Acà valch dì é abù l met de esser menada dal da ite de le zele e di magasins de la Mèlga de Fascia e me à sapù dassen enteressant veder e capir duta la strada che cogn far l formai dant de ruar sun mie desch.
Fasc beleche da grignar che l formai l’é chela roba che se magna zenza pissar, canche se à mingol de fam fora per l dì o per star apede na cena. Da che che é vedù me peisse che l formai l jissa tegnù n muie più en conscidrazion.
La boteiga de la Mèlga la é duta bela rencurada e canche se é aló se peissa demò a che se proveder da bon, no de segur a dut l lurier, la pazienza, l’amor e la pascion che l’é vindò.
Na mola de formai la va tegnuda en salmoa e dapò rencurada vigni dì: l’é magasins piens de mole metude via miec che mi libres a ciasa e lavade, sborsciade, spetade. Al formai se cogn ge dar l temp de doventar chel che l’é e vindò l’é jent che l’à na gran pascion per sie lurier; la rejona del formai desche de n amich da se vardar via e l’à n gran respet per el, per l regolament che l’é vindò e soraldut per …l temp del formai.
Saade che se i bujes del formai i é duc valives no l’é n formai che l’à abù so temp natural de trasformazion?
L formai mior l'é chel che no l somea perfet, l’é chel con bujes desvalives. Osservar duta chesta pazienza e chest amor per l prozes natural fasc pissar che te noscia vita noi aon semper prescia, no ge dajon so giust temp a le robe, a le emozion, ai amisc, ai bec pìcoi.
Magnon tant en prescia e zenza se goder l magnar che se à cognù se enventar sigle sche “slow food” che nesc giaves i se aessa grignà na schena se i le aessa sentude. Sche a lejer, fora da chisc bares, “primi veloci” per ge star dò a tempes che no ne stasc dò a noi. Volassane che duc i sie valives, perfec, ma l più bon formai l’é chel che no l’é valif, l’é chel che no l somea perfet.
Cognassane duc mingol emparar dal formai e da chi che i lo laora.

Autora

Luisa Bertacco
Colaboradora

Stae a Poza, te Fascia. Do na laurea en scienzes internazionales e diplomatiches e n master par ensegnar talian ai foresc ades fae jir en garni con mia sor e ensegne talian ai migranc che vegn te nosce val. Me piasc lejer e viajar, ogne neva cultura che scontre, ogne post nef olache vae. Adore magnar coche ven magna alò e balar che che se bala alò e, se son te n post desché volontadiva... >>

foto courtesy Ennio Adami