l’é desvalif e l dèsc fruc che à n saor e na parbuda desferenc dai etres. Per n enologh, śirèr l mond per cèvenes vel dir segur lurèr n muie ma ence descorir teritories, se goder saores e proèr sensazions che les dèsc l met de meter ensema esperienzes. Lurèr te la cèvenes deida coscì a entener cheche l’é che rende chisc vins desvalives un da l’auter, coscì desferenc te sia carateristiches da mever l comerz de chest prodot su sciala mondièla. L’é donca na costion de geografìa; la vite l’é na pianta n muie sensibola al teren e a la condizions microclimatiches e dut l lurier che se fèsc te vigna l rua tel bicer. L vin no l’é dut valif e no l’é na rezeta per l fèr ajache l’é na gran lingia de fatores che pel mudèr. L zil l’é chel de fèr vegnir fora la particolarità de la ua zenza interferir con sistemes pech naturèi, per chest, più na ua la é lurèda a na moda naturèla, più podaron troèr te n vin i saores che i lo caraterisea. Tinultima chel che vegn fora sarà dut chel che n teritorie pel ne dèr e ne dir. Coscì l’é ence te la cercia ma ge vel tegnir cont che no se pel spieghèr dut! Canche se beif l vin, anter profum e saor rua ite ence zeche de n muie sogetif; se enscinua coscì na relazion anter nos e l vin. „L’é zeche de sacro, n moment che se se tol per se enstesc“ disc Samuel, ajache l vin l’é fat per se goder e stèr ben. „Stèr a chierir fora dut chel che l’é te n bicer l’é béleche desche ge fèr del mèl“ l va inant „l’é desche interoghèr na persona co la forza, enveze a oute se cogn lascèr demò esser, se goder l moment, proèr chest vin e lascèr che sie el che ne conte cheche l’à da ne contèr e no nos che cognon per forza ge tirèr fora dut chel che l’à. L vin l’é fat per l beiver no per ge vardèr“.

Autora

Cinzia Pistoia
colaboradora

Se la comunicazione deve essere inclusiva, non potrei mai pensare di chiudere il tutto su una immagine (o su nessuna) solo perché c'è troppo da osservare o troppo poco da considerare. La rappresentazione è in fondo una nuova presentazione e, probabilmente, c'è molto che può essere reso di nuovo presente ad un occhio annoiato. Sono sempre alla ricerca di una possibilità... >>