Alto Adige/Südtirol: podon dir che l’é n “vidor fiorì“, con n muie de vignes che fèsc da coronament a veies ciastìe, a pìcola gejies col ciampanil spiz o a cigola, a barcons piens de geranies. Daperdut vedon chesta vignes, beles rencurèdes, che de gra al teren e ence a la auteza, che dèsc ”l’escurscion termica“ (freit de net e ciaut de di), ne dona vins con n parfum e na saor che l’é rèr troèr utró. Per chest se disc che soraldut i bienc del Südtirol i à segur vèlch de più. Spezièi, n pecia paroles.
Müller Thurgau, Riesling, Sauvignon, Gewürztraminer… inomes che sona te noscia oreies desche na mùsega, e sobito i ne porta a chisc parfumes forc, eleganc: sention l minerèl, l vegetèl, l muschie e dapò fruc desche banana, peir, pom. N “bouquet“ che ne rua de bot, per chest dijon che l’é “n parfum intensif“. E più che porton l bicer al nès e più che decernon chisc parfumes che ne deletea. Per rejonèr de un de chisc vins dijon che l Gewürztraminer l nasc apontin a Termen (Tramin). L’é un vin aromatich, che no se se desmentia sorì, n vin che se compagna con pesc, o ence con cèrn biencia, formaes, e podon l beiver ence ensema a chi piac esotics e spezié, che vegn da l’0rient, ades tant de moda.
I vins “Aromatics” i mantegn i parfumes de l’ua ence dò la fermentazion, e chest se combinea ben ence co la spezies. E che dir dei vins chécegn? L “vitign” più raprejentatif de chesta region l’é la Schiava, beleche l 60% de la produzion de vin. Chesta ua dèsc resultac da no creer, soraldut col Sènta Magdalena. Troon ence l Lagrein, n vitign autocton, che à doi verscions: Lagrein Kretzer, che l’é n vin lijier, rosé, fresch e jentil. E l Lagrein Dunkel che à più corp, n bel color chécen, che se n beede n bicer no lascède più vea, tant na bon saor da fruc, da mores, brugnes, ampiries l ve lascia te bocia. Proà! E no podon se desmentièr l Pinot Neigher-Blauburgunder.
L raion de Mazon l’é n muie percacent per chesta sort de ua, che demò te pec raions dèsc de bogn resultac. E apontin Mazon l’é un de i miores de la Tèlia per chest vin. L Pinot neigher l’é elegant, fosc la pruma bocèda no la ve disc n muie, percheche l’é n vin “spèvech“, che va descorì pian pian... ence l color no l’é mai fort, l’é anter l chécen e l rosé, ma canche aede capì sia personalità, no ve destachède più. L’é n vin che encantesimea . Ben segur che troon ence de bogn vins sprizenc, de auta calità, e per fenir tolon cà n vin da dessert, l Moscato Giallo - Goldmuscateller, dal bel color de l’òr, saor da miel, e apede n bon strudel o sones da pom de èlber l ve meterà de bona luna, cherdeme!

Ve conte amò na picola storia se aede pazienza. Aré abù 10-11 egn, siere te auto (na “giardinetta”) con mie père, e jiane envers Termen. Enlouta lejee “Topolino“ e belimpont é tirà fora mie “giornalino” e é tacà a lejer. Mie père! L’é sutà sù che no ve die: ”Gé te porte per la Weinstrasse – la strèda del vin – che l’é la strèda più de nònzech de duta Europa (!!) e tu te lejes Topolino, e?? Met via sobito o te l trae fora da finestrin!“. Gé ge é responet ence mingol malamenter: “Ma papà, che veste che me enteresce a mi de la Weinstrasse e del vin..“. E mie père se a utà envers de me e con na esprescion stranamenter doucia l me à dit “Ei, te ès rejon, ti es ben amò pìcola, ma zacan te te recordarès che l papà te à menà su la Weinstrasse...”, e de fat...





Autora

Marika Detone
colaboradora

Son nasciuda ai 7 de mé, an 1947. Mie mestier l’é stat chel de lurèr coi ghesc', ades son n pension. Me à semper sapù bel lejer, viajèr, jir sa mont e dut chel che à a che fèr col vin. Son maridèda con Nereo, no aon fies ma sion n muie taché ai nec. Me à semper sapù bel e son semper stata ben con mia familia.... >>

fotos courtesy Karl Demetz